Menya byinshi kuri Dr Donald Kaberuka wahawe akazi na Perezida Magufuli wa Tanzania

Chief Editor | 20-08-2016
Menya byinshi kuri Dr Donald Kaberuka wahawe akazi na Perezida Magufuli wa Tanzania

Umunyarwanda Dr Donald Kaberuka wubatse amateka akomeye muri Afrika no ku isi yose ubwo yayoboraga Banki Nyafurika itsura Amajyambere (BAD), akaba asanzwe anafite akazi ko kwigisha muri Kaminuza ya Havard iri mu za mbere zikomeye ku isi yose, yagiranye ibiganiro na Perezida John Pombe Magufuli wa Tanzania anamuha akazi.

Ikinyamakuru Daily News cyo muri Tanzania kivuga ko Perezida Magufuli yagiranye ibiganiro na Dr Donald Kaberuka kuri uyu wa Gatanu tariki 19 Kanama 2016, aho uyu mukuru w’igihugu yatangaje ko asanga igihugu cye cya Tanzania kizungukira byinshi kuri Dr Donald Kaberuka, birimo ubujyanama ku mishinga inyuranye y’iterambere.

JPEG - 115 kb

Perezida Magufuli, amenyesha Dr Kaberuka ko bazamwungukiraho byinshi yagize ati: "Aya ni amahirwe y’imbonekarimwe kuri Tanzania, twizeye ko tuzabasha kubona byinshi mu nama zawe, ku mishinga inyuranye iganisha igihugu ku iterambere, tukabasha kubyaza umusaruro umutungo kamere dufite, urimo amabuye y’agaciro, ingufu zikomoka kuri gaze, ubutaka bunini dufite, ibyambu, ibiyaga na Pariki z’igihugu."

Dr Donald Kaberuka, yagizwe umuyobozi w’akanama k’igihugu cya Tanzania kagizwe n’abayobozi bakuru b’iki gihugu bashinzwe iby’iterambere n’ubukungu bw’iki gihugu, muri aba hakaba harimo na Minisitiri w’Imari n’Igenamigambi, Dr Phillip Mpango.

Dr Donald Kaberuka wabaye umuyobozi wa Banki Nyafurika itsura Amajyambere (BAD) mu gihe cy’imyaka 10, hari hashize igihe none akorera muri Cambridge muri Leta ya Massachusetts muri Leta Zunze Ubumwe za Amerika, ahari icyicaro cya Kaminuza ikomeye ku isi ya Havard yigishamo kugeza n’ubu. Dr Donald Kaberuka yigisha amasomo ajyanye n’iterambere mu by’imari muri iyi Kaminuza ifite amateka akomeye ku isi, ikaba inamaze igihe kirekire dore ko yashinzwe mu mwaka w’1636.

Uyu Dr Donald Kaberuka ubusanzwe ni muntu ki ?

JPEG - 48.9 kb

Dr Donald Kaberuka ni Umunyarwanda wavutse tariki ya 5 Ugushyingo 1951, avukira ahahoze hitwa i Byumba ; ubu ni mu karere ka Gicumbi, akaba ari imfura mu muryango w’abana 7. Ku myaka 8 gusa, Donald Kaberuka n’umuryango we bahungiye mu gihugu cya Tanzania ari naho yize amashuri ye, aza no kuminuriza muri University of Dar es Salaam aho yakuye impamyabumenyi y’icyiciro cya kabiri mu bijyanye na Philosophy.

Icyiciro cya gatatu cy’amashuri ya kaminuza, Donald Kaberuka yacyigiye muri University of East Anglia mu Bwongereza mu bijyanye n’iterambere (Development studies) aho yaje kuva yerekeza muri University of Glasgov yo mu gihugu cya Ecosse ari naho yavanye impamyabumenyi y’ikirenga mu bijyanye n’ubukungu (PhD in Economics).

Akimara kurangiza amashuri ye, kuva mu mwaka w’1987 yakoze mu bijyanye n’amabanki ndetse n’ubucuruzi mpuzamahanga mu gihe kigera ku myaka 10. Mu bigo bikomeye yakozemo icyo gihe harimo Umuryango nyafurika ushinzwe iby’amakawa (OAIC) aho yari umuyobozi ushinzwe ubukungu.

JPEG - 43 kb

Mu mwaka w’1997, Dr Donald Kaberuka yagizwe Ministiri w’imari n’igenamigambi w’u Rwanda aho yari afite inshingano zikomeye zo kuzahura ubukungu bw’igihugu cyari kimaze gushegeshwa na Jenoside ndetse n’intambara, aho ubukungu bwari bwarazahaye bisa nko gutangirira ku busa. Uyu mwanya akaba yarawumazeho imyaka 8 aho yagize uruhare mu izamuka ry’ubukungu bw’u Rwanda muburyo bugaragara.

Muri Nyakanga 2005, Dr Donald Kaberuka yatorewe kuyobora banki nyafurika itsura amajyambere, aho yatangiye akazi ku mugaragaro mu kwezi kwa Nzeri, aba abaye Umunyarwanda wa mbere mu mateka utorewe umwanya ukomeye wo kuyobora banki iruta izindi ku mugabane wa Afurika, ndetse aba abaye n’umuyobozi wa 7 w’iyi banki kuva yashingwa mu mwaka w’1964.

Mu mwaka wa 2010, kubera ubushobozi n’ubuhanga yari amaze kugaragaza mu myaka 5 yari amaze ayobora iyi banki, Dr Donald Kaberuka yongeye kugirirwa icyizere atorerwa kuyobora iyi banki indi manda ya kabiri aho yakomeje intego ye yo kuzamura ubukungu bw’umugabane wa Afrika mu buryo bushoboka binyuze mu mishinga itandukanye iterwa inkunga n’iyi banki.

JPEG -

Aha, uwahoze ayobora igihugu cya Senegal Abdulaye Wade yarimo amwambika umudari w’ishimwe

Kuva Dr Donald Kaberuka yajya ku buyobozi bwa Banki nyafurika itsura amajyambere, hashyizweho uburyo iyi banki yakongera ingufu mu gutera inkunga inzego z’abikorera, ubuyobozi bw’ibihugu mu mishinga y’ibikorwa remezo, ikoranabuhanga ndetse n’ibindi cyane cyane ibihugu bikennye kurusha ibindi ku mugabane wa Afrika.

Mu mwaka wa 2013, Dr Donald Kaberuka yahawe igihembo cy’Umunyafurika w’umwaka cyitwa « Daily Trust Award » kubera uruhare yagize mu iterambere ry’umugabane wa Afurika, cyane cyane ku gitekerezo yagize cyiswe «Africa 50 Fund» kigamije guteza imbere ibikorwa remezo kuri uyu mugabane. Ku rutonde ruherutse gukorwa n’ikinyamakuru Jeune Afrique, Donald Kaberuka yaje mu bantu 50 bavuga rikijyana ku mugabane wa Afrika.

KANDA HANO UREBE VIDEOS UTASANGA AHANDI