Umugore w’umuzunguzayi yiciwe muri gare ya Nyabugogo

Chief Editor | 7-05-2016
Umugore w’umuzunguzayi yiciwe muri gare ya Nyabugogo

Mu masaha ya saa sita z’amanywa yo kuri uyu wa Gatandatu tariki 7 Gicurasi 2016, nibwo muri gare ya Nyabugogo iherereye mu mujyi wa Kigali hiciwe umugore wakoraga akazi ko gucuruza ibintu abibungana, muri bamwe bamenyerewe ku izina rya’abazunguzayi.

Umwe mu bari aho ibi byabereye, yabwiye Ukwezi.com ko umwe mu bashinzwe umutekano muri gare (abanyerondo) yakubise umugore wacuruzaga ibintu bitandukanye abibungana, akikubita hasi agahita ashiramo umwuka. Ibi bikimara kuba, hahamagawe imodoka y’ubutabazi ariko abandi bazunguzayi banga ko itwara uwo murambo, basaba ko umuyobozi w’umujyi wa Kigali ndetse na Komiseri wa Polisi babanza bakahagera.

Abazunguzayi bavugaga ko hari n’undi witwa Nyinya wishwe ntibamenye irengero rye, bityo banga ko imbangukiragutabara (ambulance) itwara umurambo, dore ko bayiteye amabuye ibirahure bakabimena, imvururu zigahosha Polisi imaze kuhagera.

Mu kiganiro na Ukwezi.com, Umuvugizi wa Polisi y’u Rwanda mu mujyi wa Kigali, Sup Emmanuel Hitayezu, yaduhamirije iby’aya makuru, avuga ko ari igikorwa cy’urugomo cyahabaye ariko ahakana iby’uko uwo mugabo wishe umuzunguzayi yari umwe mu bashinzwe umutekano, kuko ngo ushinzwe umutekano agaragazwa n’umwenda w’akazi.

Sup Hitayezu Emmanuel, yadutangarije ko uwishwe yitwaga Uwamahoro Theodosie naho uwamwishe akaba yitwa Joseph ndetse akaba yamaze gutabwa muri yombi kugirango iperereza rikomeze hamenyekane byinshi ku ntandaro y’uru rugomo.

KANDA HANO UREBE VIDEOS UTASANGA AHANDI