MIGEPROF yagaragarije abanyarwanda ibanga ryafasha imiryango gutera imbere

Bikorimana Alexis | 24-09-2016
MIGEPROF yagaragarije abanyarwanda ibanga ryafasha imiryango gutera imbere

Minisiteri y’Uburinganire n’Iterambere ry’Umuryango, MIGEPROF yagaragaje umuti uhamye w’ibibazo byo mu muryango, inagaragaza ibanga ry’iterambere rihamye nyuma yo kugaragaza ko kudasobanukirwa uburenganzira bw’umwari n’umutegarugori ari bimwe mu nzitizi zituma umuryango udatera imbere.

Ibi intumwa za MIGEPROF zabitangaje ubwo zari i Burengerazuba mu Karere ka Rutsiro aho basabaga abaturage kwishakamo ibisubizo nk’umuryango dore ko babifitiye ububasha ndetse n’ubushobozi.

Madamu Mukamazera Jacqueline wari uhagarariye Minisiteri y’umuryango mu Karere ka Rutsiro by’umwihariko mu murenge wa Rusebeya, yabwiye abari aho ko umuryango udashobora gutera imbere igihe udasenyeye umugozi umwe.

Yakomeje abwira abaturage ko buri mugabo agomba gufasha umugore kugirango azamuke ndetse n’umugore agafasha umugabo kuko bose bangana mu rugo dore ko ibyo bageraho ari iby’umuryango aho kuba iby’umuntu umwe ku giti cye.

Uwari uhagarariye Polisi y’u Rwanda, yasobanuriye abaturage ko hari ubwoko bwinshi bw’ihohoterwa nk’imwe mu mpamvu zituma imiryango idatera imbere. Yavuze ko hari ihohoterwa rikorerwa cyane abari n’abategarugori; aho usanga bakoreshwa imibonano mbuzabitsina ku ngufu cyangwa umugabo akumva ko agomba kubonera umugore we igihe amuboneye. Irindi hohoterwa rikunze kugaragara ni aho umuyobozi cyangwa umuntu ukuriye urwego runaka yitwaza umwanya afite ndetse n’igitinyiro afite akumva ko agomba guha umwari cyangwa umugore serivisi ari uko bamaze kuryamana.

Abaturage benshi baganiriye n’abayobozi ku ibanga ryatuma umuryango utera imbere.

Abayobozi bagarutse no ku bundi bwoko bw’ihohoterwa, urugero ni ihohoterwa bise nshenguramitima ndetse n’ihohoterwa rishingiye ku mubiri; aha ni mu gihe umugabo ahora abwira nabi umugore we cyangwa abana be rimwe na rimwe akabakubita cyangwa akanga kubagurira ibyo baba bamusabye kandi afitiye ubushobozi.

Mu gusoza inama intumwa ya Minisiteri y’Uburinganire n’Iterambere ry’Umuryango Madamu Mukamazera Jacqueline ndetse n’abandi bayobozi mu nzego zitandukanye, banzuye basaba abagore kwibumbira hamwe bakagana ibigo by’imari bikabaguriza amafaranga yo gukora imishinga ibyara inyungu maze umugore n’umugabo mu rugo bagahuriza hamwe.

Intumwa ya Minisiteri y’Uburinganire n’Iterambere ry’Umuryango Madamu Mukamazera Jacqueline, aganiriza abaturage.

KANDA HANO UREBE VIDEOS UTASANGA AHANDI