Ibibazo 9 kuri Perezida Paul Kagame n’ibisubizo byabyo

Chief Editor | 3-09-2016
Ibibazo 9 kuri Perezida Paul Kagame n’ibisubizo byabyo

Perezida Paul Kagame, ni umwe mu banyepolitiki ku isi no muri Afurika by’umwihariko, bazwiho gusubiza ibibazo babazwa mu buryo butangarirwa cyane, abatari bacye bakabona ibisubizo bye mo ubwenge, kurasa ku ntego no kuvugisha ukuri kwa ngombwa ntacyo aciye ku ruhande. Muri iyi nkuru, turabagezaho ibibazo 9 yagiye abazwa n’ibisubizo yatanze.

JPEG - 46 kb

Ibi bibazo n’ibisubizo byabyo tugiye kubagezaho, ni ibyo Perezida Paul Kagame yabajijwe n’ibitangazamakuru bitandukanye, hakaba higanjemo ibyo yabajijwe na Jeune Afrique mu minsi yatambutse ndetse n’ibyo yabajijwe n’abategura inama mpuzamahanga yiga ku bukungu (World Economic Forum).

1. Buri gihe umunyarwanda uzwi iyo apfuye, mu gihugu no hanze yacyo ni wowe uhita ushyirwa mu majwi. Ibiheruka ni uwahoze ari umuganga wawe Dr Emmanuel Gasakure cyangwa umunyemari Assinapol Rwigara. Ibi ntibimaze kukurambira?

Byaba bimaze kundambira cyangwa bitarandambira, utekereza ko hari icyo byahindura? Abo bakwirakwiza ubwo busazi bazi impamvu babikora, n’impamvu bakomeza kubikora, ibyo ni ugusenya, guhungabanya no gutuma abantu bumva ko mu Rwanda nta muntu ushobora gupfa urupfu rusanzwe. Ibyo byose ntacyo bimariye... Nta gihe mfite nta n’ubushake bwo gutekereza kuri ibyo.

2. Imiryango Itegamiye kuri Leta n’abaharanira ubwisanzure batangaje ko batewe impungenge n’ubwisanzure bw’abaturage muri politike no mu gutanga ibitekerezo mu Rwanda. Hari icyo wavuga kuri ibyo batangaje?

Nzagira icyo mbivugaho igihe bazatangira gukoresha amategeko n’amahame nk’ayo mu bihugu byabo. Niba urugero, umwirabura w’umunyamerika yiciwe ku muhanda wo mu mujyi kuko adafite ibara ry’uruhu runaka, bazabaza Perezida w’icyo gihugu nk’uko biha uburenganzira bwo kungerakaho njyewe ubwanjye icyo aricyo cyose. Nzabiha agaciro, igihe iyo miryango, izo nzego n’ibyo binyamakuru bazahindura uburyo bavuga bakareka guhora bandika ibintu bimwe nk’aho nta kintu na kimwe gihinduka mu Rwanda muri iyi myaka isaga 20 ishize.

Hagati aho, akazi kanjye ni ukuyobora igihugu cyanjye neza uko mbishoboye. Umunsi Abanyarwanda bazumva ko nakoze nabi, bazaba bafite uburenganzira bwo kunenga, ibitekerezo byabo nibyo bifite agaciro mu maso yanjye. Ubu mu gihe iyo miryango igaragaza ikigero cy’ubwisanzure buri mu Rwanda, babikora bashingiye ku gisobanuro kitari nyacyo cy’ubwisanzure ibihugu byo mu Burengerazuba bitanga bigamije ikindi kintu... Kuri twe Abanyarwanda, nta bwisanzure bwabaho mu gihe nta bwisanzure bwo kubona ubuvuzi bwiza, uburezi, ibyo kurya n’amashanyarazi; nta bwisanzure bwabaho hatari uburinganire hagati y’abagabo n’abagore. Aho ntabwo twakumvikana.

3. Ubwisanzure mu kuvuga no gutanga ibitekerezo, mu by’ukuri mu Rwanda burahari?

Mpura n’abantu babarirwa mu bihumbi icumi mu manama nkora hirya no hino mu gihugu. Mu gihe cy’amasaha menshi, abaturage baravuga nanjye nkabatega amatwi. Banenga abayobozi babo, bavuga ku baturanyi babo, ibibazo n’impungenge zabo, bakisobanura hanyuma ngafata imyanzuro. Ibyo ni iki niba atari ubwisanzure mu kuvuga no gutanga ibitekerezo?

4. Ariko ngo ubwisanzure ntiburagerwaho nk’uko bigaragazwa n’umuryango w’abanyamakuru batagira umupaka na Komite ishinzwe kurengera Abanyamakuru, ngo itangazamakuru riranigwa?

