Menya byinshi kuri Jenerali Rwarakabije wahoze arwanya Leta y’u Rwanda ubu akaba ayikorera

Chief Editor | 2-05-2016
Menya byinshi kuri Jenerali Rwarakabije wahoze arwanya Leta y’u Rwanda ubu akaba ayikorera

Jeneral Majoro Paul Rwarakabije, yari amaze igihe kirekire ari umwe mu bayobozi bakuru mu Rwanda, dore ko aherutse gusimburwa ku mwanya w’ubuyobozi bukuru bw’urwego rw’imfungwa n’abagororwa ku rwego rw’igihugu. N’ubwo atakiyobora urwego rw’imfungwa n’abagororwa kugeza ubu, n’ubundi akorera Leta y’u Rwanda kuko anasanzwe ari muri Komisiyo ishinzwe gusezerera no gusubiza mu buzima busanzwe ingabo zavuye ku rugerero. Uyu mugabo nyamara ni umwe mu barwanyaga Leta y’u Rwanda yivuye inyuma, nyuma akaza gufata icyemezo cyo kwitandukanya n’abacengezi agahitamo kuza gufatanya n’abandi kubaka u Rwanda. Muri iyi nyandiko, turabagezaho byinshi ku buzima n’imibereho bya Rwarakabije.

Jenerali Majoro Paul Rwarakabije yavukiye mu cyahoze ari Perefegitura ya Ruhengeri, kuri ubu ni mu Karere ka Nyabihu ; mu Kagari ka Nyamugari ; Umudugudu wa Kizunga mu Ntara y’Uburengerazuba. Yavutse ku wa 15 Mata 1953; akaba yarashatse afite umugore n’abana babiri.

Jenerali Rwarakabije yize amashuri yisumbuye kuri Saint André mu Mujyi wa Kigali ; akomereza mu ishuri rikuru rya Gisirikare ry’i Kigali mu 1973 arangiza mu 1977. Yasohotse muri iyo Kaminuza ya gisirikare afite icyiciro cya kabiri cya kaminuza (Licence) mu bijyanye n’imbonezamubano n’igisirikare ( Sciences Sociales et militaires).

Aganira n’ikinyamakuru Izuba Rirashe mu minsi yashize, yatangaje ko yagiye gukomereza mu gihugu cy’u Bufaransa ; akamarayo umwaka mu mahugurwa ya gisirikare mu bijyanye n’itumanaho. Yakomeje akora amahugurwa mu bya gisirikare aho mu mwaka wa 1985 na 1990 yayakoreye mu ishuri rikuru rya gisirikare rya Kigali. Nyuma yagiye akora ingendo-shuri mu Bubiligi. Mu mwaka wa 1990 ; yari afite ipeti rya Majoro.

Imirimo yakoze

Jenerali Majoro Rwarakabije yavuze ko akirangiza mu Ishuri rikuru rya gisirikare ry’i Kigali yashinzwe imirimo muri Jandarumori (Gendarmerie) y’igihugu ijyanye no gucunga umutungo. Kuva mu mwaka wa 1978-1979 yimuriwe muri Ministeri y’Ingabo muri serivisi zishinzwe umutungo. Ati “ Ntabwo natinzemo kuko nahise njya mu yandi mahugurwa mu Bubiligi, ubwo hari mu 1980”.

Uwo mwaka w’ 1980 ujya kurangira yagiye gukora muri Etat Majoro ya Gendarmerie aho yari ashinzwe icungamutungo (logistic). Akomeza agira ati “ Mu mwaka wa 1982 nimuriwe mu mutwe wa Gendarmerie witwaga uw’ubwubatsi kugera mu 1989. Ubwo nahise nimurirwa mu mutwe wa Gendarmerie witwaga Groupe mobile ya Kigali”.

Yavuze ko uwo mutwe wari ufite inshingano eshatu. Iya mbere wari ushinzwe kwigisha abajandarume (aba polisi) bato bagisohoka mu ishuri rya Gendarmerie. Iya kabiri ; wari ushinzwe discipline muri gendarmerie ; iya gatatu ukaba wari ushinzwe kunganira ingabo z’igihugu igihe byakomeye mu ntambara.

