Menya uko Mbabazi yinjiye mu gisirikare cyabohoye u Rwanda n’icyabimuteye

Chief Editor | 4-07-2016
Menya uko Mbabazi yinjiye mu gisirikare cyabohoye u Rwanda n’icyabimuteye

Mbabazi Annonciata uhagarariye abagore bahoze ari abasirikare mu karere ka Gasabo, yinjiye mu ngabo zari iza RPA / Inkotanyi mu mwaka w’1990 avamo mu 1999 ahita asubira mu buzima busanzwe, akomeza amashuri ubu ni “Engineer” mu ikoranabuhanga. Avuga ko n’ubwo yarasiwe ku rugamba atigeze abyicuza kubera ishyaka yari afite ryo kubohoza igihugu.

Mbabazi yavukiye mu gihugu cya Uganda, kuva avutse akaba yarasanze bari mu buhunzi. Agira ati “ Natangiye guca akenge nsanga ababyeyi banjye ari impunzi, baza kumbwira amateka, bituma menya amateka y’igihugu cyacu ko dufite igihugu kandi ko i Bugande atari iwacu. Nkurana ishyaka ryo kumva ko ngomba kumenya amateka y’igihugu cyanjye, kugeza aho byabaye ngombwa urugamba rutangiye nanjye nkumva ko ngomba kugira uruhare mu kukibohoza. Icyo gihe nataye amashuri kuko narigaga”.

Kuba bamwe mu bagore bavugwaho gukunda kugira ubwoba, iki si ikibazo cya Mbabazi. Agira ati “ Nko ku giti cyanjye sogokuru yari yarishwe, yicwa azira ubwoko bwe mu 1959 agwa i Nyagatare. Bituma data ahunga. Maze guca akenge mbaza data nti sogokuru aba he? Byanteye gukurikirana no kwibaza byinshi. Bituma mfata icyemezo cyo kwinjira mu gisirikare ngamije kubohora igihugu”.

Ibi ngo byatumye gukora igisirikare bimworohera cyane kuko ngo yari yariyemeje. Akomeza agira ati “Ku bwanjye nari nariyemeje, ku buryo numvaga ikizambaho cyose nta kibazo. Nari umusirikare, nararwanaga yemwe nkanarwana ndi mu basirikare b’imbere kugeza n’igihe naje kuraswa. N’ubwo narashwe ntabwo nicujije kubera ko nari nzi icyo nshaka”.

Ahamya ko yakoraga akazi neza nk’abagabo kuko aho abagabo bagendaga na we yahagendaga. Byongeye kandi, Mbabazi ngo ntiyemeranywa n’abantu bavuga ko umugabo hari umurimo yakora umugore atakora kuko ngo byose biterwa no mu mutwe w’umuntu.

Mu mwaka ushize ubwo yagiranaga ikiganiro na Imvaho Nshya, yavuze ko kugeza ubu ikintu cyamushimishije kurusha ibindi ari uko yabashije kugera mu gihugu no kuba ari mu Rwanda yarwaniye ari muto, agakomereka cyane ari muto, ariko ubu akaba arurimo. Ati “Ndishimye cyane. Ikindi nshimishijwe n’uko igihugu cyacu gifite umutekano, buri munyarwanda wese afite amahoro”.

Nyuma y’urugamba rwo kwibohora yakomeje amashuri ye arangiza Kaminuza mu ikoranabuhanga mu bucuruzi. Ubu akorera ikigo cya E- ICT, ikigo kigisha abantu ibijyanye n’ubumenyi mu ikoranabuhanga.

KANDA HANO UREBE VIDEOS UTASANGA AHANDI