Ibintu 3 bitangaje ukwiye kumenya ku mwami Kigeli waguye muri Amerika

Chief Editor | 19-10-2016
Ibintu 3 bitangaje ukwiye kumenya ku mwami Kigeli waguye muri Amerika

Tariki 16 Ukwakira 2016 ku masaha yo muri Leta Zunze Ubumwe za Amerika, bikaba tariki 17 Ukwakira 2016 ku masaha y’i Kigali, nibwo Umwami Kigeli V Ndahindurwa yatanze, agwa muri Leta Zunze Ubumwe za Amerika aho yari amaze igihe ari mu buhungiro.

Umwami Kigeli V Ndahindurwa, ni umwami ufite byinshi yihariye mu mateka y’u Rwanda no mu mateka y’ingoma ya cyami by’umwihariko. Niwe mwami wabaye mu buhungiro igihe kirekire, niwe mwami w’u Rwanda wabonye igihugu cye kiyoborwa n’ubundi butegetsi butari ubwa cyami, kandi ninawe mwami wabonye amahano ya Jenoside yagwiriye u Rwanda. Niwe mwami wize akanamenya indimi nyinshi z’amahanga, akaba ari nawe mwami wabayeho mu buzima bw’igihe kigezweho. Muri byinshi yihariye ariko, hari ibintu 3 byihariye kuri uyu mwami tugiye kugarukaho muri iyi nkuru.

1. Umwami Kigeli yahunze igihugu nka Se kandi bombi baguye mu buhingiro

Mu mwaka w’1944, Yuhi V Musinga, Se wa Ndahindurwa Jean Baptiste waje kwitwa Kigeli V, yaguye mu buhungiro nyuma yo guhirikwa n’ababiligi agasimburwa ku ngoma na Mutara III Rudahigwa. Icyo gihe Musinga atanga, Ndahindurwa yari umwana muto w’imyaka 8 gusa y’amavuko.

Nyuma y’urupfu rutunguranye rw’umwami Mutara III Rudahigwa, Jean Baptiste yahise yimikwa aba umwami w’u Rwanda, ahita afata izina rya Kigeli V Ndahindurwa. Icyo gihe yari akiri umusore muto w’imyaka 23 y’amavuko. Yabaye umwami kuva tariki 25 Nyakanga 1959, kugeza tariki 28 Mutarama 1961, ubwo yahirikanwaga n’ingoma ya cyami, muri kudeta bamukoreye bahengereye yagiye i Kinshasa aho yagombaga kubonana n’Umunyamabanga mukuru w’Umuryango w’Abibumbye, maze Mbonyumutwa Dominique afatanyije n’agatsiko ke ndetse banashyigikiwe n’abakoloni b’ababiligi, bamuvana ku ngoma bahita banasezerera burundu ingoma ya cyami maze hakimikwa ubutegetsi bushingiye kuri Repubulika.

Kigeli V Ndahindurwa yahise ahungira mu cyahoze ari Tanganyika (Tanzania y’ubu), aho yabaga mu mujyi wa Dar Es Salaam. Nyuma yanabaye i Kampala n’i Nairobi, nyuma aza guhungira muri Leta Zunze Ubumwe za Amerika ari naho yaguye, nawe aba aguye mu mahanga yarahunze nka Se.

2. Umwami Kigeli yari afite imyaka 80 akiri ingaragu

Ku myaka 80 y’amavuko, Umwami Kigeli yarinze atabaruka akiri ingaragu, bitewe n’uko yanze gushakira umugore mu mahanga kuko ngo byari gukururira u Rwanda ibyago bikomeye. Pasiteri Ezra Mpyisi ufite ubunararibonye mu by’amateka y’u Rwanda n’iby’ingoma ya cyami by’umwihariko, kuko yari n’umujyanama w’umwami Mutara III Rudahigwa wasimbuwe n’uyu Kigeli V Ndahindurwa, mu mezi ashize yabwiye ikinyamakuru Ukwezi.com ko kuva cyera cyaziraga ko umwami yashaka umugore ari mu mahanga, ibyo bikaba ari nabyo byatumye Kigeli V Ndahindurwa yemera kugira imyaka 80 ari ingaragu kuko iyo ashaka ngo byari gukururira u Rwanda ibyago bikomeye cyane.

3. Umwami Kigeli yari amaze igihe afashe icyemezo cyo kuzagwa mu mahanga

Kuva inkuru y’urupfu rwa Kigeli yatangira kuvugwa, abantu benshi batinze ku kuba yaraguye mu mahanga, nyamara ibi ni ibintu yari amaze igihe afasheho icyemezo ubwe, akiyemeza ko atazagwa mu Rwanda. Tariki 26 Nyakanga 2016, Pasiteri Ezra Mpyisi yatangarije ikinyamakuru Ukwezi.com ko kizira cyane kuba umwami yataha mu gihugu ameze nka rubanda kandi yarahunze ari umwami akaba atarigeze anasimburwa, bityo avuga ko yataha ari uko Perezida Paul Kagame azamubera Minisitiri w’Intebe akayobora nk’umunyapolitiki naho Kigeli akibera umwami uganje.

Mpyisi kandi icyo gihe yavuze ko ibyo gutaha yabiganiriye na Kigeli V Ndahindurwa ubwo yamusangaga muri Amerika mu minsi ishize, akamugira inama ebyiri, imwe akayimugira nk’umunyarwanda wubaha umuco na kirazira, indi akayimugira nka Pasiteri. Mpyisi ati: "Namugiriye inama ebyiri ngo yihitiremo. Nka Pasiteri namubwiye ko yakwitahira mu Rwanda kuko nta cyaha kirimo ku Mana, ariko nk’umunyarwanda uzi kandi wubaha iby’umuco mubwira ko yareka akazagwa mu mahanga kuko atashye yaba ahemukiye igihugu nk’umuntu uzi ko kizira gutaha nka rubanda yarahunze ari umwami, hanyuma ndamubwira ngo ahitemo."

JPEG - 85.4 kb

Ezra Mpyisi yagiye agira inama umwami Kigeli V Ndahindurwa

Pasiteri Ezra Mpyisi yavuze ko Kigeli yakomeye cyane ku muco kandi adashaka ko u Rwanda rubona ishyano bitewe nawe, bityo nk’uko yemeye kwibabaza ntashake umugore akaba kugeza ku myaka 80 ari ingaragu, akaba n’ubundi yariyemeje kuzaguma mu mahanga akagwayo aho gutatira igihango.

KANDA HANO UREBE VIDEOS UTASANGA AHANDI