Kagame yikomye raporo za Loni zishinja u Rwanda gufasha abashaka guhirika Nkurunziza

Chief Editor | 13-05-2016
Kagame yikomye raporo za Loni zishinja u Rwanda gufasha abashaka guhirika Nkurunziza

Perezida wa Repubulika y’u Rwanda, Paul Kagame, yamaganye ibya raporo z’umuryango w’abibumbye zishinja u Rwanda gutera inkunga imitwe ishaka gutera u Burundi igahirika ubutegetsi bwa Perezida Pierre Nkurunziza, yikoma abakora izi raporo ndetse anagira inama abarundi ku cyo bakwiye gukora ku bibazo byabo.

Kuri uyu wa Kane tariki 12 Gicurasi 2016, nibwo ibiro ntaramakuru by’abongereza, byatangaje ko akanama gashinzwe umutekano ku isi mu muryango w’Abibumbye, kongeye gushinja u Rwanda gutanga imyitozo, guha inkunga mu by’ubukungu n’ubundi bufasha butandukanye ku mitwe ishaka guhirika ubutegetsi bwa Perezida Pierre Nkurunziza w’u Burundi.

Mu kiganiro yagiranye n’abanyamakuru ku gicamunsi cyo kuri uyu wa Gatanu tariki 13 Gicurasi 2016, Perezida Paul Kagame yongeye kunenga iby’izi raporo z’umuryango w’Abibumbye (LONI), agaragaza ko abazikora bongera ibibazo mu biba bisanzwe bihari. Perezida Kagame ati: "Abandika raporo za Loni ku Rwanda, bakabaye bakora ibindi by’ingirakamaro aho kongera ibibazo bihari"

Perezida Kagame kandi yagiriye inama Abarundi, ku bijyanye n’uko bakwiye gufata ibibazo byabo ndetse no gushaka umuti wabyo aho gutekereza ko hari ahandi biva. Yagize ati: "Icyangombwa ni uko Abarundi bafata ibibazo bafite nk’ibyabo aho gutekereza ko hari ahandi biva".

Muri Gashyantare uyu mwaka, nabwo hari hatangajwe ko hari akanama k’impuguke zigenga zashyizweho n’Umuryango w’Abibumbye, kashyize hanze amakuru ahamya ko hari abarwanyi 18 b’Abarundi bari mu burengerazuba bwa Repubulika Iharanira Demokarasi ya Kongo, bavuze ko bakuwe mu nkambi yo mu Rwanda hagati mu mwaka wa 2015, bagahabwa imyitozo n’abasirikare b’u Rwanda. Ibi ariko u Rwanda rwabyamaganiye kure.

Ibiro ntaramakuru by’abongereza, Reuters, bivuga ko hari raporo byabonye kuri uyu wa Kane tariki 12 Gicurasi 2016, yashyizwe hanze n’ako kanama kagizwe n’abantu 6, igaragaza ko u Rwanda rwakomeje gutera inkunga abashaka guhirika ubutegetsi mu Burundi, ubwo bufasha bukaba bwaratanzwe mu mezi y’intangiriro z’umwaka wa 2016.

Ibijyanye n’ibibazo by’u Burundi, Leta y’u Rwanda yakomeje kugaragaza ko ari ibibazo bireba Abarundi ubwabo, kandi bakaba ari nabo bakwiye kugira uruhare bwo kubyikemurira ubwabo, bakareka kubyita ibikomoka mu Rwanda kandi bazi ko aho bikomoka n’ubundi ari iwabo mu Burundi.

KANDA HANO UREBE VIDEOS UTASANGA AHANDI