Polisi y’u Rwanda irimo guhiga umugabo wishe umwana we amuziza amafaranga 1000

Chief Editor | 18-06-2016
Polisi y’u Rwanda irimo guhiga umugabo wishe umwana we amuziza amafaranga 1000

IP Emmanuel Kayigi; umuvugizi wa Polisi mu Burasirazuba

Polisi y’u Rwanda ikorera mu Ntara y’Uburasirazuba, irimo guhigisha uruhindu umugabo ukurikiranyweho icyaha cyo kwihekura akica umwana w’imyaka 10 amuziza amafaranga y’u Rwanda 1000.

Umwana w’umuhungu witwa Ibyihoze Gad wo mu murenge wa Rwinkwavu mu karere ka Kayonza, yabonywe hafi y’iwabo tariki 15 Kamena 2016 yishwe, aho bikekwa ko yishwe na Se, uyu mubyeyi we akaba yarahise atoroka n’ubu akaba agishakishwa na Polisi y’u Rwanda.

Umuvugizi wa Polisi y’u Rwanda mu Burasirazuba, IP Emmanuel Kayigi, yabwiye ikinyamakuru Ukwezi.com ko se w’uwo mwana witwa Ntawukirasongwa Damascene, ubu agishakishwa na Polisi y’u Rwanda aho bikekwa ko yaba yarahungiye muri Tanzania, mu gihe abaturage badutangarije ko yaba yarasimbutse uruzitiro rwa Pariki ubu akaba ari ho yihishahisha.

IP Emmanuel Kayigi, avuga ko Ntawukirasongwa yakubise umwana we mu ijoro rya tariki 14 Kamena 2016 amuziza amafaranga 1000 yamushinjaga kwiba, hanyuma uyu mwana w’imyaka 10 akaza kubonwa bucyeye hafi y’urugo nko muri metero 100 yapfuye, bakaba bakeka ko yaba yarahaguye nyuma yo gukubitwa cyangwa bakaba bari bamwishe bakahamujugunya.

Uretse uyu Ntawukirasonga Damascène, Polisi yanataye muri yombi n’umugore we Mukarubayiza Evelyne wari mukase w’umwana wishwe, uyu akaba afunzwe azira kuba ntacyo yakoze ubwo uwo mwana yakubitwaga bikamuviramo gupfa, ndetse hakaba hanakekwa ubufatanyacyaha mu rupfu rw’uwo mwana.

IP Emmanuel Kayigi, avuga ko basabye abaturage gukurikirana hakamenyekana aho uwo mugabo ukurikiranyweho kwihekura yaba yihishe, inzego z’umutekano nazo zikaba zikomeje kumuhigisha uruhindu ngo ashyikirizwe ubutabera.

KANDA HANO UREBE VIDEOS UTASANGA AHANDI