Burera: Ikibazo cy’amafaranga 50.000 umuyobozi yambuye abagore cyabaye ingorabahizi

Chief Editor | 13-07-2016
Burera: Ikibazo cy’amafaranga 50.000 umuyobozi yambuye abagore cyabaye ingorabahizi

Itsinda Icyerecyezo rigizwe n’abagore bahuriye mu kagoroba k’ababyeyi, rirashinja ushinzwe irangamimerere mu murenge wa Kivuye mu karere ka Burera witwa Kiruhura Alexis, kubariganya amafaranga bakusanyije bagamije kwiteza imbere, akabakoma mu nkokora ari we wakabarengeye.

Iri tsinda Icyerekezo ry’abagore bahurira mu kagoroba k’ababyeyi, ni iryo mu mudugudu wa Mushunga, mu kagari ka Nyirataba ko mu murenge wa Kivuye, rikaba ryarambuwe n’ushinzwe irangamimirere mu murenge amafaranga y’u Rwanda 50.000.

Umuyobozi w’iri tsinda, yatangarije Radio Flash FM dukesha iyi nkuru ko aya mafaranga yari yaranyerejwe n’umubitsi w’iryo tsinda, nyuma yo kumurega akayaha uyu muyobozi ngo nawe azayashyikirize ba nyirayo ariko agahita ayifunga.

Uyu muyobozi w’itsinda agira ati: "Twari turi mu itsinda, tuza kugira umubitsi aza kunyereza umutungo w’itsinda, ntangira kurega mu buyobozi bw’umudugudu ndamutsinda, tujya mu kagari ndamutsinda, banyohereza ku rwego rw’umurenge naho ndamutsinda, ku itariki 15/01/2016 nibwo natsindiye ayo mafaranga y’abanyamuryango. Noneho ku itariki 02/02/2016, amafaranga agiye kuyishyura yayishyuye Etat Civil (ushinzwe irangamimerere) w’umurenge wa Kivuye, ambwira ko ku itariki 3 nza kuyafata nkayaha abanyamuryango, ariko kuva icyo gihe ’ntarayatanga’... Ku itariki 23/03/2016 nibwo nagiye i Burera (ku Karere) bamutegeka ko anzanira amafaranga, kuva icyo gihe no kugeza aya magingo mpora nsiragira..."

Gitifu w’umurenge wa Kivuye, Nteziryayo Anastase, avuga ko iki kibazo bakizi kandi kikaba cyaragejejwe ku buyobozi bw’akarere ka Burera kuko akarere ari nako mukoresha mukuru wa Kiruhura Alexis ushinjwa ubuhemu n’abaturage.

Uwambajemariya Florence, umuyobozi w’akarere ka Burera, avuga ko nawe iki kibazo yakimenye, kandi hakaba hari ingamba zafashwe. Agira ati: "Ubundi nk’uko amategeko abiteganya, mu micungire y’abakozi iyo umukozi yakoze amakosa mu kazi, yakwa ubusobanuro, ubuyobozi nabwo bukagira icyo bukora kuri bya bisobanuro, tuzoherezayo akanama gashinzwe displine (imyitwarire)."

Gusa ntawabura kwibaza uburyo ikibazo cy’amafaranga y’u Rwanda 50.000 kinanirana mu nzego z’ibanze kugeza ubwo bigera mu rwego rw’akarere, narwo rukamara amezi hafi ane rutarabasha kurenganura itsinda ry’abagore bari bizigamye bagamije kwiteza imbere.

KANDA HANO UREBE VIDEOS UTASANGA AHANDI