Ibibazo 5 kuri Perezida Paul Kagame n’ibisubizo byabyo

Chief Editor | 17-05-2016
Ibibazo 5 kuri Perezida Paul Kagame n’ibisubizo byabyo

Hari ibibazo buri wese ashobora kwibaza kuri Perezida wa Repubulika y’u Rwanda, Paul Kagame, ndetse buri wese abonye umwanya akaba yagira icyo amwibariza ku bijyanye n’ahashize, mu gihe cy’ubu ndetse n’igenamigambi ry’ahazaza. Muri iyi nkuru, turabagezaho ibibazo 5 byabajijwe Perezida Kagame nyuma y’inama mpuzamahanga ku bukungu yaberaga i Kigali.

Ibi bibazo ndetse n’ibisubizo byabyo, Perezida Kagame yabibajijwe mu rurimi rw’icyongereza anabisubiza n’ubundi muri urwo rurimi, ariko tukaba twagerageje kubibashyirira mu kinyarwanda.

1. Ni ikihe cyerecyezo cyawe kuri Afurika mu myaka 50 iri imbere?

Imyaka 50 ni myinshi cyane. Afurika igomba gukorera hamwe bakanunganirana bagafashanya. Dufite mu by’ukuri abakozi beza bafite ubushobozi tutarimo kubyaza umusaruro. Biragaragara ko barimo gukorera ibindi bice by’isi kuruta uko bakorera Afurika, tugomba guteza imbere Afurika hanyuma tukabona kugirana ubufatanye n’abandi.

2. Ni ryari twakwitega ko u Rwanda ruzatangira ku mugaragaro ikoreshwa rya gari ya moshi?

Twizera ko ari vuba. Turimo gukorana n’abaturanyi bacu bo mu bindi bihugu byo mu karere. Inyigo zamaze gukorwa ndetse n’amafaranga arimo gukusanywa, ndetse ubushobozi bumwe bwamaze kuboneka. Mu gihe cy’umwaka umwe, tuzaba dushobora gutangira.

3. Ni gute ibyabaye mu Rwanda byafasha mu kwirinda Jenoside aho ari ho hose ku isi?

Byagerwaho binyuze mu kuvuga amateka uko ari, harebwa ibyabizanye ndetse n’uburyo twabashije kwikura muri ibyo bihe bibi. Byagerwaho kandi hubakwa umuryango mugari uhamye kandi buri wese yibonamo, hanyuma hakimakazwa politiki ishyira mu gaciro igakora ibikwiye, ikarwanya imvugo zibiba urwango n’irindi vangura mu baturage. Abaturage kandi bagomba gufashwa kwigirira icyizere no gutegura ejo habo heza, buri wese aha agaciro mugenzi we.

4. Ni ibiki byari biguteye ubwoba cyane mu gihe cya Jenoside yo mu 1994? Ni iki cyaguteraga imbaraga?

Ibyo mu 1994 byari bibi cyane kuburyo byabaye ngomba ko ubwoba budushiramo. Ntabwo twari tugifite ubwoba bw’icyo ari cyo cyose, kuko n’ubundi twari habi cyane. Twagombaga kwitanga twese tukagerageza tugakora ibyo twashoboraga byose nk’abantu. Twahagaritse ibyo gukoreshwa n’ubwoba, twari duhuze cyane turwana n’ibyari birimo kuba... Ahubwo ubwo Jenoside yari ihagaze, nibwo twatangiye kugira impungenge z’ibintu bimwe na bimwe, twibaza uko buri kintu tugiye kugishyira mu mwanya wacyo n’ibindi nk’ibyo... Iyo abantu barimo kubaho mu buzima bakagombye kubamo, nibwo ubwoba n’impungenge bitangira kugaruka, ukibaza uti ni iki ngiye gukora kugirango ubuzima burusheho kumera neza?

Naho inkomoko y’imbaraga, yari icyo twari twizeye cy’uko igisubizo kigomba kuva muri twe. Nta kindi cyari gutekerezwa, icyo gitutu cyo kumva ko nta kindi gisubizo cyari gihari, cyunganirwaga no kubona hari intambwe turimo gutera, bigatuma tubona ko bishoboka gukomeza tujya imbere. Kubona umusaruro w’ibyo urimo gukora bigufasha gukomerezaho bikanaguha imbaraga zisumbuyeho.

5. Ni ikihe cyifuzo cyawe ku bakiri bato?

Abakiri bato bagomba kumenya ko kugira icyo wikorera cyangwa icyo ukorera umuryango mugari ukomokamo, bitangira kare. Ntabwo mugomba gutegereza ikindi gihe ngo bizabe ari bwo bikorwa. Hari ibintu byinshi bishobora kuyobya abakiri bato, bikababuza gukora ibyo bakwiye kwikorera no gukorera umuryango mugari bakomokamo. Mu gihe cy’ubusore, baba bashobora gutakaza igihe mu buryo bworoshye. Icyifuzo cyanjye kuri bo, ni uko bagira igihe cyo gukina no kwishima ariko nanone bakagira igihe cyo gutekereza ku bifite agaciro, kandi ntibazuyaze gukurikira icyabagirira akamaro.

KANDA HANO UREBE VIDEOS UTASANGA AHANDI