Kigali: Inzira y’agahomamunwa yatumye umukecuru w’imyaka 75 asohorwa akarazwa hanze

Chief Editor | 2-08-2016
Kigali: Inzira y’agahomamunwa yatumye umukecuru w’imyaka 75 asohorwa akarazwa hanze

Ku mugoroba wo kuri uyu wa Mbere tariki 1 Kanama 2016, mu murenge wa Kacyiru mu mujyi wa Kigali, munsi y’ibitaro byahoze ari ibya Polisi, hari umukecuru w’imyaka 75 wasohowe mu nzu n’ibintu byose byarimo babita hanze, akaba yarajwe ku gasozi. Intandaro y’ibi byose ariko, ni inzira ndende y’amanyanga yakozwe kuva mu mwaka w’1998, ndetse umuryango w’uyu mukecuru urataka akarengane, gukandamizwa, ruswa n’ikimenyane bimaze imyaka myinshi bibabuza amahwemo.

Ubwo ikinyamakuru Ukwezi.com cyageraga ahabereye ibi, icyashishikaje umunyamakuru bwa mbere ni ugutaka k’umukecuru wavugaga ko abamusohoye mu nzu bamuhohoteye, kugeza n’ubwo amata yari mu byuma bikonjesha (frigo) yanyowe ndetse n’inyama yari yitekeye nazo zariwe ku ngufu n’abakozi bakoreshejwe n’inzego zamusohoye mu nzu. N’ubwo ibi wabyumva nk’ibikomeye, amakuru twahise tumenya yo ni uko hari ikibazo gikomeye cyane cyaturutseho ibi byose.

Umukecuru wasohowe n’ibintu bye, avuga ko bamuhohoteye bakamurira n’iby’umugoroba yari yitekeye

Umukecuru wasohowe, yabaga mu nzu y’umuhungu we witwa John Djumapili Nasibu ifite agaciro ka miliyoni hafi 500, ikaba yatejwe cyamunara mu buryo burimo urujijo nk’uko impapuro nyinshi dufitiye kopi zibigaragaza, ndetse inzira byanyuzemo zirimo amanyanga yakozwe guhera mu 1998.

Nyirabayazana ni iyubakwa ry’amashuri ya Kaminuza ya ULK ryabayemo amanyanga

Nk’uko bigaragara ku impapuro z’ubutabera Ikinyamakuru Ukwezi.com twabashije kubonera kopi, iyubakwa rya Kaminuza yigenga ya Kigali izwi nka ULK ryabayemo amanyanga, ku bufatanye n’ubuyobozi bwa banki yitwaga iy’Ubucuruzi (BCR) ubu isigaye yitwa I&M Bank, ariko kandi hakabamo n’abari bagize ikompanyi y’ubwubatsi yubatse izo nyubako nayo yabayemo guca inyuma bamwe mu banyamigabane.

BADER S.A.R.L, ni kompanyi y’ubwubatsi y’abantu batatu, ari bo John Nasibu Djumapili, Kambali Bigishiro na Shema wa Nkwano. Mu mwaka w’1998 babonye isoko bahawe na Prof. Rwigamba Balinda ryo kumwubakira inyubako za Kaminuza ye, ariko afatanya na bamwe mu banyamuryango ba BADER ndetse na BCR, amafaranga bagombaga kwishyura BADER akajya ashyirwa kuri Konti n’ubundi ya ULK kandi iyi Kaminuza ari nayo yishyuraga, bivuga ko amafaranga yayigarukiraga.

