Kizito Mihigo yatakambiye urukiko rw’ikirenga, ubusabe bwe ntibwemerwa

Chief Editor | 1-08-2016
Kizito Mihigo yatakambiye urukiko rw’ikirenga, ubusabe bwe ntibwemerwa

Umuhanzi Kizito Mihigo umaze imyaka irenga ibiri afungiye muri gereza nkuru ya Kigali izwi nka 1930, aherutse gutakambira Urukiko rw’ikirenga rw’u Rwanda asaba ko yahabwa itariki ya vuba yo kuburanisha urubanza rwe yajuririye nyuma yo gukatirwa mu mwaka ushize wa 2015, gusa ubusabe bwe ntabwo bwigeze bwemerwa.

Tariki 27 Gashyantare, nibwo Kizito Mihigo yahamijwe ibyaha bitatu birimo kurema umutwe w’iterabwoba, kugambirira kugirira nabi ubutegetsi buriho n’icyaha cyo gucura umugambi w’ubwicanyi, hanyuma ahanishwa igifungo cy’imyaka 10. Gusa yahise ajurira, kugeza ubu bikaba bitegerejwe ko azongera akagezwa imbere y’urukiko rw’ikirenga aburanishwa kuri ibi byaha.

JPEG - 55.1 kb

Kizito Mihigo umwaka ushize mu gihe cy’iburanishwa

Nyuma yo kujurira ariko, hashize hafi umwaka n’igice urubanza rw’ubujurire bwe rutaraburanishwa ndetse n’itariki yo kuburana ntiramenyekana. Nyuma yo kubona umwaka wa 2015 urangiye atarahabwa itariki yo kuburana ndetse n’umwaka wa 2016 akabona urimbanyije, Kizito Mihigo yandikiye urukiko rw’Ikirenga abatakambira asaba ko yahabwa itariki ya vuba yo kuburana, ariko bamubwira ko bitashoboka.

JPEG - 51.1 kb

Kizito Mihigo w’imyaka 35 y’amavuko, yatawe muri yombi muri Mata 2014

Umuvugizi w’Inkiko z’u Rwanda, Itamwa Emmanuel, yatangarije Ikinyamakuru Ukwezi.com ko Kizito yasubijwe n’Urukiko rw’Ikirenga, ko hari abandi benshi bajuriye mbere ye kandi nabo bakaba ari abanyarwanda bafite uburenganzira nk’ubwe, bityo akaba agomba gutegereza akagerwaho, igihe cyazagera akazamenyeshwa igihe azaburanira.

JPEG - 102.6 kb

Naburanishwa, Kizito Mihigo ntashobora guhabwa igihano kirenga igifungo cy’imyaka 10

Itamwa Emmanuel kandi yasobanuriye ikinyamakuru Ukwezi.com, ko igihe nikigera Kizito Mihigo akaburanishwa, atazigera ahabwa igihano kirenga imyaka 10 yari yakatiwe mbere. Avuga ko kuba ubushinjacyaha butarajuriye, bituma Urukiko rw’Ikirenga rutamuha igihano kirenze icyo yahawe n’Urukiko rukuru, bivuga ko ibihano bishoboka ari imyaka 10 cyangwa iri munsi yayo, cyangwa se kugirwa umwere.

KANDA HANO UREBE VIDEOS UTASANGA AHANDI