Abadepite ntibumva uburyo mu mafaranga agenewe urubyiruko, 71% yose yajyanwa Iwawa

Chief Editor | 19-05-2016
Abadepite ntibumva uburyo mu mafaranga agenewe urubyiruko, 71% yose yajyanwa Iwawa

Mu gitondo cyo kuri uyu wa Gatatu tariki 18 Gicurasi 2016, abagize Inteko Ishinga Amategeko; umutwe w’abadepite, by’umwihariko abagize Komisiyo y’Ingengo y’Imari n’Umutungo by’igihugu, baganiriye na Minisitiri w’Urubyiruko n’Ikoranabuhanga Jean Philbert Nsengimana, bavuga kuri gahunda y’Ingengo y’Imari y’igihe giciriritse 2016/2017- 2018/2019 (Budget Framework Paper) hamwe n’imibare y’ikigereranyo cy’ingengo y’imari ya 2016-2017.

Ku bijyanye n’imibare y’ikigereranyo cy’ingengo y’imari ya 2016-2017, Minisitiri Jean Philbert Nsengimana, yagaragaje ko mu mafaranga y’u Rwanda agera kuri 488.816.570 Minisiteri ayobora izakenera, mu gice kigenewe imishinga iteza imbere urubyiruko, agera kuri 71% azatangwa ku bajyanwa kugororerwa mu kigo ngororamuco giherereye Iwawa. Ibi benshi mu badepite ntibabyishimiye, ahubwo berekanye ko hakwiye gushakwa ingamba zatuma abajyanwa muri iki kigo barushaho kugabanuka, hanyuma amafaranga yabatangwagaho agakoreshwa ibindi biteza imbere urubyiruko.

Abadepite kandi bashimangiye ko benshi muri uru rubyiruko rutangwaho akayabo Iwawa, hari gahunda z’uburezi bw’imyaka 12 ziba zibagenewe bakaba bata amashuri kandi uburezi aribwo buba bwakabafashije gukomeza kubona uburere no gutegura neza ahazaza habo. Abagize iyi Komisiyo mu Ntego Ishinga amategeko, basanga icyangombwa ari ugushaka uko umubare w’abajyayo ugabanuka hagashakirwa umuti ibibazo bituma bajyanwayo birimo no kuba baba barabaye imbata y’ibiyobyabwenge.

Minisiteri ifite urubyiruko mu nshingano zayo, ivuga ko ubu Iwawa habarizwa urubyiruko rw’abagera ku 3000, ariko hakaba hari gahunda yo kongera abo iki kigo cyakira, bakagera ku 4000, nyamara ahubwo abadepite basanga igikwiye ari uko umubare w’abajyanwayo wagabanuka, hakitabwa mu gushakirwa umuti ikibazo cy’abana bakoresha ibiyobyabwenge n’abitwara nabi kugeza ubwo bajyanwa kugororerwa Iwawa.

KANDA HANO UREBE VIDEOS UTASANGA AHANDI