Kigali: Top Tower Hotel yafunzwe, ku bw’impungenge z’umutekano w’abayigana

Chief Editor | 22-06-2016
Kigali: Top Tower Hotel yafunzwe, ku bw’impungenge z’umutekano w’abayigana

Top Tower Hotel iherereye ku Kacyiru mu mujyi wa Kigali, yafunzwe n’ubuyobozi bw’umujyi wa Kigali guhera mu ntangiriro z’iki cyumweru, ubuyobozi bw’uyu mujyi bukaba buvuga ko byatewe n’impungenge z’ibibazo iyi nyubako ishobora guteza ku buzima bw’abantu.

Ubwo ikinyamakuru Ukwezi.com cyageraga ahubatse iyo hoteli, cyasanze imirimo yakorerwagamo yarahagaze, kiganira na bamwe mu bayikoragamo ariko ntibavuga rumwe ku mpamvu batekereza ko zatumye ifungwa n’Umujyi wa Kigali.

Bamwe muri aba bakozi, babwiye Ukwezi.com ko ibibazo by’imyenda iyi hoteli ibereyemo abantu ku giti cyabo, abakozi bayikorera n’ibigo bitandukanye, bakeka ko byaba ari yo ntandaro yo kuba yarafunzwe kuko hari serivisi yatangaga nabi, bigahesha isura mbi igihugu.

Rumwe mu ngero batanga, ni rw’ Umuryango wita ku bafite ubumuga witwa NUDOR (National Union of Disability Organizations in Rwanda) ukirimo kwishyuza iyi hoteli amafaranga y’u Rwanda arenga miliyoni 5, nyuma yo kwishyura ibyumba n’ibindi bitandukanye muri iyi hoteli byari gukoreshwa mu gikorwa mpuzamahanga cyagombaga guhuza abafite ubumuga bo mu bihugu 11 birimo n’u Rwanda, ariko bakaba barasanze iyi hoteli yaratanze ibyumba bari barishyuye kandi ibyari bisigaye bitari gukoreshwa byoroshye n’abafite ubumuga.

Ibi byatumye bamye mu banyamahanga bari barageze muri iyo hoteli bakurwamo hashakwa indi hoteli, bituma bijujutira serivisi za Top Tower Hotel ndetse nyuma yanga guhita ibasubiza amafaranga bari barayishyuye.

SOMA HANO IYO NKURU IBANZA: Hoteli Top Tower irashinjwa ubuhemu, ubwambuzi no guhesha isura mbi u Rwanda

Nyamara ibi bihabanye n’ibitangazwa n’ubuyobozi bw’Umujyi wa Kigali, bugaragaza ko bwafunze iyi hoteli kubera ibyangombwa babasabye ntibabyubahirize, bakaba baranze ko iyi nyubako ishobora kugira icyo ihungabanya ku buzima bw’abayigana nk’uko byemejwe na Sibomana Martin ushinzwe itangazamakuru mu Mujyi wa Kigali, mu kiganiro yagiranye n’ikinyamakuru Ukwezi.com.

Sibomana Martin ati: "Ubundi ukuntu bigenda, iyo inyubako imaze kuzura, cyane cyane inyubako nka ziriya ziba zizakira abantu benshi, abashinzwe imyubakire babanza gusesengura niba koko iyo nzu ifite ubukomere buhagije kuburyo itazateza impanuka ku bantu bazayikoresha, noneho iyo basanze nta kibazo ifite, tuvuge nk’iriya ni hoteli, bakaguha icyangombwa kibemerera gukoresha inyubako, tukita ’Occupation Permit’. Icyo cyangombwa kandi giteganywa n’amategeko n’amabwiriza ajyanye n’imitunganyirize y’umujyi. Icyo cyangombwa buriya nta n’icyo bafite. "

Uyu mukozi ushinzwe itangazamakuru mu Mujyi wa Kigali, avuga ko atari ubwa mbere basabwe kubanza kubona ibi byangombwa, kuko ubuyobozi bw’umujyi bwabanje kubandikira bubamenyesha. Aha yagize ati: "Ntabwo ari n’ubwa mbere erega, tariki 28/07/2015, twabandikiye ibaruwa tubibutsa ko imirimo yose bakorera muri iyo nyubako yabo, baba bayisubitse kugirango inyubako ibanze igenzurwe, ibyo byose barabyirengagije. Ubwo rero bituma n’ejobundi tariki 14/06/2016 tubandikira tubabwira kubihagarika kugirango ibanze igenzurwe."

Sibomana Martin avuga ko n’ubwo ubusanzwe umujyi wa Kigali ari wo uba ugomba gukora iryo genzura, Top Tower Hotel yari yashyizeho ikigo cyitwa St Joseph Engineering ngo gikore iryo genzura ariko n’ubu bikaba bitararangira, bakaba batakomeza gukoreramo bitaragenzurwa neza.

Avuga kandi ko Umujyi wa Kigali ufite impungenge ko abantu bakoresha iyi nyubako bashobora kugiriramo ingorane z’impanuka. Ati: "Twebwe icyo tureba ni ukurengera ubuzima bw’abantu, icyo dushaka ni uko ririya genzura ryakorwa, ikizavamo cyagaragaza ko izo mpungenge dufite zivuyeho bakongera bagakomorerwa ariko ubundi nta kindi kihishe inyuma, ni ukurengera umutekano w’abantu bakoresha iriya nyubako. Cyane cyane urabizi inyubako zikoreshwa n’abantu benshi, uba ugomba kwitonda kuko burya nka hoteli ijyamo abantu benshi cyane, reba habereyemo nk’ubukwe mbese hakagira ikibazo kiba, noneho abo bantu bose twaba tubuze... urabyumva nawe, nta kindi kibyihishe inyuma."

Asoza avuga ko iri genzura nirimara gukorwa, Umujyi wa Kigali nawe uzabisuzuma wasanga ibintu bimeze neza ukabaha ibyangombwa byo gukoreramo. Avuga ko n’andi mazu yuzura mu mujyi wa Kigali abanza gukorerwa igenzura na nyirayo bagahabwa icyemezo kibemerera gukoresha inyubako zabo, cyane cyane izikoreshwa n’abantu benshi.

KANDA HANO UREBE VIDEOS UTASANGA AHANDI