Kizito Mihigo aracyafite igihe kirekire cyo gufungwa by’agateganyo

Chief Editor | 12-09-2016
Kizito Mihigo aracyafite igihe kirekire cyo gufungwa by’agateganyo

Umuhanzi Kizito Mihigo umaze imyaka irenga ibiri afungiye muri gereza nkuru ya Kigali izwi nka 1930, aracyafite igihe kirekire afunzwe by’abateganyo kuko igihano yakatiwe kitabaye itegeko, n’ubwo yajuriye akaba azategereza abandi benshi bagomba kuburanishwa mbere ye, cyane ko aherutse gutakambira Urukiko rw’ikirenga asaba ko yahabwa itariki ya vuba yo kuburanisha urubanza rwe ariko ubusabe bwe bukaba bwaranzwe.

Tariki 27 Gashyantare, nibwo Kizito Mihigo yahamijwe ibyaha bitatu birimo kurema umutwe w’iterabwoba, kugambirira kugirira nabi ubutegetsi buriho n’icyaha cyo gucura umugambi w’ubwicanyi, hanyuma ahanishwa igifungo cy’imyaka 10. Gusa yahise ajurira, kugeza ubu bikaba bitegerejwe ko azongera akagezwa imbere y’urukiko rw’ikirenga aburanishwa kuri ibi byaha, bisobanura ko ubu ari muri gereza ya 1930 afunzwe by’agateganyo kuko atarahamwa n’ibyaha mu buryo ndakuka.

JPEG - 55.1 kb

Kizito Mihigo umwaka ushize mu gihe cy’iburanishwa

Hashize igihe kirenga umwaka n’igice urubanza rw’ubujurire bwa Kizito Mihigo rutaraburanishwa ndetse n’itariki yo kuburana ntiramenyekana. Mu ntangiro z’uyu mwaka, yari yandikiye urukiko rw’Ikirenga abatakambira asaba ko yahabwa itariki ya vuba yo kuburana, ariko bamubwira ko bitashoboka kuko hari abandi benshi bajuriye mbere ye kandi nabo bakaba ari abanyarwanda bafite uburenganzira nk’ubwe, nk’uko Umuvugizi w’Inkiko z’u Rwanda, Itamwa Emmanuel, yari yabitangarije Ikinyamakuru Ukwezi.com mu mpera za Nyakanga uyu mwaka.

JPEG - 51.1 kb

Ubwo twaganiraga na Itamwa Emmanuel mu mpera z’icyumweru gishize, yadutangarije ko kugeza ubu hari umubare munini w’abantu bajuririye Urukiko rw’Ikirenga mbere ya Kizito Mihigo, bikaba bisobanura ko azakomeza agafungwa by’agateganyo igihe kirekire ategereje kuburana, kuzageza ubwo abari imbere ye bose bazabanza bakarangira. Yavuze ko kugeza ubu bigoye kuba hamenyekana itariki Kizito Mihigo azasubirira mu rukiko.

Icyakoze igihe nikigera Kizito Mihigo akaburanishwa, ntazigera ahabwa igihano kirenga imyaka 10 yari yakatiwe mbere. Kuba ubushinjacyaha butarajuriye kuri iki gihano yari yahawe ntacyemere, bituma Urukiko rw’Ikirenga rutamuha igihano kirenze icyo yahawe n’Urukiko rukuru, bivuga ko ibihano bishoboka ari imyaka 10 cyangwa iri munsi yayo, cyangwa se kugirwa umwere. Ubu amaze igihe gikabakaba imyaka ibiri afunzwe by’agateganyo, ariko naramuka yongeye agakatirwa iyo myaka izakurwa mu gihano yaba yahawe.

JPEG - 102.6 kb

Naburanishwa, Kizito Mihigo ntashobora guhabwa igihano kirenga igifungo cy’imyaka 10

KANDA HANO UREBE VIDEOS UTASANGA AHANDI