Ishyaka rya Ingabire Victoire ryakamejeje rivuga ko ritinya ko agiye kugwa muri gereza

Chief Editor | 29-07-2016
Ishyaka rya Ingabire Victoire ryakamejeje rivuga ko ritinya ko agiye kugwa muri gereza

FDU-Inkingi, ishyaka ritaremererwa gukorera mu Rwanda kuva ryashingwa na Ingabire Victoire ufungiye muri gereza nkuru ya Kigali izwi nka 1930 kuva mu mwaka wa 2010, ryakamejeje rivuga ko abayobozi b’iyi gereza banze ko uyu mugore ajya kwivuza kandi akaba arembye, kuburyo batinya ko ari uburyo bwo kumwikiza. Ibi ariko, ubuyobozi bwa gereza bugaragaza ko ari ikinyoma kidafite ishingiro.

Mu itangazo iri shyaka ryatangiye gukwirakwizwa tariki 26 Nyakanga 2016, rivuga ko uyu mugore amerewe nabi kandi ishyaka rikaba ryarasabye ko ryajya kumwivuriza ubuyobozi bwa gereza bukabyanga.

Muri iri tangazo bagira bati: "Ishyaka FDU-Inkingi rihangayikishijwe no kubura ubuvuzi kw’imfungwa ya Politiki Madamu Ingabire Victoire Umuhoza, urembye cyane kuva kuwa Gatandatu tariki 24 Nyakanga 2016. Turabibutsa ko iyi mfungwa iba mu buzima burimo isuku itameze neza, kuva aho ashyiriwe mu cyumba rusange kirimo imfungwa zirenga 600. Guhera Kuwa Gatandatu, abayobozi ba gereza ya Kigali 1930 ntacyo bakora ku busabe bwe bwo kujya kwivuza. Uko bihagaze ubu, dushingiye no ku rindi hohoterwa yakorewe mbere, dufite ubwoba ko uku kubuzwa kwivuza ari igikorwa ubutegetsi bushaka gukora ngo bwikize umwanzi wabwo mu bya politiki butiriwe bumurasa. Ubundi guhera kuwa Mbere tariki 25 Nyakanga 2016, ishyaka rye ryasabye ubuyobozi guhabwa uburenganzira bwo kujya kumwivuriza ku mafaranga yaryo niba gereza nta bushobozi ifite ariko birananirana."

Ku rundi ruhande ariko, CIP Sengabo Hillary, umuvugizi w’amagereza mu Rwanda, yabwiye ikinyamakuru Ukwezi.com ko ibivugwa n’iri shyaka nta kuri kubirimo, kuko muri gereza harimo ivuriro riri ku rwego rw’ikigo nderabuzima, imfungwa n’abagororwa bakaba bivurizamo byagaragara ko barembye bakajyanwa mu bitaro bya Muhima cyangwa muri CHUK, ariko by’akarusho Ingabire Victoire we akaba ajya anajyanwa mu bitaro byitiriwe Umwami Faycal bagasuzuma ko ubuzima bwe buhagaze neza.

CIP Hillary, avuga ko Kuwa Gatatu tariki 27 Nyakanga 2016, Ingabire Victoire yivuje mu ivuriro rya gereza ariko akaba yari arwaye bidakomeye. Avuga kandi ko nta rwandiko rusaba ko yajya kuvuzwa n’iryo shyaka bigeze babona, kandi ko n’iyo barubona batabyemera kuko abagororwa bavuzwa na Leta.

KANDA HANO UREBE VIDEOS UTASANGA AHANDI