AMAKURU

UKWEZI

Diyosezi ya Kabgayi noneho yemeye ko yateguriye Yubile abapadiri barimo abakoze Jenoside

Diyosezi ya Kabgayi noneho yemeye ko yateguriye Yubile abapadiri barimo abakoze Jenoside
6-07-2016 | By Chief Editor | Yasomwe n'abantu 5071 | Ibitekerezo 14

Diyosezi ya Kabgayi muri Kiliziya Gaturika, yashyize yemera ko ari yo yasohoye ubutumire bw’ibirori bizaba tariki 16 Nyakanga ubwo abapadiri 8 bo muri iyi Diyosezi bazakorerwa Yubile y’imyaka 25 bamaze bahawe ubusaseridoti, muri bo hakaba harimo babiri bahamwe n’ibyaha bya Jenoside.

Mu minsi ishize, nibwo Umuryango IBUKA urengera inyungu z’abarokotse Jenoside yakorewe abatutsi n’imiryango iwugize, watangaje ko wababajwe cyane n’icyemezo cyafashwe na diyoseze ya Kabgayi cyo kuba bateganya gukorera Yubile abapadiri bahamwe n’ibyaha bya Jenoside.

Abo ni Padiri Rukundo Emmanuel wahamijwe ibyaha bya Jenoside n’urukiko mpuzamahanga mpanabyaha rwa Arusha, agakatirwa ibifungo cy’imyaka 23, bimwe mu byaba byamuhamye hakaba harimo gusambanya abagore n’abakobwa b’abatutsikazi ku gahato no gufatanya n’Interahamwe kwica abatutsi, no kwicisha mugenzi we Padiri Mbuguje Alphonse. Undi ni Padiri Ndagijimana Joseph wahamwe n’ibyaha bya Jenoside akaba yarakatiwe igifungo cya burundu n’inkiko z’u Rwanda.

Ibi IBUKA yabivugaga, ihereye ku butumire bwari bwasakajwe ahantu hatandukanye, ariko Musenyeri Smaragde Mbonyintege uyobora diyosezi ya Kabgayi yari yavuze ko atazi aho ubu butumire bwavuye, ndetse ko ntabwo diyosezi ayobora yigeze isohora.

Ubu butumire noneho Diyosezi ya Kabgayi yemeye ko ari yo yabutanze

Musenyeri Smaragde Mbonyintege wari umaze iminsi atari mu Rwanda, mu kiganiro yagiranye n’ikinyamakuru Ukwezi.com yashimangiye ko ubwo yagarukaga mu gihugu yamenye ko ubutumire bwasakajwe bwatanzwe koko n’umwe mu bapadiri ba Diyosezi ya Kabgayi abereye ubuyobozi, kandi koko Yubile ikaba izizihizwa. Ntavuga izina ry’uwo mupadiri, ariko agaragaza ko n’ubwo abo bapadiri bahamwe n’ibyaha bya Jenoside, ari ababo kandi badashobora kubakura mu mitwe yabo.

Musenyeri Mbonyintege ati: "Bari muri gereza barafunze, turakora Yubile rero y’ubusaseridoti, ni ukuvuga gushimira Imana no gusaba imbabazi. Gushimira Imana ku byakozwe (byiza) no gusaba imbabazi z’ibyaha byakozwe. Ibyo rero ntabwo bisaba ko agomba (ufunzwe) kuza kwicara hariya, ariko ni amateka nawe yarabuhawe, ari mu bapadiri bacu... Nonese dushobora kwibagirwa tukabakura mu mutwe wacu? Ni abantu bacu, n’ubwo ari babi ariko ni abacu. Nk’uko ari ab’igihugu, ni nk’uko ari n’aba Kiliziya."

JPEG - 129.4 kb

Musenyeri Smaragde Mbonyintege, avuga ko abantu bakwiye gusobanukirwa ko isakaramentu ry’ubupadiri (ubusaseridoti), ntawe ushobora kurikuraho n’iyo umupadiri yaba yahemutse. Aha agira ati: "Iwacu, ubusaseridoti ni isakaramentu, ni kimwe n’iryo gushyingirwa, ntabwo ari amasakaramentu uvuga ngo urayakuraho. Ahubwo iyo umusaseridoti yahemutse bamuhagarika ku mirimo yose yashoboraga gukora ariko ntibavuga ko bamukuye ku bupadiri ahubwo bavuga ko bamuhagaritse."

Musenyeri Smaragde avuga kandi ko iyi ari gahunda ndende izafasha abazayitabira, we ubwe akaba azafata umwanya wo gusaba imbabazi ku byabaye birimo no kuba hari abapadiri bakoze Jenoside, ibi akazabikora nk’uko umubyeyi asaba imbabazi z’ibyakozwe n’umwana we.

Gusa ku rundi ruhande, Umuryango IBUKA uherutse gutangaza ko usanga icyemezo cyo guha icyubahiro aba bapadiri binyuze muri Yubile kigaragaramo ibintu bibabaje birimo gupfobya no guhakana Jenoside yakorewe abatutsi, gushinyagurira abarokotse jenoside yakorewe abatutsi cyane cyane abahekuwe n’aba bapadiri, gutesha agaciro ibyemezo by’ubutabera no gushyigikira umuco wo kudahana waranze amateka mabi u Rwanda rwanyuzemo.