Yagize ati “ Ni muri urwo rwego ingabo za RPA/FPR zitera mu 1990 ; nagiye ku rugamba ari njye Komanda w’uwo mutwe (Commander). Uwo mutwe waje kwitwa batayo ya gatanu ubwo nari ku rugamba ; nayoboye kugera mu 1992 mu kwezi kwa Kamena”.

Muri uko kwezi kwa Kamena ngo yimuriwe muri Etat Major ya Jandarumeri ashingwa ibikorwa bya Jandarumeri ari byo bitaga mu gisirikare ; G3. Ati “ Nakoreye aho kugera mu 1994 ubwo ingabo za FPR- Inkontanyi zadutsindaga. Ubwo imirimo yanjye yahise irangirira aho”.

Ahungira muri Congo – Kinshasa

Jenerali Paul Rwarakabije yavuze ko ubwo yahise ahungira muri Congo afite ipeti rya Liyetona Koloneli yahawe mu mwaka wa 1993. Ati “ Amapeti yatangagwa atinze kuko nagombaga kuba nararihawe mu 1992”.

Ubuzima bwe muri Congo

Rwarakabije akigera muri Congo yahise ajya mu Nkambi ya Katale muri Rutshuru. Ati“ Ariko kubera ibikorwa bya gisirikare byakomeje kwisuganya nabijyagamo mu Nkambi ya Mugunga yari hafi y’Umujyi wa Goma ; kuko ariho habaga Etat Major y’abahoze ari abasirikare b’u Rwanda mbere ya 1994 (EX FAR). Ni ukuvuga kuva mu 1994-1996 aho inkambi zaje gusenywa n’ingabo z’u Rwanda kuko haturukaga ibitero byatezaga umutekano muke mu Rwanda. Muri uwo mwaka inkambi zimaze gusenywa ; impunzi nyinshi zarimo n’abahoze ari abasirikare baratashye mu Rwanda”.

Aho yakomereje inkambi zimaze gusenywa

Jenerali Rwarakabije yatangaje ko yakomereje urugendo i Masisi/Zaire kugeza mu 1997. Ati “Muri Nyakanga 1997 naje mu Rwanda ntari umugenzi ahubwo nari nyoboye ibitero by’abacengezi. Nahagumye kuva muri Nyakanga 1997 kugera mu Kwakira 1998”.

Yavuze ko icyo gihe ingabo z’igihugu zabashubije inyuma basubira muri Congo. Ati “Kuva umwaka wa 1998 urangira kugera mu wa 2003 nari mu barwanyi b’abacengezi”.

Icyatumye atahuka

Jenerali Paul Rwarakabije yavuze ko yatahutse mu Rwanda mu mwaka wa 2003. Ati “Hari impamvu eshatu zatumye ntahuka. Iya mbere, Nararwanye kuva mu 1990 kugera mu 2003 ; mbona intambara ndimo ntaho ziganisha ; mbese ni isuzuma ntambara nakoze. Impamvu ya kabiri yatumye ntahuka ni ibitero twagabaga ku gihugu cy’u Rwanda. Abaturage bari mu gihugu baduhaga amakuru bavuga ko ibitero dutera u Rwanda ntacyo bimaze uretse kubamarisha."

Impamvu ya gatatu ikomeye yatanze ni igitero ngo bateye u Rwanda mu mwaka wa 2001 mu kwezi kwa Gicurasi. Ati “Abarwanyi nari nyoboye bagendaga bafatwa n’ingabo z’u Rwanda kuko zari zarahinduye uburyo bwo kurwana ; aho bafataga abarwanyi banjye ntibabice ahubwo bakabajyana mu mahugurwa mu bigo nka Nkumba na Mudende”.