Tariki 12 Kanama 1998, Kambali Bigishiro yasinye mu izina rya BADER, yandikira umuyobozi wa BCR amumenyesha ko batsindiye isoko ryo kubaka Kaminuza ya ULK kandi ko amafaranga y’iryo soko azanyuzwa kuri konti ya kompanyi ya BADER yari mu banki ya BCR. Igiteye urujijo ariko, kuri iyo tariki ninabwo Kambali Bigishiro yafatanyije na Rwigamba Balinda, bandikira indi baruwa BCR basaba ko amafaranga y’iryo soko yajya anyuzwa kuri konti yindi, iyi ariko ikaba yarasaga n’iya ULK kuko bayihaye izina rya "Construction ULK" kandi nayo yafunguwe muri BCR. Amafaranga y’u Rwanda agera kuri 57,848,390 yose yanyujijwe kuri iyo konti, ariko BADER nta n’igiceri yabonyemo kuko konti yari yarayoberejweho bigaragara ko itari iyabo nka Kompanyi, n’ubwo mu bagize uruhare muri aya manyanga harimo na bamwe mu bagize kompanyi.

Ibi byose ariko John Djumapili Nasibu byabaga yibereye muri Kongo, yaje kubiregera mu izina rya BADER mu rukiko rw’ubucuruzi rwa Nyarugenge, arega banki ya BCR isigaye yitwa I&M Bank. Urubanza rwasomwe tariki 7 Kamena 2016, rwarangiye BADER itsinze, ndetse banki itegekwa kwishyura akayabo ka 57,848,390 yariganyije iyo kompanyi y’ubwubatsi ikayanyuza kuri konti itari iyayo, hiyongeraho n’ibindi bijyanye n’ihazabu (amande) yose hamwe aba 62,848,390.

Iki cyemezo ariko, ababurana bombi nticyabanyuze, kuko I&M Bank yahise ijurira, BADER nayo ikaba yarabonaga aya mafaranga ari macye bityo ifata icyemezo cyo kuzakora ubujurire bwuririye ku bwa I&M Bank, uru rubanza rukaba ruzaburanishwa tariki 21 Nzeri 2016. Banki yajuriye ivuga ko John Djumapili Nasibu adafite ububasha bwo kubarega kuko atari we BADER. Hagati aho ariko twabamenyesha ko muri batatu bari bagize BADER, umwe witwa Shema wa Nkwano we yaje gupfa.

BCR (I&M Bank) yarezwe kunyuza amafaranga ya BADER kuri konti itari iyayo, yaciye inyuma iregera ibyangijwe n’ayo makosa

BADER nayo yari isanzwe ifite inguzanyo y’amafaranga y’u Rwanda asaga 11.000.000 yagujije BCR, kandi aya banki yagombaga kuzajya ihita iyiyishyura uko ULK yabishyuraga. Ibi binagaragazwa n’ibaruwa dufitiye kopi ishimangira ko na BCR yayakiriye. Iyi nayo yanditswe tariki 12 Kanama 1998, aho Kambali Bigishiro, mu izina rya BADER yamenyeshaga banki ko amafaranga ULK izajya ibishyura, azajya anyuzwa kuri konti yabo hanyuma banki igahita yiyishyura inguzayo yari yarahaye BADER mbere igura amamashini.

N’ubwo BCR yari nyirabayazana wo kuba amafaranga atarishyuwe kuko yayobejwe, yararenze irabarega ndetse ibatsinda badahari. Kambali Bigishiro yahise ajurira wenyine, avuga ko n’ubwo ari mu bagize BADER, atigeze ayishingira ubwo yafataga inguzanyo. Icyo gihe Kambali koko yarabatsinze, ariko BCR irongera ijuririra mu rukiko rw’ikirenga, iratsinda ariko igiteye urujijo, ni uko uyu waburanaga atari we wafatiwe ibihano, kuko Urukiko rwategetse ko Kambali afatanya n’abataje mu rukiko ndetse batigeze banamahagazwa cyangwa ngo babimenyeshwe.