Tanga Igitekerezo
Ibitekerezo 14
Damascus Kuya 12-07-2016

Nyamara dukwiye kugera ikirenge mû cya Yezu. tukiga kubabarira no kutabika inzika

.bariya Niba barakoze ibyaha ntibikuraho KO ari abavandimwe bacu
ese uwakoze kiriya cyaha atari padiri umuryango avukamo uramujugunya ntumutekereze ntumusure ?

niba avukana n’impanga ye iyo ikorewe anniversaire uwakoze icyaha ntavugwa muri ibyo BIRORI
.kubwanjye niyo yaba yarapfuye namwibuka.

nta kosa mbona kiliziya yakoze

HABIHIRWE Noel Kuya 11-07-2016

Erega buriya UHORAHO wenyine niwe ufite ububasha bwose kubo yaremye.

HABIHIRWE Noel Kuya 11-07-2016

Erega buriya UHORAHO wenyine niwe ufite ububasha bwose kubo yaremye.

serugarukiramfizi Kuya 9-07-2016

Ubwo se murashaka kuvuga ko n’amazina bahawe babatizwa bayakwa?
Ahubwo na leta y,urwanda ihite ibakura Kurutonde rrw’abaturage b’urwanda

Jambo Kuya 8-07-2016

Bavandimwe Imana ni yo isuzuma imitima.ntimuzi se ko Dismasi Yezu yamukirije ku musaraba.bariya bavandimwe babiri niba aribo babi kurenza tubature Yezu we uhindura ibyaha byumutuku urwererane aho kubacira urubanza.Kamami Gratien nzi neza ko uhagaze ariko uritonde utagwa.kristu yezu wadusangizaga ijambo rye ni umunyambabazi nawe ba umunyampuhwe.twese dusabirane kuzaronka ibyiza byijuru

Jambo Kuya 8-07-2016

Bavandimwe ntitugace urubanza natwe tutazarucibwa.Imana niyo isuzuma imitima ntimuzi se ko na Dismasi yakirijwe ku musaraba?niba bariya bavandimwe 2 aribo baterashozi mu maso y’Imana tubature kristu we ushobora gufata ibyaha by’umutuku akabihindura urwererane.niba wibwira ko uhagaze uritonde utagwa.Imana iduhe kunga ubumwe no kurangamira twese ibyiza by’ijuru bitari iby’iyi si y’igicagate.

kabindi Kuya 8-07-2016

ariko rero,dukwiye gutekereza cyane. Padiri Edouard Nturiye wakatiwe ahamwe n’ibyaha bya jenocide yagaragaye asoma missa hamwe na musenyeli wa nyundo! none,aba nabo,kabgayi iti "yubile"! ejobundi se,kiliziya niyifuza ko bafungurwa,bizacura iki???!!
ngewe,ndabonamo ikindi kintu da!

rutagengwa Kuya 8-07-2016

kiliziya yacu tuyiri inyuma,nemerako mu nyigisho zayo nta ngengabitekerezo ya genocide irimo(doctrine de l’eglise catholique) mujye muvuga ibyo muzi kandi musobanukiwe kandi nti mukitiranye ibikorwa by’umuntu ku giti cye n’inyigisho za kiliziya!emmotion zacu zitandukanywe no gukurikiza amategeko,kiliziya ndayemera kandi nzayigwa inyuma nta n’icyo wakora ngo uyimvanemo! Msgr Smaragde oyeeeeeeeeeeeeee!!!!!!!!

willy Kuya 8-07-2016

Musenyeri, yabuze uko abigira kandi yarabiteguye, ariko ushobora ute gusangiza ute aba genocideri nabantu bazima kumeza, ndumiwe, uziko batazi, icyaha bakoze, niba aribo bateguriwe yubiri, nihagarare, kuko twanze agasuzuguro, kabo, ntasoni, abicanyi kweri

rwanda Kuya 7-07-2016

Ariko uziko Simaragide atagira isoni!!bariya ba jenosideri ubakorera yubire se buriya wibwira ko imitima yabo itakinangiye!buriya amaraso ni mabi kuburyo wasanga barapfuye bahagaze ikindi ni ukudukora mu nkovu rwose!ndaboba igisigaye ari ukuzabazana bakajya banasoma Misa!ibi birababaje pe!

rwanda Kuya 7-07-2016

Ariko uziko Simaragide atagira isoni!!bariya ba jenosideri ubakorera yubire se buriya wibwira ko imitima yabo itakinangiye!buriya amaraso ni mabi kuburyo wasanga barapfuye bahagaze ikindi ni ukudukora mu nkovu rwose!ndaboba igisigaye ari ukuzabazana bakajya banasoma Misa!ibi birababaje pe!

faustin Kuya 7-07-2016

ark namwe muremereza ibintu cyane! kweli musenyeri yabisobanuye neza impamvu yatumye nabo bari kuri list ubwose bivuzeko ari ugupfobya genocide?ewana ntabwo bizoroha!

vicky Kuya 7-07-2016

ariko gushinja idini ngo rifite ingengabitekerezo byaba ari ukwirengagiza gukomeye ko nziko abayobozi benshi bo muri Leta arimwo basengera se tuvuge ko bigishwa ingengabitekerezo ya jenoside ikindi ko ritabaza ubwoko abayoboke baryo ni gute umuntu yagira ingengabitekerezo yo kurimbura ubwoko bwe RWOSE IRI JAMBO NI DUKOMEZA KURIKORESHA NABI RIZATAKAZA AGACIRO KARYO KANDI BYAZATUGOORA KUBISUBIZA MU MURONGO

John Kuya 7-07-2016

Kiriziya Gatorika iranze ibaye inkoramaraso, ntakwicuza. Ubahaye amahirwe ejo bakongera.
Twakwigaragambije? Tubyange, burya sibuno, si 1994.

IGURIRE
IBARUWA ZA JORIJI
URUKUNDO
INKURU ZIKUNZWE
IBIRORI
Ibitekerezo
IZINDI NKURU WASOMA