Yavuze ko ingabo z’igihugu zafashe abarwanyi be 1700 bahugurirwa muri ibyo bigo ; barangije ngo igihugu kibohereza iwabo. Ati “ Ubwo buryo bwatumye ntekereza byinshi. Abaje muri icyo gitero basubiye muri Congo bari bake cyane kuko benshi bari barafashwe bajyanwa mu mahugurwa. Ibyo byatumye abari basigaye bibaza ibyo barimo. Ibyo kandi byabaye igihugu cyaradushishikarizaga gutaha mu rwatubyaye.”

Yavuze ko atigeze atekereza ko yatahuka ariko mu mwaka wa 2003 afata icyemezo. Ati “Mu 2003 twateye ikindi gitero ku Rwanda kuko twari twabonye umusada wa bagenzi bacu bari baragiye mu ngabo za Congo. Baraje dukorera hamwe mu Burasirazuba bwa Congo. Tumaze kubona abantu bashya n’ibikoresho ; twahise dutekereza uko twatera ikindi gitero ku Rwanda. Twabanje kubitekerezaho kuko twari tumaze kumenya uko ingabo z’u Rwanda zirwana ; ntabwo icyo gitero twacyumvikanyeho. Ku giti cyanjye narebaga uko intambara twarwanaga ntacyo zatugezagaho ; mpita mbona ko n’icyo gitero ntacyo kizageraho.”

Yahamagawe na Jenerali James Kabarebe

Rwarakabije yavuze ko hari abantu biganye bamuhaga amakuru y’u Rwanda akiri muri Congo. Yavuze ko Jenerali James Kabarebe wari umugaba mukuru w’ingabo z’u Rwanda icyo gihe yamuhamagaye kuri telefoni mu rwego rwo kumuhamagarira gutahuka nk’uko byari muri gahunda ya Leta yo gushishikariza Abanyarwanda bari hanze gutahuka.

Ati“Hari umuntu waduhuje (na Jenerali James Kabarebe) n’ubwo twari mu mashyamba ; turavugana n’ubwo byari bikomeye kuko umwe atashakaga kuvugana n’undi. Yambazaga amakuru nkamusubiza na we akansubiza. Ubwo muri icyo gitero twari twateguye ; bamwe muri twe bari barageze mu Rwanda barafatwa.”

Yavuze ko Jenerali James Kabarebe yamusobanuriraga nk’umugabo akamubwira ko ibyo batekereza ko ntacyo bizabagezaho. Ati “Yambwiraga ko mu ngabo z’u Rwanda harimo abo twabanye benshi. Yansabye kumwohereza bamwe mu ba Ofisiye banjye mu Rwanda kureba uko igihugu kimeze nyuma bakazagaruka kumpa amakuru.”

Rwarakabije yavuze ko abo yabwiraga bose (aba ofisiye be) babyangaga kubera ubwoba. Ati “ Icyo gihe ariko nari narafashe icyemezo cyo gutaha”.

Gutahuka kwa Jenerali Rwarakabije

Asobanura ibyo gutahuka kwe, Rwarakabije yagize ati: “Ubwo twari mu Ntara ya Kivu y’Amajyepfo ; nabwiye abo twari kumwe ko ngiye kugirana amasezerano n’abayobozi b’u Rwanda ko duhurira i Bukavu. Ariko bwari uburyo bwo gutaha. Navuganye n’Umugaba mukuru w’Ingabo z’u Rwanda ; Jenerali James Kabarebe uburyo yamfasha ngataha mu Rwanda. Nabwiye abandindaga kumperekeza ; icyo gihe twahise twambuka mu Rwanda kuko Jenerali Kabarebe yari yarabiteguye. Hari mu mwaka wa 2003."

Yakomeje avuga ko mu mwaka wa 2004 igihugu cyamusubije mu ngabo z’igihugu ku ipeti yari agezeho rya Jenerali Majoro. Nyuma mu mwaka wa 2005 aza kwimurirwa muri Komisiyo ishinzwe gusezerera no gusubiza mu buzima busanzwe abahoze ku rugerero.

