Bushishi w’umukene cyane wari washyizwe mu cyiciro cy’abaherwe yagobotswe n’abaturage

Chief Editor | 2-10-2016
Bushishi w’umukene cyane wari washyizwe mu cyiciro cy’abaherwe yagobotswe n’abaturage

Umusaza w’imyaka ibarirwa muri 65 witwa Bushishi Francis, yagobotswe n’abaturage bafatanyije n’ubuyobozi bw’inzego z’ibanze, nyuma y’igihe ntawe umwitayeho kandi bigaragara ko ari umukene cyane ndetse n’ubuyobozi bukemera ko akwiye gufashwa nyamara akaba yari yarabanje no gushyirwa mu cyiciro cya 4 cy’ubudehe gisanzwe kijyamo abaherwe batunze ibya Mirenge n’abayobozi bakuru b’igihugu.

Tariki 11 Kanama 2016, nibwo ikinyamakuru Ukwezi.com cyari cyamusuye aho atuye mu mudugudu wa Kabasanza, mu kagari ka Gihara ko mu murenge wa Runda mu karere ka Kamonyi, atugaragariza ubuzima abayeho nyamara akaba nta kintu na kimwe afashwa n’ubuyobozi, mu gihe nabwo buzi neza budashidikanya ko ari umukene kurusha abandi.

Bushishi icyo gihe yavuze ko atazi neza imyaka afite, ariko abaturanyi be bamuzi bavuga ko afite hejuru ya 65. Nta mugore yigeze ashaka ndetse nta n’umwana agira, aho aba aribana. Akazu twasanze abamo kari kamaze gusaza no kwangirika kuburyo igisenge cyari kirangaye, aka nako akaba yarakubakiwe n’umupadiri wabaga muri aka gace ariko nawe ntakihaba. Iyo wageraga muri aka kazu, ukareba uko kameze n’uburyo abayeho, hanyuma ukareba Bushishi iwe imbere y’iyi nzu utiriwe unamubaza byinshi, watangazwaga no kumva ko yari mu cyiciro cya Kane cy’Ubudehe, gishobora kuba kirimo abayobozi bakuru b’igihugu, abaherwe bafite imiturirwa n’inganda n’indi mitungo ihambaye.

Nta bwisungane mu kwivuza Bushishi agira kuko atari mu cyiciro cya mbere cy’abakennye cyane bishyurirwa na Leta, nta gahunda ya Leta nka VUP imufasha nk’uko bigenda ku bandi basaza, ndetse nta n’indangamuntu agira kuko habuze uwamufasha kubikurikirana ngo ayibone. Avuga ko arya iyo hagize umugoboka akamuha, bitaba ibyo akaba yaburara akanabwirirwa. Icyari gitangaje kurushaho ubwo twamusuraga, ni uko twamenye ko abayobozi b’inzego z’ibanze bose bemeza ko uyu musaza akennye bikabije ariko nabo ibye bikamera nk’ibyababereye urujijo.

Bushishi ahagaze mu muryango w’inzu Padiri yamwubakiye

Kayibanda Vincent, ni umukuru w’umudugudu wa Kabasanza. Muri Kanama yabwiye ikinyamakuru Ukwezi.com ko mu by’ukuri Bushishi ubuyobozi bw’umudugudu bumuzi nk’umukene, ariko nabwo bukaba bwaratunguwe no kumubona mu cyiciro cya Kane cy’Ubudehe. Uyu mukuru w’umudugudu cyakora avuga ko iki cyiciro Bushishi yakigaragayemo mu ntangiro z’uyu mwaka bakamuburanira ubu akaba yarashyizwe mu cyiciro cya kabiri cy’Ubudehe, ariko iki nacyo uyu muyobozi yemera ko kitamukwiye, cyane ko nta n’ubwisungane mu kwivuza yakwishyurirwa na Leta. Avuga ko n’ubu bategereje ko bazongera bakamuburanira bakareba ko yashyirwa mu cyiciro cya mbere kijyanye n’ubuzima bw’ubukene bukabije abayemo.