Ibi ariko John Djumapili Nasibu yarabiregeye, avuga ko yafashweho icyemezo atari mu baburanyi, uru rubanza rukaba ruzaburanishwa tariki 20 Nzeri 2016, ariko Djumapili aha naho ahafite imbogamizi, kuko umucamanza wamufasheho icyemezo ari nawe uzongera kuburanisha uru rubanza, agasanga n’ubundi hari ikibyihishe inyuma, kuko n’abamwunganira mu rubanza rwe bamuhakanira ku munota wa nyuma; agakeka ko BCR iba yabaguze ngo be kumuburanira. Ubwo kandi, BCR (I&M Bank) yabaciye akayabo k’amafaranga arenga 90.000.000 yatewe n’uko batishyuye inguzanyo ya 11.000.000 kandi byaratewe no kuyobya amafaranga yabo ku yindi konti.

Iki cyemezo n’ubwo kikiri mu nkiko kuko tariki 20 Nzeri 2016 ari bwo hazaburanishwa uru rubanza Djumapili yarezemo avuga ko yashyizwe mu myanzuro y’urubanza atahamagawemo kandi atari n’umuburanyi, ntibyabujije ko hatezwa cyamurana inzu ya Djumapili iri ku Kacyiru mu mujyi wa Kigali, kandi igurishwa amafaranga y’u Rwanda 200.000.000 mu gihe igenagaciro (expertise) nyir’inzu yari afite rigaragaza ko ifite agaciro k’amafaranga y’u Rwanda arenga 490.000.000.

Djumapili waterejwe inzu cyamunara, aha yari inyuma y’igipangu kuko inzu ifunzwe

Djumapili yagiye yishinganisha muri CID ndetse anagerageza gusaba inzego zinyuranye kumurenganura, kugeza ubwo kuri uyu wa Mbere tariki 1 Kanama 2016, nyina wa Djumapili, umukecuru w’imyaka 75 y’amavuko wabaga muri iyi nzu yasohowemo n’ibintu bikajugunywa hanze n’ubu bikaba bigihari, mu gihe umuhungu we atari ahari kuko akunda gukorera muri Repubulika Iharanira Demokarasi ya Kongo, ariko byatumye ahita aza mu Rwanda igitaraganya.

Imyirondoro y’inzu yatejwe cyamunara nayo siyo, hakozwe ibintu biteye urujijo

John Djumapili Nasibu, afite inkomoko ku mubyeyi w’umunyarwanda n’undi ukomoka muri Repubulika Iharanira Demokarasi ya Kongo ari naho yakunze kuba cyane. Ubwo yazaga mu Rwanda, yashatse gufata izina ry’igisekuru cye cyo mu Rwanda, yitwa Bazirake Djumapili John, aya akaba ari nayo mazina agaragara ku cyangombwa cy’ubutaka bwubatseho inzu yatejwe cyamunara. Nyamara, icyemezo cy’umwimerere aragifite, mu gihe uwo bivugwa ko yatsindiye inzu mu cyamunara yajyanye n’umuhesha w’inkiko ku Kigo cy’ubutaka, bakabaha ikindi cyangombwa kiriho amazina atari yo, kuko cyo bitagaragara ko inzu ari iya Bazirake. Ikindi kandi, icyo cyangombwa kindi kigaragaza ko inzu iherereye mu mudugudu witwa Umutako kandi inzu yubatswe mu mudugudu wa Virunga.

Hari n’urujijo rw’ibijyanye n’uko inzu yagombaga gutezwa cyamunara igipande kimwe, hagasigara icy’umugore

N’ubwo bitapfa gushoboka ko inzu bayisaturamo kabiri, bisa n’aho bayisatuye kuko hari igipande cy’umugore wa Djumapili cyagurishijwe ariko bikitwa ko icye batagikozeho. Ngarula Kabeya Michelline, ni umugore wa Djumapili ufite uburenganzira ku mitungo ye n’umugabo we. Ubwo yamaraga kubona ko inzu yabo igiye gutezwa cyamunara, yagiye gutanga ikirego avuga ko atigeze yemeranywa n’umugabo we kuba inzu yatangwaho ingwate, kandi koko ntabwo iyi nzu yigeze iba ingwate kuko nta n’ingwate igaragazwa BCR yahawe na BADER.

