Minani washakishwaga kubera ibyaha bya Jenoside, yafatiwe i Kigali yarihinduye umunyatanzaniya

Chief Editor | 11-05-2016
Minani washakishwaga kubera ibyaha bya Jenoside, yafatiwe i Kigali yarihinduye umunyatanzaniya

Polisi y’u Rwanda yataye muri yombi umugabo w’imyaka 48 y’amavuko wiyitaga umutanzaniya, akaba yari asanzwe ashakishwa n’ubutabera bwo mu Rwanda kubera uruhare yagize muri Jenoside yakorewe Abatutsi muri 1994.

Hussein Minani, wari warabonye ubwenegihugu bwa Tanzaniya ku izina rya Hussein Abdi Kitumba Mujandi, yafatiwe i Remera mu karere ka Gasabo ku itaRiki 6 Gicurasi uyu mwaka, akaba yareretswe itangazamakuru kuri uyu wa Kabiri tariki 10 Gicurasi kuri Sitasiyo ya Polisi ya Kicukiro ari naho afungiye kugeza ubu.

Umuvugizi wa Polisi y’u Rwanda, Assistant Commissioner of Police (ACP) Celestin Twahirwa yavuze ko Minani yashakishwaga ku ruhare yagize muri Jenoside, ibyaha byibasiye inyoko muntu, ubwicanyi no gusambanya abagore ku gahato, yakoreye mu cyahoze ari Perefegitura ya Butare, muri Komini ya Ngoma, ubu ni mu karere ka Huye.

Minani ubu watwaraga amakamyo hagati ya Tanzaniya n’u Rwanda ku mazina y’amahimbano, akurikiranyweho ko, mu mwaka w’ 1994, yatwaraga Interahamwe mu bikorwa bibi zakoreye muri Butare kandi akaba yaragize uruhare rukomeye mu kwica abanyeshuri n’abakozi b’Abatutsi b’icyahoze ari Kaminuza nkuru y’u Rwanda yari i Butare.

Afatanyije n’Interahamwe kandi, Minani akurikiranyweho uruhare yagize mu rupfu rw’uwari umutoza wa Mukura Victory Sport witwaga Sitaki Charles hamwe n’inshuti ye bivugwa ko yitwaga Kamina, babishe babasanze kwa Kamina aho bari bihishe.

ACP Twahirwa agira ati:”Nyuma yo kumenya amakuru ku ruhare rwa Minani muri Jenoside yakorewe Abatutsi muri 1994, ndetse n’amarorerwa amwe yakoze ku giti cye, ishami ry’ubugenzacyaha bwa Polisi ryegeranyije ibyangombwa byose bigize dosiye ye, ubu bukaba bwarayishyikirije ubushinjacyaha.”

Yongeyeho ati:”Ishami ry’ubushinjacyaha rikurikirana abakoze Jenoside bihishe ryari ryaramushyiriyeho impapuro zimufata, ariko na Polisi Mpuzamahanga (Interpol) ikaba yari yarashyizeho urupapuro rwo kumufata kuya 30 Ugushyingo umwaka ushize, nyuma yo kwegeranya amakuru y’aho yaba aherereye n’uwo ari we kugira ngo afatwe.”

Minani yemera ko yahoze ari umushoferi wa Nyiramasuhuko Pauline wari Ministri w’Iterambere ry’umuryango wakatiwe n’Urukiko Mpuzamahanga Mpanabyaha rwashyiriweho u Rwanda (ICTR) ariko agahakana uruhare yagize muri Jenoside yakorewe Abatutsi mu 1994.

Minani kandi yakunze kuza mu Rwanda azanye imodoka nshya yabaga avanye ku cyambu cya Dar-es-Salaam, ku buryo n’igihe yafatwaga yari atwaye imodoka nshya ya kompanyi izicuruza ya hano mu Rwanda yitwa Rwanda Motor Ltd.

KANDA HANO UREBE VIDEOS UTASANGA AHANDI