Kizito Mihigo ategerejwe mu rukiko rw’ikirenga nyuma yo kujuririra igihano yahawe

Chief Editor | 12-07-2016
Kizito Mihigo ategerejwe mu rukiko rw’ikirenga nyuma yo kujuririra igihano yahawe

Nyuma yo gukatirwa imyaka 10 y’igifungo, umuhanzi Kizito Mihigo yajuririye mu rukiko rw’ikirenga, ubu hakaba hategerejwe iburanishwa ry’urubanza yaregwagamo ibyaba bikomeye birimo n’icyo gucura umugambi wo kugambanira igihugu.

Tariki 27 Gashyantare, nibwo Kizito Mihigo yahamijwe ibyaha bitatu birimo kurema umutwe w’iterabwoba, kugambirira kugirira nabi ubutegetsi buriho n’icyaha cyo gucura umugambi w’ubwicanyi, hanyuma ahanishwa igifungo cy’imyaka 10.

Nyamara n’ubwo bitigeze bimenyekana ngo bivugwe hanze, mbere y’uko hashira ukwezi akatiwe, Kizito Mihigo yahise ajuririra iki gihano yahawe, ageze ikirego cye mu rukiko rw’Ikirenga, bivuga ko hashize igihe kirenga umwaka ajuriye.

Mu kiganiro umuvugizi w’ubushinjacyaha bw’u Rwanda, Faustin Nkusi yagiranye n’ikinyamakuru Ukwezi.com, yaduhamirije ko Kizito Mihigo na bagenzi be Ntamuhanga Cassien na Jean Paul Dukuzumuremyi bagejeje ikirego cyabo cy’ubujurire mu rukiko rw’ikirenga, mbere y’uko hashira iminsi 30 bakatiwe. Gusa Faustin Nkusi avuga ko kugeza ubu atazi igihe bazaburanira.

KANDA HANO UREBE VIDEOS UTASANGA AHANDI