Rulindo: Impanuka y’imodoka ya gisirikare yahitanye abagore b’abasirikare bo muri Malawi

Chief Editor | 2-06-2016
Rulindo: Impanuka y’imodoka ya gisirikare yahitanye abagore b’abasirikare bo muri Malawi

Sup Ndushabandi JMV, umuvugizi w’ishami rya Polisi rishinzwe umutekano mu muhanda

Mu ijoro ryo kuri uyu wa Gatatu tariki 1 Kamena 2016, imodoka y’ivatiri ya gisirikare yakoreye impanuka mu karere ka Rulindo, ihitana abagore babiri bari baturutse muri Malawi, bakaba berekezaga mu kigo cya gisirikare cya Nyakinama aho bari bagiye gusura abagabo babo barimo kuhakorera amahugurwa.

Sup Jean Marie Vianney Ndushabandi, umuvugizi w’ishami rya Polisi y’u Rwanda rishinzwe umutekano wo mu muhanda, yabwiye Ukwezi.com ko iyi mpanuka yatewe n’umuvuduko ukabije iyi vatiri ya gisirikare yari ifite ikarenga umuhanda, abagore babiri bakaba bakomeretse bikabije bajyanwa mu bitaro bya Nemba ariko bahita bashiramo umwuka, mu gihe abandi bagabo babiri bari barimo bo bakomeretse bidakabije cyane, bajyanwa mu bitaro bya gisirikare i Kanombe.

Aba bagore babiri bapfuye, bari bafite abagabo babo benda kurangiza amahugurwa ya gisirikare arimo kubera mu kigo cya Nyakinama, iyi modoka ikaba ari naho yari ibajyanye. Bari baje mu Rwanda kugirango bazanitabire ibirori bizaba mu mpera z’iki cyumweru ubwo hazaba hasozwa ayo mahugurwa arimo abasirikare bakuru b’abanyarwanda n’abanyamahanga.

Mu izina ry’abakunzi n’abasomyi b’ikinyamakuru Ukwezi.com, twihanganishije ababuze ababo muri iyi mpanuka tunasaba abakomeretse gukomeza kwihangana.

KANDA HANO UREBE VIDEOS UTASANGA AHANDI