Kamonyi: Abakozi b’akarere barwanye umwe arakomereka ajyanwa kwa muganga

Chief Editor | 15-09-2016
Kamonyi: Abakozi b’akarere barwanye umwe arakomereka ajyanwa kwa muganga

Kuri uyu wa Kane tariki 16 Nzeri 2016 mu masaha y’amanywa, abakozi babiri b’akarere ka Kamonyi mu ntara y’Amajyepfo barwaniye mu kazi nyuma yo gutongana biturutse ku makimbirane yabaye hagati yabo mu kazi, iyi mirwano ikaba yatumye umwe muri aba bakozi anakomereka mu isura ajyanwa kwa muganga ndetse n’indorerwamo z’amaso (lunettes) zirameneka.

Amakuru yizewe ikinyamakuru Ukwezi.com gikesha umwe mu bakozi b’akarere ka Kamonyi, avuga ko abarwanye ari abagore babiri barimo umukozi ushinzwe ubujyanama mu by’amategeko na notariya ndetse n’umukozi ushinzwe ibikoresho by’aka karere. Aba bagore barwanye nyuma y’uko ushinzwe ubujyanama mu mategeko na notariya yacunaguzwaga n’uwo mugenzi we, amubwira ko akerererwa mu kazi n’aho ahagereye agahugira mu kwinywera ibyayi. Ibi kandi byabereye mu ruhame rw’abandi bakozi b’akarere.

Aba bagore babiri, umwe yitwa Umutoni Francine undi akitwa Nyiransengiyumva Adeline. Nyuma yo gutongana no gutukana, Umutoni Francine yafashe igikoresho giteranya impapuro (Agrafeuse) agikubita Nyiransengimana Adeline aramukomeretsa n’indorerwamo z’amaso arazimena. Uyu wakomerekejwe yahise ajyanwa ku bitaro bya Remera Rukoma biherereye muri aka karere ka Kamonyi.

Mu kiganiro ikinyamakuru Ukwezi.com cyagiranye n’umuyobozi w’akarere ka Kamonyi, Bwana Udahemuka Aimable, yaduhamirije ko aba bakozi koko barwanye bitewe n’amakimbirane bagiranye, ariko ubwo twavuganaga yavugaga ko arimo kuvugana n’inzego za Polisi kuri iki kibazo, andi makuru arambuye akaza kuyatugezaho.

Udahemuka Aimable, umuyobozi w’akarere ka Kamonyi

KANDA HANO UREBE VIDEOS UTASANGA AHANDI