Ibi ni ibyo bavuga ku bushake birengagiza ibimenyetso bifatika. Ntibasoma ibinyamakuru byacu, ntibumva amaradiyo yacu yigenga. Iyaba koko barakoze akazi kabo, bari kubona ko ahubwo igitandukanye n’ibyo bavuga, muri iki gihugu dushobora kunenga Guverinoma ndetse bakananenga Kagame ntibafungwe. Amategeko yacu ntahana abanenga, ahana gusa abatukana, abaharabika, ababiba urwango n’abamamaza Jenoside. Ni nk’ahandi hose bafite Demokarasi.

5. Ni gute ibyabaye mu Rwanda byafasha mu kwirinda Jenoside aho ari ho hose ku isi?

Byagerwaho binyuze mu kuvuga amateka uko ari, harebwa ibyabizanye ndetse n’uburyo twabashije kwikura muri ibyo bihe bibi. Byagerwaho kandi hubakwa umuryango mugari uhamye kandi buri wese yibonamo, hanyuma hakimakazwa politiki ishyira mu gaciro igakora ibikwiye, ikarwanya imvugo zibiba urwango n’irindi vangura mu baturage. Abaturage kandi bagomba gufashwa kwigirira icyizere no gutegura ejo habo heza, buri wese aha agaciro mugenzi we.

6. Ni ibiki byari biguteye ubwoba cyane mu gihe cya Jenoside yo mu 1994? Ni iki cyaguteraga imbaraga?

Ibyo mu 1994 byari bibi cyane kuburyo byabaye ngomba ko ubwoba budushiramo. Ntabwo twari tugifite ubwoba bw’icyo ari cyo cyose, kuko n’ubundi twari habi cyane. Twagombaga kwitanga twese tukagerageza tugakora ibyo twashoboraga byose nk’abantu. Twahagaritse ibyo gukoreshwa n’ubwoba, twari duhuze cyane turwana n’ibyari birimo kuba... Ahubwo ubwo Jenoside yari ihagaze, nibwo twatangiye kugira impungenge z’ibintu bimwe na bimwe, twibaza uko buri kintu tugiye kugishyira mu mwanya wacyo n’ibindi nk’ibyo... Iyo abantu barimo kubaho mu buzima bakagombye kubamo, nibwo ubwoba n’impungenge bitangira kugaruka, ukibaza uti ni iki ngiye gukora kugirango ubuzima burusheho kumera neza?

Naho inkomoko y’imbaraga, yari icyo twari twizeye cy’uko igisubizo kigomba kuva muri twe. Nta kindi cyari gutekerezwa, icyo gitutu cyo kumva ko nta kindi gisubizo cyari gihari, cyunganirwaga no kubona hari intambwe turimo gutera, bigatuma tubona ko bishoboka gukomeza tujya imbere. Kubona umusaruro w’ibyo urimo gukora bigufasha gukomerezaho bikanaguha imbaraga zisumbuyeho.

7. Ni ikihe cyifuzo cyawe ku bakiri bato?

Abakiri bato bagomba kumenya ko kugira icyo wikorera cyangwa icyo ukorera umuryango mugari ukomokamo, bitangira kare. Ntabwo mugomba gutegereza ikindi gihe ngo bizabe ari bwo bikorwa. Hari ibintu byinshi bishobora kuyobya abakiri bato, bikababuza gukora ibyo bakwiye kwikorera no gukorera umuryango mugari bakomokamo. Mu gihe cy’ubusore, baba bashobora gutakaza igihe mu buryo bworoshye. Icyifuzo cyanjye kuri bo, ni uko bagira igihe cyo gukina no kwishima ariko nanone bakagira igihe cyo gutekereza ku bifite agaciro, kandi ntibazuyaze gukurikira icyabagirira akamaro.

8. Wowe ubwawe wifata nk’umunyembaraga, umuyobozi ushyize imbere imibereho y’abaturage cyangwa ibyo byombi icyarimwe?

Ndi umugabo utanga ubuzima bwe kubera impamvu y’abaturage be n’igihugu cye. Sindi umuntu usuzuguritse yego, ndabyemera. Ku bindi bisigaye, wanyita uko ushaka, ushobora no kutampa agaciro, ntacyo bintwaye.

9. Ninde muntu ufata nk’icyitegererezo (role model) mu buzima bwawe?

Nagiye nigira ku bintu bitandukanye kuruta uko nigira ku bantu bihariye ku giti cyabo. Ariko, hari abantu b’ibihangange, mu bice bitandukanye by’isi. Ubona hari abantu b’igitangaza bakoze ibintu byiza, bikagira impinduka ku batuye isi bose. Gusa njye nigira ku bintu biba birimo kuba (cyangwa ibyabaye), ibibazo bibaho n’uburyo bishakirwa ibisubizo, aho gukora ibintu nigana gusa umuntu umwe runaka.

KANDA HANO UREBE VIDEOS UTASANGA AHANDI