Diplomes za Kaminuza y’u Rwanda ziva mu mahanga, iyo uyitaye uririmba urwo ubonye

Chief Editor | 30-09-2016
Diplomes za Kaminuza y’u Rwanda ziva mu mahanga, iyo uyitaye uririmba urwo ubonye

Impamyabumenyi za Kaminuza y’u Rwanda mu mashami yose ari hirya no hino mu gihugu, kugeza ubu zikoreshwa hanze y’u Rwanda, ibyo bigatuma iyo uwarangije muri iyi Kaminuza ataye impamyabumenyi (Diplome) bimusaba gutegereza ko abanyeshuri bari mu mwaka wa nyuma bazahabwa impamyabumenyi zabo, kuko ubuyobozi bw’iyi Kaminuza butakoresha impamyabumenyi y’umuntu umwe hanze y’igihugu.

Nk’uko byatangajwe na Micomyiza Jean Baptiste ushinzwe itangazamakuru muri Kaminuza y’u Rwanda, kugeza ubu umunyeshuri wese warangije mu cyahoze ari KIST, KIE, KHI, SFB, UPU, Kavumu College of Education, Rukara College of Education kimwe n’abarangije byaramaze kuba UR (University of Rwanda).

Abinyujije ku mbuga nkoranyambaga, Micomyiza Jean Baptiste yagize ati: "Abarangije mu mashuri makuru agize UR y’iki gihe, ni ukuvuga SFB, KIST, KHI, NUR, KIE, ISAE, UPU n’andi ndetse n’abarangije byarabaye UR, nyabuneka ni ukubika kure diplomes zanyu kuko iyo ibuze urindira ko iyawe ikorerwa rimwe n’iz’abazagira graduation itaha. Nk’ubu uwayita yazasaba hanyuma bakamuha diplome hamwe n’abazagira graduation mu kwezi kwa Kanama 2017 kuko UR izikoresha hanze y’u Rwanda, ntiyakoresha commande y’akantu kamwe kamwe."

Ibi ariko hari benshi bagaragaje ko batabyumva, kuko u Rwanda ruri muri gahunda yo gushyigikira ibikorerwa imbere mu gihugu, hakibazwa impamvu Kaminuza y’u Rwanda yo idashyigikira "Made in Rwanda" nk’uko bigenda ku bindi bigo na za Minisiteri bishyigikiye ko himakazwa cyane ibintu bikorwa n’u Rwanda.

KANDA HANO UREBE VIDEOS UTASANGA AHANDI