Menya byinshi kuri General Major Paul Rwarakabije wasezerewe mu ngabo z’u Rwanda

Chief Editor | 21-07-2016
Menya byinshi kuri General Major Paul Rwarakabije wasezerewe mu ngabo z’u Rwanda

General Major Paul Rwarakabije, yari amaze igihe kirekire ari umwe mu bayobozi bakuru mu Rwanda, dore ko aherutse gusezererwa mu ngabo z’u Rwanda, ibi nabyo bikaba byarabaye amaze igihe gito agusimbuwe ku mwanya w’ubuyobozi bukuru bw’urwego rw’imfungwa n’abagororwa.

Uyu mugabo ni umwe mu barwanyaga Leta y’u Rwanda yivuye inyuma, nyuma akaza gufata icyemezo cyo kwitandukanya n’abacengezi agahitamo kuza gufatanya n’abandi kubaka u Rwanda. Muri iyi nyandiko, turabagezaho byinshi ku buzima n’imibereho bya Rwarakabije.

Paul Rwarakabije w’imyaka 63 y’amavuko, yavukiye mu cyahoze ari Perefegitura ya Ruhengeri, kuri ubu ni mu Karere ka Nyabihu ; mu Kagari ka Nyamugari ; Umudugudu wa Kizunga mu Ntara y’Uburengerazuba. Yavutse ku wa 15 Mata 1953; akaba yarashatse afite umugore n’abana babiri.

Rwarakabije yize amashuri yisumbuye kuri Saint André mu Mujyi wa Kigali ; akomereza mu ishuri rikuru rya Gisirikare ry’i Kigali mu 1973 arangiza mu 1977. Yasohotse muri iyo Kaminuza ya gisirikare afite icyiciro cya kabiri cya kaminuza (Licence) mu bijyanye n’imbonezamubano n’igisirikare (Sciences Sociales et militaires).

Nyuma yagiye gukomereza mu gihugu cy’u Bufaransa; amarayo umwaka mu mahugurwa ya gisirikare mu bijyanye n’itumanaho. Yakomeje akora amahugurwa mu bya gisirikare aho mu mwaka wa 1985 na 1990 yayakoreye mu ishuri rikuru rya gisirikare rya Kigali. Nyuma yagiye akora ingendo-shuri mu Bubiligi. Mu mwaka wa 1990 yari afite ipeti rya Majoro.

Akirangiza mu Ishuri rikuru rya gisirikare ry’i Kigali, yashinzwe imirimo muri Jandarumori (Gendarmerie) y’igihugu ijyanye no gucunga umutungo. Kuva mu mwaka wa 1978 kugeza mu 1979 yimuriwe muri Ministeri y’Ingabo muri serivisi zishinzwe umutungo. Aha ntiyahatinze kuko yahise ajya mu yandi mahugurwa mu Bubiligi, hari mu 1980.

Uwo mwaka w’ 1980 ujya kurangira yagiye gukora muri Etat Majoro ya Gendarmerie aho yari ashinzwe icungamutungo (logistic). Mu mwaka wa 1982 yimuriwe mu mutwe wa Gendarmerie witwaga uw’ubwubatsi kugera mu 1989. Ubwo yahise yimurirwa mu mutwe wa Gendarmerie witwaga Groupe mobile ya Kigali.

Ibyo ingabo zahoze ari iza RPA zateraga u Rwanda, Rwarakabije niwe wari uyoboye uwo mutwe ndetse uza no guhinduka batayo ya gisirikare. Yarwanye urwo rugamba kuva mu 1990 kugera mu 1992, aza kuhava yerekeza mu mutwe bigata G3 yagumyemo kugeza mu 1994 ubwo ingabo za Leta ya mbere ya Jenoside zatsindwaga.

Ubwo Rwarakabije yahise ahungira muri Repubulika Iharanira Demokarasi ya Kongo, icyo gihe yari umusirikare ufite ipeti rya Lieutenant Colonnel yahawe mu 1993. Ageze muri icyo gihugu, yagiye mu Nkambi ya Katale muri Rutshuru.

Intambara yo kubohora u Rwanda kuva yatangira, gukomeza kugera no mu gihe cya Jenoside, Rwarakabije yahaburiye umuryango we, urimo umugore we wa mbere n’abana bari bafitanye bose bahaburiye ubuzima.

