Umuntu wiyahuriye ku Muhima yamenyekanye, bikekwa ko yiyahuye kubera guhomba

Chief Editor | 29-08-2016
Umuntu wiyahuriye ku Muhima yamenyekanye, bikekwa ko yiyahuye kubera guhomba

Kuri aya manywa yo kuwa Mbere tariki 29 Kanama 2016, Polisi y’u Rwanda ikorera mu mujyi wa Kigali yatahuye umuntu wiyahuriye mu biro bye ku Muhima hafi na Smart Inn Hotel, nyuma yo gushidikanya bikabanza no gutangazwa ko ari umukobwa, uyu muntu akaba yamenyekanye.

N’ubwo mbere abantu bakorera hafi aha babanje kuvuga ko uwiyahuye ari umukobwa ndetse akaba ari nayo makuru bahaye abapolisi mbere iperereza rigitangira, Polisi y’u Rwanda yamaze gutangaza ko uwiyahuye ari umugabo witwa Nkundabagenzi Rajab, akaba yakoreraga umuhinde.

Ku murongo wa telefone Ikinyamakuru Ukwezi.com cyavuganye na Sup Hitayezu Emmanuel, umuvugizi wa Polisi y’u Rwanda mu mujyi wa Kigali, ahamya ko ibi byabaye ndetse yemeza ko abapolisi bari barimo kubikurikirana basanze uwo mugabo witwa Nkundabagenzi yiyahuye akoresheje umugozi w’ikote rye.

Aha Polisi yari irimo kubikurikirana

Sup Hitayezu avuga ko Nkundabagenzi yaje ku kazi nk’ibisanzwe, byagera mu masaha ya saa sita akibeta bagenzi be akajya mu nzu akiyahura. Avuga kandi ko uwo mugabo yakoreraga umuhinde ariko muri iyi minsi akaba yari yaragiye iwabo, kandi akaba yendaga kugaruka kuburyo uyu mugabo ashobora kuba yarahombye akaba yatinye ko uyu mukoresha we bazamerana nabi. Polisi ariko ntibyemeza, ivuga ko impamvu yiyahuye itaramenyekana n’ubwo hashobora kubaho kugira icyekwa.

Aya makuru y’ibihombo kandi ninayo yemezwa n’abakorera hafi y’aha baganiriye n’ikinyamakuru Ukwezi.com, bavuga ko muri iyi minsi yajyaga ataka ko arimo kubura amafaranga menshi. Nkundabagenzi yari umugabo wubatse wari utuye i Nyamirambo mu mujyi wa Kigali.

KANDA HANO UREBE VIDEOS UTASANGA AHANDI