Uku niko igisenge cy’iyi nzu padiri yamwubakiye cyari kimeze

Abdou Mukiga, ni Umunyamabanga Nshingwabikorwa wungirije w’akagari ka Gihara. Uyu we muri Kanama yari yatangarije Ikinyamakuru Ukwezi.com ko Bushishi koko bamuzi nk’umukene cyane muri aka kagari, ariko kudafashwa bakaba nta ruhare babigiramo. Kuba yarabanje gushyirwa mu cyiciro cya 4, yavuze ko nabo byabatunguye kuko mu nzego z’ibanze yari yarashyizwe mu cyiciro cy’abakennye cyane, akumva ari mu nzego zo hejuru bashobora kuba baramwibeshyeho, bikongera bikagenda uko ku nshuro ya kabiri ubwo bamushyiraga mu cya kabiri. Yashimangiye ko barimo kongera gutegura kumuburanira, bakagaragaza ibishoboka byose bishimangira ubukene bukabije afite bityo agashyirwa mu cyiciro kimukwiye.

Ubuyobozi nabwo bwemeza ko Bushishi yagiye ahura n’akarengane mu byiciro by’ubudehe

Naho ku bijyanye n’ubundi bufasha bugenerwa abatishoboye n’abasheshe akanguhe by’umwihariko, Mukiga yavuze ko bashatse kuva cyera kumushyira ku rutonde rw’abafashwa na gahunda ya VUP ariko bikaba byaranze bitewe n’uko nta ndangamuntu agira, kandi abafashwa n’iyi gahunda byarasabaga ko baba bafite indangamuntu. Gusa yemeje ko ubu muri VUP bemeye ko abantu nk’aba bajya bafashwa n’iyo baba nta ndangamuntu bafite, muri gahunda itaha nawe akaba agomba gushyirwa ku rutonde rw’abazafashwa.

Ni uku Bushishi afunga icyumba aryamamo, ariko amaze igihe abarwa nk’uwifashije

Aha ni mu gice Bushishi abikamo ibintu mu nzu ye, bigaragara ko atabayeho nk’umuntu wifashije

Nyuma y’inkuru ikinyamakuru Ukwezi.com cyari cyakoze muri Kanama, umuyobozi w’akarere ka Kamonyi, Udahemuka Aimable yari yaduhamirije ko Bushishi agiye gufashwa. Ibi bishobora kuba bigiye kuba impamo, kuko ubuyobozi bw’inzego z’ibanze bwafatanyije n’abaturage mu muganda udasanzwe wabaye kuri uyu wa Gatandatu tariki 1 Ukwakira 2016, Bushishi akabasha guhabwa ubufasha bw’ibanze.

Inzu ya Bushishi yasakawe ku bufatanye bw’akagari n’abaturage b’umudugudu wa Kabasanza

Akagari ka Gihara katanze amabati yo gusakara inzu ya Bushishi, abaturage b’umudugudu wa Kabasanza uyu musaza atuyemo nabo biyemeza gukusanya amafaranga no gutanga inkunga y’imbaraga z’amaboko yabo, inzu ye irasakarwa ndetse hemezwa ko abaturage bazakomeza kumuha ubundi bufasha bw’ibanze burimo no kumwubakira ubwiherero.

Bushishi yishimiye igikorwa yakorewe n’abaturage, yizeye ko n’ibindi azabihabwa

Ubuyobozi bw’akagari bwatangaje ko umurenge wa Runda uzatanga inzugi n’amadirishya, iyi nzu ikavugururwa ikazamurikwa bitarenze tariki 15 Ukwakira 2016. Bushishi yishimiye cyane iki gikorwa yakorewe, ashima ubuyobozi bw’inzego z’ibanze n’abaturage bamwibutse.

Hari n’umuturage wahaye ikote Bushishi ngo ye kujya yicwa n’imbeho

Kuba ubuyobozi bwaratangiye gufasha Bushishi hasanwa inzu abamo, ni ikimenyetso ko ubuyobozi bw’akarere ka Kamonyi bwatangiye inzira yo gufasha uyu musaza nk’uko Meya w’aka karere Udahemuka Aimable, yari yabwiye Ukwezi.com ko ikibazo cye kigomba kwitabwaho.

REBA HANO VIDEO NGUFI Y’IKIGANIRO TWAGIRANYE NA BUSHISHI MURI KANAMA:

KANDA HANO UREBE VIDEOS UTASANGA AHANDI