Abafatabuguzi ba MTN na Tigo bakomeje kugabanuka cyane mu gihe aba Airtel biyongera

Chief Editor | 30-06-2016
Abafatabuguzi ba MTN na Tigo bakomeje kugabanuka cyane mu gihe aba Airtel biyongera

Sosiyete y’itumanaho ya MTN Rwanda na Tigo Rwanda, zatakaje abafatabuguzi bazo mu kwezi kwa Gicurasi 2016, mu gihe abafatabuguzi ba Airtel Rwanda bo biyongereye.

Imibare igaragazwa n’Ikigo Ngenzuramikorere mu Rwanda kizwi nka RURA, igaragaza ko mu kwezi kwa Gicurasi MTN Rwanda yatakaje abafatabuguzi bayo bagera ku 19.107, kuko yavuye ku bafatabuguzi 3.942.773 ikajya ku bafatabuguzi 3.923.666, mu gihe Tigo Rwanda yatakaje abafabuguzi 31.344 kuko yavuye ku 3.054.529 ikajya ku 3.023.185.

Isosiyete ya Airtel Rwanda, niyo yazamutse mu mibare y’abafatabuguzi ugereranyije ukwezi kwa Mata n’ukwa Gicurasi, kuko yungutse abagera ku 57.672, ikabona 1.779.579 ivuye ku 1.721.907

Kuba Airtel Rwanda yarazamutseho abarenga igiteranyo cy’abo Tigo na MTN zatakaje, byatumye umubare w’abakoresha telefone uzamuka ho gato, wiyongeraho 0.15%, kuko bavuye kuri 8.803.801 bakagera kuri 8.816.758

Guhera muri Mutarama uyu mwaka, MTN Rwanda na Tigo Rwanda zakomeje gutakaza abafatabuguzi bazo, MTN ikaba ari yo yatakaje benshi, bagera ku 122.018 hagati ya Mutarama na Gicurasi 2016. Tigo yo yatakaje 37.257 mu gihe Airtel Rwanda muri icyo gihe yungutse 174.262

KANDA HANO UREBE VIDEOS UTASANGA AHANDI