Hari umwana wa Minisitiri wajyanywe i Gikondo mu babaswe n’ibiyobyabwenge

Chief Editor | 1-07-2016
Hari umwana wa Minisitiri wajyanywe i Gikondo mu babaswe n’ibiyobyabwenge

Nk’uko byemejwe na Minisitiri w’ubutabera mu Rwanda akaba n’intumwa nkuru ya Leta, Johnston Busingye, abana bashyirwa mu bigo ngororamuco kubera ko babaswe n’ibiyobyabwenge, si abana b’abantu boroheje kuko hari n’umwana wa Minisitiri yatunguwe no kubona mu bajyanywe mu kigo kiri i Gikondo.

Ibi byavugiwe mu ngoro y’Inteko Ishinga Amategeko y’u Rwanda, ahari habereye ikiganiro nyunguranabitekerezo cyari kigamije gushakira umuti ikibazo cy’ibiyobyabwenge, ibisindisha n’icuruzwa ry’abantu byibasiye urubyiruko, hamwe n’isano bifitanye n’ihohoterwa rishingiye ku gitsina.

Ni ikiganiro cyarimo abayobozi mu nzego za Leta zinyuranye, barimo umuyobozi mukuru wa Polisi y’u Rwanda, IGP Emmanuel Gasana n’abandi bapolisi bakuru, Minisitiri w’Uburinganire n’Iterambere ry’Umuryango, Dr Diane Gashumba, Minisitiri w’Ubutegetsi bw’igihugu, Francis Kaboneka, abahagarariye Inteko Ishinga Amategeko mu mitwe yombi, Minisitiri Mussa Fazil Harerimana w’umutekano w’imbere mu gihugu n’abandi biyemeje gushakira hamwe umuti w’ibibazo byica ahazaza h’urubyiruko rw’u Rwanda.

Ubwo yafataga ijambo, Minisitiri Busingye yavuze ko ibiyobyabwenge bitibasiye abana b’inzererezi bo ku rwego ruciriritse gusa nk’uko benshi bashobora kubyibwira, nyamara hari n’abana b’abayobozi babinywa. Yavuze ko hari abana yabonye batanga ubuhamya ko bajyanywe kugororerwa Iwawa bavuye mu mahanga aho bigaga, ikirenze kuri ibyo akaba aherutse kubona umwana wa Minisitiri i Gikondo mu kigo kigororerwamo inzererezi n’ababaye imbata z’ibiyobyabwenge.

Yavuze ko igitabo cy’amategeko ahana ibyaha mu Rwanda kirimo kuvugururwa, abacuruza n’abanywa ibiyobyabwenge bakazateganyirizwa ibihano bikomeye byagira uruhare mu gutuma ababikora babireka.

Muri iyi nama, abayobozi bose biyemeje gukaza ingamba zo guhashya ibiyobyabwenge, ibisindisha n’icuruzwa ry’abantu bafatanyirije hamwe, ibi bikaba byanagira uruhare mu kugabanya ikibazo cy’ihohoterwa rishingiye ku gitsina.

KANDA HANO UREBE VIDEOS UTASANGA AHANDI