Ati “Nakoze nisanzuye mfatanya na Komisiyo gushishikariza abandi gutaha. Nahakoze kuva mu mwaka wa 2005 kugera mu 2011 muri Nyakanga ari bwo igihugu cyanshinze imirimo yo kuyobora Ikigo gishinzwe imfungwa n’abagororwa (RCS)... Ariko n’ubu ndacyari umwarimu muri Komisiyo yo gusezerera no gusubiza mu buzima busanzwe abahoze ku rugerero”.

Uko yakiriye imirimo avuye muri Congo

Yabajijwe nk’umusirikare wari uhagarariye umutwe wahungabanyaga umutekano w’u Rwanda uburyo yakiriye amakuru y’uko yahawe akazi keza n’abo yarwanyaga, maze agira ati “ Nkigera mu gihugu ntabwo nabanje gushingwa imirimo ikomeye ; nabanje kuzenguruka igihugu nsobanura impamvu natahutse. Nahereye aho mvuka ngera no mu gihugu hose. Gushingwa imirimo ikomeye numvise ari ikintu gikomeye kuko nta mirimo natekerezaga. Muri Nyakanga 2004 numvise bansubije mu ngabo z’igihugu ku ipeti ryanjye rya Jenerali Majoro. Numvise umutima wanjye wikanze ; birandenga. Kumva abantu twarwanaga bampa umurimo ; byarandenze sinabona uko nabisobanura”.

Itandukaniro hagati y’igisirikare cya Leta ya Habyarimana n’icy’ubu

Muri icyo kiganiro ; Jenerali Rwarakabije yavuze ko mbere ya 1994 abantu bose atariko bemererwaga kuba abasirikare kuko hari ivangura mu gisirikare. Ati “Ntabwo bose bemererwaga kujya mu gisirikare. Abahutu bari 99% abandi basigaye ari 1%. Ubu rero buri wese yemerewe kujya mu gisirikare ; nta vangura rikibaho. Ni yo mpamvu Abanyarwanda bisanga mu ngabo z’igihugu.”

Ikibi atazigera yibagirwa mu buzima yabayemo bwa gisirikare

Umunyamakuru yabajije Jenerali Majoro Rwarakabije ikintu atazibagirwa mu mibereho ye yo mu gisirikare ; maze agira ati “ Naje mu gisirikare ngiye kurwanira umutekano. Intambara yarabaye numva nta kibazo kuko nari narize kurwana ; ariko Jenoside yakorewe Abatutsi yabaye gutsindwa (Echec) ku ngabo z’igihugu. Uzi kubona abantu bashira kandi bafite ingabo zishinzwe kubarinda ? Ku giti cyanjye kandi umuryango wanjye warashize ; abo twavaga inda imwe ; umugore wanjye wa mbere n’abana bapfa kubera intambara. Iyo ni echec (gutsindwa) ; ibyo ni bimwe mu byo ntazibagirwa.”

Icyiza atazigera yibagirwa mu buzima yabayemo bwa gisirikare

Icyo cyiza atazibagirwa nta kindi ngo ni icyubahiro yahawe n’abo yarwanyaga ubwo bamuhaga umwanya ukomeye. Ati “ Ibyo byarandenze. Tumaranye imyaka irenga 10 dukorana neza”.

Abatahutse abigezemo uruhare

Abajijwe umubare w’Abanyarwanda bamaze gutahuka abigizemo uruhare ; Jenerali majoro Rwarakabije yagize ati “Ndagira ngo ntirase cyane ; abasirikare bamaze gutahuka barenze 10.000. Ariko si njye njyenyine wabigizemo uruhare n’ubwo ari njye wabayoboraga ahubwo nafatanyije n’igihugu na politiki nziza yacyo hamwe na Komisiyo.”

Yavuze ko n’abasivili bamaze gutahuka kuri ubu bamaze kuba benshi. Ati “ Abasigaye hanze ni bake cyane na bo kandi baba baratashye ni uko babuze akayira kuko bafashwe bugwate. Igiteye ishema ni uko abatashye bose nta n’umwe wigeze gutekereza gusubirayo. Bose babanye neza n’abo basanze.”

KANDA HANO UREBE VIDEOS UTASANGA AHANDI