Rubavu: Imodoka zagonganye zihita zifatwa n’inkongi, shoferi na kigingi bahiramo - Amafoto

Chief Editor | 28-07-2016
Rubavu: Imodoka zagonganye zihita zifatwa n’inkongi, shoferi na kigingi bahiramo - Amafoto

Mu ijoro ryo kuri uyu wa Gatatu tariki 27 Nyakanga 2016, mu karere ka Rubavu habereye impanuka y’imodoka ebyiri zagonganye zigahita zifatwa n’inkongi y’umuriro, zikaba zanahiriyemo abantu babiri bapfiramo, ndetse kubera uko babaye bakaba batarabasha kumenyekana.

Aya makuru yemejwe na CIP Emmanuel Kabanda, umuvugizi w’ishami rya Polisi y’u Rwanda rishinzwe umutekano wo mu muhanda, mu kiganiro yagiranye n’ikinyamakuru Ukwezi.com.

CIP Kabanda ati: "Tariki 27 Nyakanga 2016 mu gihe cya saa moya z’umugoroba, mu mudugudu wa Nyaburanga, akagari ka Nengo, umurenge wa Gisenyi mu karere ka Rubavu, imodoka ya Daihatsu ifite ibirango RAA787B yari itwawe n’umushoferi utaramenyekana kuko yahiriyemo agahita apfa, yagonganye na Toyota Hiace Minibus ifite ibirango RAC 378 J yari itwawe na Habimana Aimé."

Aya ni amafoto yafashwe ninjoro zikirimo gushya

Uyu muvugizi w’ishami rya Polisi y’u Rwanda rishinzwe umutekano wo mu muhanda, akomeza avuga ko abantu bari bari mu modoka itwara abagenzi ya Toyota Munibus ntawigeze agira icyo aba, ariko izo modoka zombi nyuma yo kugongana zikaba zafashwe n’inkongi y’umuriro zigashya zigakongoka.



Aya mafoto yafashwe mu gitondo agaragaza uburyo izi modoka zabaye umuyonga

Avuga ko uretse uwo mushoferi, na kigingi wa Daihatsu byaje kumenyekana ko yahiriyemo agapfa, impamvu yo gushya kw’izo modoka n’icyateye impanuka muri rusange kikaba kitaramenyekana.

KANDA HANO UREBE VIDEOS UTASANGA AHANDI