Rubavu: Impanuka ikomeye yaguyemo batatu barimo umuganga n’umuyobozi wa gereza

Chief Editor | 6-10-2016
Rubavu: Impanuka ikomeye yaguyemo batatu barimo umuganga n’umuyobozi wa gereza

Mu masaha y’igicuku cyo kuri uyu wa Gatatu tariki 5 Ukwakira 2016, impanuka ikomeye y’imodoka yabereye mu murenge wa Rugerero mu karere ka Rubavu, abantu batatu bakaba bahise bahasiga ubuzima, muri aba hakaba harimo n’umuyobozi wungirije wa gereza ya Rubavu ndetse n’umuganga w’iyi gereza.

Amakuru y’iyi mpanuka yemejwe na CIP Emmanuel Kabanda, umuvugizi w’ishami rya Polisi y’u Rwanda rishinzwe umutekano wo mu muhanda. Yatangarije ikinyamakuru Ukwezi.com ko imodoka y’urwego rw’imfungwa n’abagororwa ifite ibirango GR 952 C yakoreshwaga na gereza ya Rubavu, yagonganye n’ikamyo ifite ibirango RAB 404 N abantu batatu bagahita bahasiga ubuzima.

CIP Emmanuel Kabanda ati: "Ni ejo tariki 5 z’ukwa cumi, mu gihe cya saa tanu n’iminota 15 z’ijoro, mu mudugudu wa Gitebe mu kagari ka Muhira mu murenge wa Rugerero mu karere ka Rubavu. Habereye impanuka ubwo imodoka Toyota Hilux GR 952 C ya gereza ya Rubavu yagonganaga n’ikamyo ya Actros RAB 404 N, zimaze kugongana hitaba Imana abantu batatu bari muri Toyota Hilux, umwe akomereka bikomeye. Abo bapfuye n’uwakomeretse bose bashyikirijwe ibitaro bya Gisenyi. Abari mu ikamyo bo ntawagize ikibazo"

Mu bapfuye, harimo umuyobozi wa gereza ya Rubavu wungirije I.P Jean Pierre Hakizimana, umucungagereza Corporal Nsabimana Aimé ari nawe wari utwaye imodoka, n’undi witwa Ingabire Epaphrodite naho uwakomeretse yitwa Nsekerabanzi Jackson. Iperereza ryatangiye ngo hamenyekane icyateye impanuka.

KANDA HANO UREBE VIDEOS UTASANGA AHANDI