Kagame yavuze ko abanyuze mu itorero bazasubiramo bagahabwa imyitozo ya gisirikare

Chief Editor | 19-07-2016
Kagame yavuze ko abanyuze mu itorero bazasubiramo bagahabwa imyitozo ya gisirikare

Kuri uyu wa Kabiri tariki Perezida Kagame yagiye i Gabiro mu Karere ka Gatsibo aho yari ajyanywe no gusoza Itorero Indangamirwa icyiciro cya 9 ryitabiriwe n’urubyiruko rw’Abanyarwanda biga mu mahanga n’abiga mu Rwanda 345. Yavuze ko ashaka ko ubutaha abanyuze muri iri torero bazanahabwa imyitozo ya gisirikare

Ubwo yagezaga ijambo kuri aba banyeshuri, Perezida Kagame yabasobanuriye ko itorero riganisha ku kongera uburere kandi uburere bukaba ari ikintu gikomeye kuko bubamo umuco n’imyifatire. Yabasobanuriye uburyo Itorero ari gahunda igihugu gifatanyamo n’ababyeyi kubaha uburere bukwiriye abana b’u Rwanda.

Perezida Kagame ati: "Uburere butandukanye n’uburezi duhabwa mu mashuri. Ni umuco n’imyifatire, byombi biruzuzanya. Itorero ribafasha kutazaba ibigwari, mugahora mufatanya n’abandi mu gukorera no kubaka u Rwanda. Itorero kandi ryabatoje kumenya ubuzima bwanyu, mukamenya ikibaha agaciro nk’abantu n’icyo mushaka kuba. Itorero ridufasha kuba abantu bazima. Tukamenya ko ntawe ubaho wenyine, turabana. Itorero ridufasha gusobanukirwa neza kurushaho icyo tubereyeho. Ibyiza twiyifuriza tukabyifuriza n’abandi. Iyo turangije Itorero, ikiba gisigaye ni ukwiyubakamo ubushobozi tukazamura igihugu tukagiteza imbere. Ubumenyi n’umuco tuvana mu Itorero nibyo bidufasha guha izina n’agaciro igihugu cyacu."

Perezida Kagame yasobanuriye uru rubyiruko ko n’iyo waba ufite ubumenyi, uburere buke butuma ntacyo ubwo bumenyi bukumarira. Yabibukije Umugani Nyarwanda uvuga ngo "umwana apfa mu iterura,", ababwira ko Itorero rifasha mu kwirinda ko ibyo byabaho, rikarinda ko urwo rubyiriko ku myaka yarwo rwakwangirika, rikanafasha kugorora ababa batangiye gutana, ribigisha uburyo bakwiyubaka ubwabo ndetse bakubaka n’igihugu cyabo.

Mu gusoza yababwiye ko abari bafite imico cyangwa imyitwarire idakwiye bayisiga aho, bakagenda ari Intore zibereye u Rwanda. Yaboneyeho kubabwira ko byari ukubasogongeza ku nzira y’uburere ibafasha uko bagenda bakura.

Aha niho yaboneyeho kuvuga ko ubutaha hagomba kuzakorwa m’imyitozo ya gisirikare. Yavuze ko yagize igitekerezo cy’uko ku nshuro ya 10, Indangamirwa zanyuze mu bindi byiciro zashyirwa hamwe, kuko ashaka kuzagabanya ibiganiro, hakongerwa imyitozo ya gisirikare mu buryo butavunanye.

KANDA HANO UREBE VIDEOS UTASANGA AHANDI