Perezida wa Centrafrique yatumiye ingabo z’u Rwanda azishimira uko zamurinze

Chief Editor | 31-05-2016
Perezida wa Centrafrique yatumiye ingabo z’u Rwanda azishimira uko zamurinze

Perezida w’inzibacyuho wa Centrafrique, Madamu Catherine Samba Panza yashimiye ingabo z’u Rwanda ikinyabupfura n’ubunyamwuga zagaragaje mu gihugu cya Centrafrique. Ibi yabivuze ubwo yasezeraga ku basirikare b’u Rwanda iwe aho atuye ahitwa OUANGO, mu mujyi wa Bangui.

Madamu Catherine Samba Panza yari yateguye umuhango wo gusezera ku Ngabo z’u Rwanda abashimira uburyo bamurindiye umutekano hamwe na guverinoma yari ayoboye mu gihe cy’inzibacyuho muri iki gihugu.

Yagize ati “ Twaciye mu bihe bikomeye, ariko sinigeze ncika intege na rimwe kubera ko numvaga ndinzwe n’abasirikare bafite ikinyabupfura, bakunda akazi kabo kandi bakagakora kinyamwuga”.

Yaboneyeho kandi gushimira Guverinoma y’u Rwanda uburyo ikomeje gufasha igihugu cya Centrafrique. 

Amabwiriza aturuka mu buyobozi bukuru bw’ingabo za Loni muri Centrafrique (MINUSCA) avuga ko guhera tariki 1 Kamena 2016, Ingabo z’u Rwanda zizahagarika gucungira umutekano mu buryo bw’umwihariko Madamu Samba Panza.

Mu ijambo yavuze, Umugaba uyoboye Ingabo za Batayo ya 3 y’ingabo z’u Rwanda ziri mu butumwa bw’amahoro muri Santarafurika, Lt Col Claver Kirenga yashimiye Perezida Samba Panza ku bw’igikorwa cyo kubashimira yateguye. Yanamushimiye ubufatanye bwatumye ingabo z’u Rwanda zitunganya akazi zari zishinzwe ko kumurinda ari Perezida w’inzibacyuho ndetse na nyuma y’aho.

Ingabo z’u Rwanda zirinda ibice bitandukanye by’umujyi wa Bangui, banashinzwe kurinda umukuru w’igihugu hamwe n’ibikorwa remezo by’ingenzi mu mujyi wa Bangui. Ingabo z’u Rwanda zifite n’ibitaro bya gisirikare bikora mu rwego rw’Ingabo z’Umuryango w’Abibumbye zibungabunga amahoro muri Centrafrique (MINUSCA). Ibyo bitaro bikorera mu mujyi wa Bria uherereye mu Burasirazuba bwa Centrafrique

KANDA HANO UREBE VIDEOS UTASANGA AHANDI