Abarundi barenga 1500 birukanywe mu Rwanda ntibavugwaho rumwe n’ibihugu byombi

Chief Editor | 17-05-2016
Abarundi barenga 1500 birukanywe mu Rwanda ntibavugwaho rumwe n’ibihugu byombi

Guhera kuwa Gatanu w’icyumweru gishize, u Rwanda rwirukanye Abarundi barenga 1500 nk’uko byemezwa n’abayobozi bakuru b’ibihugu byombi, ibi bikaba bibaye nyuma y’uko hashize igihe umubano w’ibi bihugu atari mwiza.

Seraphine Mukantabana, Minisitiri ushinzwe impunzi no gukumira ibiza, yabwiye ibiro ntaramakuru by’Abafaransa AFP ko abarundi birukanywe ari abatari bafite ibyangombwa kandi bakaba barabaga mu gihugu batitwa impunzi, bityo bakaba barabaga mu Rwanda mu buryo bunyuranyije n’amategeko. Minisitiri Mukantabana kandi, avuga ko ibi atari umwihariko ku barundi, ahubwo ngo ni igikorwa cyakorewe abanyamahanga bose badafite ibyangombwa.

Philippe Ngabonziza uyobora umujyi wa Ntega mu Burundi, avuga ko ku mupaka w’u Rwanda n’iki gihugu, hambukiye abagera ku 1,320 guhera kuwa Gatanu w’icyumweru gishize. Hanyuma Albert Nduwimana uyobora Ngozi, we yatangaje ko bakiriye abarundi 218 mu mpera z’icyumweru gishize.

Nduwimana Albert uyobora intara ya Ngozi, avuga ko aba barundi birukanywe kubera impamvu za Politiki, kandi ko hari abari bamaze imyaka irenga 10 mu Rwanda banafite akazi, bakaba bagombaga kwambuka igihugu bafite imitungo myinshi y’ibyo baruhiye.

Igihugu cy’u Burundi kimaze igihe kirenga umwaka umwe kirimo akaduruvayo, katangiye ubwo Pierre Nkurunziza yatangazaga ko agiye kongera kwiyamamariza kuyobora iki gihugu ndetse akanatsinda amatora muri Kamena umwaka ushize. Kuva ubwo abantu barenga 500 bamaze kwicwa naho abarenga 250,000 bahunze igihugu, batinya kwicirwa mu gihugu cyabo.

U Rwanda rumaze igihe rushinjwa gutoza impunzi z’abarundi hagamijwe kujya guhirika ubutegetsi bwa Pierre Nkurunziza, nyamara abayobozi bakuru b’u Rwanda barangajwe imbere na Perezida Kagame, bashimangiye kenshi ko ibibazo by’u Burundi bikwiye gushakirwa mu gihugu cyabo ntibabyitirire abo hanze.

KANDA HANO UREBE VIDEOS UTASANGA AHANDI