Polisi y’u Rwanda yafashe ibiyobyabwenge bifite agaciro k’amafaranga arenga 58.000.000

Chief Editor | 7-07-2016
Polisi y’u Rwanda yafashe ibiyobyabwenge bifite agaciro k’amafaranga arenga 58.000.000

Mu gikorwa cy’iminsi ibiri Polisi y’u Rwanda yakoze mu gihugu cyose ifatanyije n’abafatanyabikorwa batandukanye muri gahunda yise USALAMA III, hafashwe ibiyobyabwenge bifite agaciro karenga 58.000.000 z’amafranga y’u Rwanda, hafatwa ibikoresho by’amashanyarazi byibwe, hanyuma abantu 93 bo batawe muri yombi kubera ibyo bikorwa.

Ibi Polisi y’u Rwanda yabitangaje mu kiganiro n’abanyamakuru cyabaye kuri uyu wa Kane tariki 7 Nyakanga 2016, ubwo bamurikaga ibyavuye mu gikorwa cyihariye cy’umutekano cyabaye tariki 29 na tariki 30 Kamena 2016. Ni igikorwa Polisi y’u Rwanda yakoreye rimwe n’izindi Polisi zo mu bihugu 28 byo mu Burasirazuba n’Amajyepfo bya Afurika, hagamijwe gutahura ibyaha by’ubujura bw’amamodoka, icuruzwa ry’abantu, icuruzwa ry’ibiyobyabwenge, ubujura bw’ibikoresho by’amashanyarazi, ubujura bw’amabuye y’agaciro n’ibindi.

Muri iki gikorwa, Polisi y’u Rwanda yatahuye ibiyobyabwenge bifite agaciro k’amadolari 73.515 (arenga 58.000.000 z’amafaranga y’u Rwanda), birimo ibiro 17.851 by’urumogi, litiro 53.810 za kanyanga n’izindi nzoga zitemewe ndetse n’udupfunyika 44 tw’ikiyobyabwenge cya heroyine (heroin).

Hafashwe kandi metero 651 na toni 5 n’igice by’insinga z’amashanyarazi zibwe mu bubiko bwa REG cyangwa bigatwarwa habanje kwangizwa aho byari byarakoreshejwe, ibi bikanateza ikibazo cyo kubura k’umuriro mu bice bitandukanye by’igihugu.

Asobanura ibyiciro by’abatawe muri yombi, ACP Celestin Twahirwa, umuvugizi wa Polisi y’u Rwanda, yagize ati: "Abantu 62 bafashwe bakurikiranweho gukora ubucuruzi bwa magendu, gucuruza ibiyobyabwenge n’inzoga zitemewe, hanyuma 27 bafungiwe kwiba insiga z’amashanyarazi, mu gihe 19 bafatanwe udupfunyika twa heroyine, naho abandi batatu bakaba barimo gukorwaho iperereza ku cyaha cy’icuruzwa ry’abantu, muri iki gikorwa hakaba hararokowe abakobwa batatu bari bagiye gucuruzwa."

Muri iki gikorwa kandi hanasuzumye ibyangombwa by’amamodoka agera ku 160.000, biza kugaragara ko hari izigera kuri 18 zishobora kuba zaribwe, zikaba zigomba gukorwaho iperereza ryimbitse.

KANDA HANO UREBE VIDEOS UTASANGA AHANDI