Kagame yemeye kongera kwiyamamaza ku bw’abanyarwanda, yima amatwi abo hanze

Chief Editor | 12-05-2016
Kagame yemeye kongera kwiyamamaza ku bw’abanyarwanda, yima amatwi abo hanze

Mu kiganiro ku bufatanye mu iterambere ry’umugabane wa Afurika Perezida Kagame yatanze ari kumwe n’umuherwe Howard Buffet na Tony Blair wahoze ari Minisitiri w’Intebe w’u Bwongereza, umukuru w’igihugu yashimangiye ko kwemera kongera kwiyamamaza, yabyemeye ashingiye ku busabe bw’abanyarwanda akirengagiza abo hanze barimo ababifataga ukundi.

Perezida Kagame yasobanuye ko ubwe atigeze asaba na rimwe kongererwa manda, kandi ko yagiye abwira abanyarwanda mu manama menshi akabereka ko hadakwiye kurebwa gusa ibyo bo batekereza nk’abanyarwanda, ahubwo ko hakwiye kurebwa n’ibyo abandi bo hirya no hino batekereza ku byifuzo by’abanyarwanda, n’ubwo nyuma yaje gusanga adakwiye guha agaciro cyane abo hanze.

Nk’uko Perezida Kagame yabisobanuye, igihe cyaje kugera nyuma yo gutakambirwa n’abanyarwanda bamusaba ko yakomeza kubayobora, asubiza amaso inyuma areba uburyo amahanga yarebereye mu gihe u Rwanda rwari mu mwijima w’ubwicanyi bwa Jenoside yakorewe abatutsi, asanga akwiye kumva ubusabe bw’abanyarwanda akima amatwi abo hanze.

Muri Werurwe 2015, ubwo Perezida Kagame yaganiraga na Jeune Afrique, yari yatangaje ko n’ubundi icyemezo yaramuka afashe abanyamahanga n’abarwanya ubutegetsi bw’u Rwanda batazigera babura ibyo bavuga. Icyo gihe yagize ati: "Umwanzuro wanjye waba umwe cyangwa undi, ntacyo bizahindura. Reka tuvuge ko muri 2017 ntongeye kwiyamamaza, bazavuga ko abaturage banyanze, ko bitari bikinkundiye ko nakomeza, ko nahunze, ko nari mfite ubwoba n’ibindi. Reka tuvuge ko nongeye kwiyamamaza, bazavuga ko ari ikimenyetso... Mu buryo bumwe cyangwa ubundi, abavuga bazakomeza kuvuga kandi bazahora mu bibi gusa, gusa abo ntacyo bavuze. Igifite icyo kivuze ku Banyarwanda ni iterambere ry’imibereho yabo, imiyoborere myiza n’icyerecyezo abayobozi babo bashoboye..."

Ibi koko niko byagenze, kuva Perezida Kagame yashimangira ko azubahiriza ubusabe bw’abanyarwanda agakomeza kubayobora, bimwe mu bihugu by’amahanga ndetse n’abatavuga rumwe na Leta y’u Rwanda, bagiye bagaragaza ko batishimiye iki cyemezo, nyamara we yamaze kugaragaza ko yashingiye ku busabe n’ibyifuzo by’abanyarwanda akima amatwi abandi bo hanze.

KANDA HANO UREBE VIDEOS UTASANGA AHANDI