Polisi y’u Rwanda yahaye iya Uganda umuturage ukurikiranyweho kwica murumuna we

Chief Editor | 16-06-2016
Polisi y’u Rwanda yahaye iya Uganda umuturage ukurikiranyweho kwica murumuna we

Polisi y’u Rwanda yashyikirije iya Uganda umuturage wayo witwa Musa Ariho Vimbi wari waratorokeye mu Rwanda ahunga inzego z’umutekano nyuma y’uko yari amaze kwica murumuna we.

Umuyobozi wungirije w’ishami ry’ubugenzacyaha muri Polisi y’u Rwanda, ACP Morris Muligo yavuze ko uyu Musa Ariho Vimbi yafashwe tariki ya 06 Kamena nyuma y’amakuru yari avuye muri Uganda yavugaga ko yaba yarambutse umupaka aza mu Rwanda nyuma yo gukora icyaha. 

ACP Muligo yagize ati: "Tukimara kumenya amakuru ko yaba yahungiye mu Rwanda twatangiye gukora iperereza tuza kumufatira mu karerere ka Gatsibo”

Vimbi yinjiye mu Rwanda tariki ya 30 Gicurasi yerekeza mu karere ka Gatsibo ari naho yihishe kugeza afashwe tariki 06 Kamena uyu mwaka.
 
Kuba habayeho gutanga uyu munyabyaha bikubiye mu masezerano y’ubufatanye u Rwanda rufitanye na Uganda kandi bikaba atari ubwa mbere ibi bihugu bihererekanya abakekwaho ibyaha bakurikiranywe n’ubutabera baba bafatiwe mu kindi gihugu.
 
Aya masezerano y’ubufatanye hagati ya Polisi y’u Rwanda na Polisi ya Uganda bisobanura imikoranire myiza mu guhanahana amakuru y’abanyabyaha, ubufatanye mu by’amahugurwa, mu bijyanye n’ibikorwa n’iperereza, kwihutisha ndetse no koroshya akazi k’ibikorwa bya polisi, guhererekanya abakekwaho ibyaha, kungurana ubumenyi, kongera ubushobozi bw’abapolisi n’ibindi.

KANDA HANO UREBE VIDEOS UTASANGA AHANDI