Uyu mugore yarabatsinze cyamunara irahagarara, ariko nyuma BCR irajurira, igaragaza ko amafaranga ikeneye azava mu gipande cy’umugabo, icy’umugore kigasigara. Gusa nta gusigara kundi, ahubwo umugore yagurishirijwe igipande nta kosa yakoze, abwirwa ko kimwe cya kabiri cy’azava mu cyamunara bazayamuha akitwa icyo gipande cye. Uru rubanza BCR (I&M Bank yajuririye ariko, igiteye urujijo ni uko uwo mugore wa Djumapili atigeze ahamagazwa, nyuma akumva ko hari uwamuburaniye kandi ntawe yabibwiye nta n’ibyo yigeze amenyeshwa.

Muri rusange, umuryango wa John Djumapili Nasibu uratabaza Minisitiri w’Ubutabera bw’u Rwanda, umuyobozi wa Transparency Rwanda n’abandi bashobora kumurenganura, bakamugoboka. By’umwihariko, uyu muryango usaba Perezida Kagame ko yawutabara nturenganire mu gihugu gisanzwe kizirana n’akarengane na ruswa, kandi akizera ko Perezida adashobora kwemera ko umuturage yakwamburwa ibye ku maherere, akanabuzwa amahwemo mu gihe hakirimo kuburanishwa imanza zigomba kumurenganura.

Iyi niyo nzu yetejwe cyamunara, iyi foto yafatiwe inyuma kuku irafunze

Aha ni imbere mu busitani bwo mu gipangu

Aha ni inyuma ku marembo y’urugo rurimo iyi nzu

Nyuma y’iyi nkuru, Minisitiri w’Ubutabera akaba n’Intumwa Nkuru ya Leta y’u Rwanda, yerekanye ko arimo gukurikirana iki kibazo kandi akaba agiye kugira icyo agikoramo. Ibi ni bimwe mu byo yatangarije ku rubuga rwa Twitter:


@PaulKagame @UrugwiroVillage @BusingyeJohns @anticorruption We know @RwandaGov can't tolerate such things. https://t.co/UqYzCYXagv

— ManirakizaThéogène(@mathebebo) August 2, 2016

@mathebebo @PaulKagame @UrugwiroVillage @anticorruption @RwandaGov We are checking this story out. We will respond asap.

— BusingyeJohnston (@BusingyeJohns) August 2, 2016

@mathebebo @PaulKagame @UrugwiroVillage @anticorruption @RwandaGov We handled this matter sometime ago. We are verifying. Details tomorrow.

— BusingyeJohnston (@BusingyeJohns) August 2, 2016

@BusingyeJohns @PaulKagame @UrugwiroVillage @anticorruption @RwandaGov Waiting for the details Minister! Thanks

— ManirakizaThéogène(@mathebebo) August 3, 2016

@mathebebo @PaulKagame @UrugwiroVillage @anticorruption @RwandaGov I promised we wdrespond Theo, 'n sure we will. We need to be sure.

— BusingyeJohnston (@BusingyeJohns) August 3, 2016

@mathebebo @PaulKagame @UrugwiroVillage @anticorruption @RwandaGov GdmngTheo, I sent u a direct twitter msg. Kindly respond. Many thanks.

— BusingyeJohnston (@BusingyeJohns) August 4, 2016

@BusingyeJohns @PaulKagame @UrugwiroVillage @anticorruption @RwandaGov Done! Many thanks

— ManirakizaThéogène(@mathebebo) August 4, 2016

@mathebebo @PaulKagame @UrugwiroVillage @anticorruption @RwandaGov Thanks. Will reach out to you after the mtngam attending

— BusingyeJohnston (@BusingyeJohns) August 4, 2016

KANDA HANO UREBE VIDEOS UTASANGA AHANDI