Ubujura bw’inka buravuza ubuhuha mu karere ka Kirehe

Chief Editor | 29-06-2016
Ubujura bw’inka buravuza ubuhuha mu karere ka Kirehe

Nk’uko byagarutsweho n’Umuyobozi wa Polisi y’u Rwanda mu karere ka Kirehe, Superintendent of Police (SP) James Rutaremara ubwo yagiranaga inama n’abaturage b’umurenge wa Nyamugali tariki 27 Kamena 2016, ikibazo cy’ubujura bw’inka n’icuruzwa ry’ibiyobyabwenge ni bimwe mu bihungabanya umutekano muri aka gace.

SP Rutaremara yavuze ko hari inka zibwe mu bihe bitandukanye muri aka karere, kandi ko inyinshi muri zo zibwe muri Nyamugali, aho mu byumweru bibiri bishize hafashwe abantu umunani bacyekwa gukora ubwo bujura.

Mu bakurikiranyweho gukora iki cyaha hakaba harimo Sikubwabo Phocas na Ngabo Emmanuel, aba bombi bakaba barafatiwe mu cyuho ku itariki 15 Kamena barongoye inka eshatu bari bibye.

Mu mirenge ya Mahama, Nyamugali na Nyarubuye hibwe inka zigera ku 103 mu bihe bitandukanye, muri zo 53 zikaba zarafashwe zisubizwa benezo.

SP Rutaremara yaboneyeho kubashimira kubera ubufatanye bwabo mu gihe hakorwaga iperereza ku bujura bw’inka, iyo mikoranire myiza yabo na Polisi y’u Rwanda ikaba iri mu byatumye hafatwa bariya umunani.

Yavuze ko iperereza ryagaragaje ko bamwe mu bibwe inka bicecekeye ntibabimenyesha Polisi y’u Rwanda, ibi kuri we bikaba biri mu bituma inka zibwe zidafatwa vuba.

Uretse ikibazo cy’ubujura bw’inka, yanabasabye kujya batanga amakuru ku gihe y’abishora mu biyobyabwenge biganjemo abo muri Nyamugali babyinjiza mu gihugu banyuze mu nzira zitemewe, dore ko Kirehe ifatwa nk’imwe mu nzira zikoreshwa n’abatunda ibiyobyabwenge babyinjiza mu gihugu babivanye mu bihugu bihana imbibi n’u Rwanda, ibigafatirwamo bikaba ahanini bicishwa mu murenge wa Nyamugali kubera ko wegeranye na Tanzaniya.

KANDA HANO UREBE VIDEOS UTASANGA AHANDI