Isano rya Lt Joel Mutabazi n’umunyamakuru waburiwe irengero, ryateye ubwoba umuryango

Chief Editor | 31-08-2016
Isano rya Lt Joel Mutabazi n’umunyamakuru waburiwe irengero, ryateye ubwoba umuryango

Umunyamakuru Ndabarasa John wayoboraga Sana Radio amaze igihe kirenga ibyumweru bitatu aburiwe irengero, ariko umuryango we wagize ubwoba bwo kugeza iki kibazo kuri Polisi y’u Rwanda, kuko uyu munyamakuru ari muramu wa Joel Mutabazi wahoze afite ipeti rya Lieutenant, uyu akaba yarakatiwe gufungwa burundu azira ibyaha bitandukanye birimo iby’iterabwoba n’umugambi wo kugirira nabi igihugu n’umukuru w’igihugu.

Abakoranaga na Ndabarasa John kuri Sana Radio kimwe n’abo mu muryango we, bavuga ko baheruka kumuvugisha mbere ya tariki 7 Kanama 2016 kuva ubwo na telefone ye ikaba itariho kandi batazi aho aherereye. N’ubwo ibyumweru bitatu bishize uyu munyamakuru yaraburiwe irengero, umuryango we ntiwigeze ubimenyesha Polisi y’u Rwanda kuko wagize ubwoba.

JPEG - 288.8 kb

Ndabarasa John asanzwe ari umuhanzi akaba n’umunyamakuru

Gloria Kayitesi ni mushiki wa Ndabarasa John, akaba n’umugore wa Joel Mutabazi wari umusirikare ku ipeti rya Lieutenant ariko akaba yarakatiwe gufungwa burundu no kwamburwa impeta za gisirikare azira ibyaha birimo n’icyo gucura umugambi wo kugirira nabi igihugu n’umukuru w’igihugu. Uyu mugore yabwiye BBC ko umunyamakuru ukorana na Ndabarasa ari we wababwiye ko yamuhamagaye amubwira ko agiye kujya muri Uganda, kandi iyo gahunda bakaba batari bayizi ndetse atajyaga akunda no kujyayo.

Gloria Kayitesi asaba ko abayobozi b’u Rwanda babikurikirana, ariko kandi akavuga ko abo mu muryango we bari mu Rwanda batigeze babimenyesha Polisi kuko bagize ubwoba. Agira ati: "Barabitinye, ni abantu batinye nabo sinzi barahahamutse bitewe ngirango n’ikibazo cyanjye kuko ndi umudamu wa Mutabazi, bagize ubwoba cyane, bagira ubwoba... Mutabazi Joel ni umugabo wanjye. Ubwoba bagira ni nk’ukuntu nyine Mutabazi yagiye abura, ukuntu umuvandimwe [sister] wanjye nawe bamushyize mu rubanza gutyo... Rero nasabaga aho Ndabarasa yaba ari hose, ko inzego za Leta zakurikirana zikamenya aho Ndabarasa yaba ari."

Ku rundi ruhande ariko, ikinyamakuru Ukwezi.com cyavuganye na SP Ndushabandi Jean Marie Vianney ukora mu biro by’umuvugizi wa Polisi y’u Rwanda, adutangariza ko kugirango ikibazo gikurikiranwe hari inzira bicamo kandi bakaba baranahaye uyu muryango inama yo guca muri izo nzira bakageza ikibazo cyabo kuri sitasiyo ya Polisi ibegereye, hanyuma kigakurikiranwa.

SP Ndushabandi kandi, ashimangira ko nta muntu ukwiye gutinya inzego z’umutekano kubera icyaha uwo bafitanye isano yakoze, kuko icyaha ari gatozi kuburyo nta muntu ushobora kuzira icyaha cyakozwe n’undi n’ubwo baba bafitanye isano.

Joel Mutabazi yahanishijwe igifungo cya burundu ndetse no gukurwaho impeta za gisirikare, uyu mwanzuro ukaba warafashwe n’urukiko rukuru rwa gisirikare tariki 3 Ukwakira 2014 nyuma yo gusanga Joel Mutabazi wari ufite ipeti rya Lieutenant ahamwa n’ibyaha byose yaregwaga muri uru rubanza rwitiriwe urw’iterabwoba.

JPEG - 33.4 kb

Ni urubanza rwaregwagamo abantu 16, ibyaha abaregwaga muri bikaba byari birimo iterabwoba, kugambirira kugirira nabi igihugu n’umukuru w’igihugu ndetse no gukorana n’imitwe ifite imigambi mibi ku Rwanda irimo FDLR na RNC, bimwe mu bikorwa bashinjwaga hakaba hari harimo gutera gerenade zagiye zihitana ubuzima bw’abantu mu gihugu.

KANDA HANO UREBE VIDEOS UTASANGA AHANDI