Rwarakabije akigera muri Congo yahise ajya mu nkambi ya Katale muri Rutshuru, nyuma akajya akunda kujya no mu nkambi ya Mugunga yari hafi y’Umujyi wa Goma ; ahabaga ubuyobozi bukuru bw’ingabo z’abahoze ari abasirikare b’u Rwanda mbere ya 1994 (EX FAR). Aho yahabaye kuva mu 1994 kugeza mu 1996 ubwo inkambi zasenywaga n’ingabo z’u Rwanda kuko haturukaga ibitero byatezaga umutekano mucye mu Rwanda. Muri uwo mwaka inkambi zimaze gusenywa ; impunzi nyinshi zarimo n’abahoze ari abasirikare baratashye mu Rwanda.

Ubwo Rwarakabije yakomereje urugendo i Masisi naho ho muri Repubulika Iharanira Demokarasi ya Kongo, aho yabaye kugeza mu 1997. Muri Nyakanga 1997 yaje mu Rwanda ayoboye ibitero by’abacengezi, arahaguma kuva muri Nyakanga 1997 kugera mu Kwakira 1998. Icyo gihe ingabo z’u Rwanda zaje kubasubiza inyuma asubira muri Kongo, aho yabaye kugeza muri 2003.

General Major Paul Rwarakabije yatahutse mu Rwanda mu mwaka wa 2003, nyuma yo kubona ko igihe cyose yari amaze arwana ntacyo bizamugezaho. Hagati aho ariko, bamwe mu barwanyi ba Rwarakabije bafatwaga n’ingabo z’u Rwanda ntibabice ahubwo bakabajyana mu mahugurwa mu bigo nka Nkumba na Mudende.

Muri 2001 ingabo z’igihugu zafashe abarwanyi be 1700 bahugurirwa muri ibyo bigo ; barangije igihugu kibohereza iwabo, ibyo bituma abari basigaye bibaza ibyo barimo. Ibyo kandi byabaye igihugu cyarabashishikarizaga gutaha mu gihugu cyabo.

General James Kabarebe wari umugaba mukuru w’ingabo z’u Rwanda icyo gihe, yamuhamagaye kuri telefoni mu rwego rwo kumuhamagarira gutahuka nk’uko byari muri gahunda ya Leta yo gushishikariza Abanyarwanda bari hanze gutahuka. General James Kabarebe yamusobanuriraga ko ibyo batekereza ntacyo bizabagezaho, kandi ko mu ngabo z’u Rwanda harimo abo babanye benshi. Yamusabye kumwohereza bamwe mu ba Ofisiye be mu Rwanda kureba uko igihugu kimeze nyuma bakazasubirayo kumu amakuru, ariko uwo yabwiraga wese yarabyangaga kubera ubwoba.

Ajya gutahuka, yari kumwe na bagenzi be mu Ntara ya Kivu y’Amajyepfo ; ababwira ko agiye kugirana amasezerano n’abayobozi b’u Rwanda, akababwira ko bahurira i Bukavu, nyamara bwari uburyo bwo gutaha. Yavuganye n’Umugaba mukuru w’Ingabo z’u Rwanda ; General James Kabarebe uburyo yamufasha agataha mu Rwanda. Icyo gihe Rwarakabije yabwiye abamurindaga kumuherekeza ; bahise bambuka mu Rwanda aho General James Kabarebe yari yabiteguye.

Akigera mu gihugu, ntabwo yabanje gushingwa imirimo ikomeye, ahubwo yabanje kuzenguruka igihugu asobanura impamvu yatahutse. Yahereye aho avuka agera no mu gihugu hose.

Ageze mu Rwanda, mu mwaka wa 2004 igihugu cyamusubije mu ngabo z’igihugu ku ipeti yari agezeho rya General i Major. Nyuma mu mwaka wa 2005 yaje kwimurirwa muri Komisiyo ishinzwe gusezerera no gusubiza mu buzima busanzwe abahoze ku rugerero maze afatanya na Komisiyo gushishikariza abandi gutaha. Yahakoze kuva mu mwaka wa 2005 kugera mu 2011 muri Nyakanga yahabwaga imirimo yo kuyobora Ikigo gishinzwe imfungwa n’abagororwa (RCS), ariko akomeza kuba umwarimu muri Komisiyo yo gusezerera no gusubiza mu buzima busanzwe abahoze ku rugerero. Yakoze muri iki kigo, kugeza mu ntangirizo z’uyu mwaka ubwo yasimburwaga kuri uwo mwanya, ndetse mu ntangiriro z’uku kwezi akaba yaranasezerewe mu gisirikare cy’u Rwanda, ajya mu kiruhuko cy’iza bukuru.

KANDA HANO UREBE VIDEOS UTASANGA AHANDI