Minisitiri w’Ubutabera yagize icyo avuga ku muryango uvuga ko wasohowe mu nzu ku karengane

Chief Editor | 6-08-2016
Minisitiri w’Ubutabera yagize icyo avuga ku muryango uvuga ko wasohowe mu nzu ku karengane

Nyuma y’inkuru twabagejejeho ivuga akarengane umuryango wasohowe mu nzu ku Kacyiru uvuga ko wakorewe kuva mu 1998, Minisitiri w’Ubutabera akaba n’Intumwa nkuru ya Leta y’u Rwanda, Johnston Busingye, yahaye ikinyamakuru Ukwezi.com ibisobanuro kuri iki kibazo anavuga icyo Minisiteri ayobora yabashije kugikoraho. Ibikubiye muri iyi nkuru ni ibyavuye mu nyandiko yadushyikirije.

SOMA INKURU YABANJE HANO: Kigali: Inzira y’agahomamunwa yatumye umukecuru w’imyaka 75 asohorwa akarazwa hanze

IBIKUBIYE MU BYATANGAJWE NA MINISITIRI BUSINGYE JOHNSTON:

Iyi nyandiko ikubiyemo gusa ibijyanye n’ubutabera, imanza zaciwe, uko zakurikiranye n’uburyo zagiye zirangizwa. Ibindi bikubiye mu nkuru bitageze mu butabera ntacyo tubivuzeho.

Abagabo batatu : Djumapili John, Kambali na Shema bashinze company yitwa BADER. Nyuma BADER isaba kandi ihabwa inguzanyo na BCR . Nyuma y’igihe BCR yaje kubona ko inguzanyo itishyurwa uko bikwiye itanga ikirego mu Rukiko Rwisumbuye rwa Nyarugenge mu wa 2001, urubanza ruburanishwa mu mwaka wa 2006.

Urubanza mu Rukiko Rwisumbuye

Amafaranga BCR yasabaga kwishyurwa ni 34.193.006 Frw yari asigaye atarishyurwa n’inyungu zayo byose hamwe bikaba 83,754.031 Frw. Ku munsi w’iburanisha ry’urwo rubanza abo bagabo ntibitabye kandi ngo bari barahamagawe mu buryo bukurikije amategeko. Urukiko rwategetse ko BADER, Djumapili, Kambari na Shema bafatanya kwishyura 92,131.403 Frw.

Urubanza mu Rukiko Rukuru

Nyuma yo kumenyeshwa imikirize y’urubanza, uwitwa Kambali yararujuririye mu mu mwaka wa 2007 mu Rukiko Rukuru rw’Ubucuruzi, ruburanishwa mu mwaka wa 2008, urukiko rwemeza ko Kambali atari mu bagombaga kwishingira BADER.

Urubanza Rukiko rw’Ikirenga

BCR ntiyishimiye imikirize y’urwo rubanza maze irujuririra mu Rukiko rw’Ikirenga mu mwaka wa 2008, ruburanishwa mu mwaka wa 2010. Urukiko rw’Ikirenga mu rubanza RCom AA 0014/08/CS rwemeza ko Kambali ari mu bagomba kwishingira BADER maze rumutegeka gufatanya na Jumapili, Shema na BADER kwishyura amafaranga agera kuri 80,137,766 Frw. Uru rubanza rwabaye itegeko. Kugeza ubu, nta kindi cyemezo cy’Urukiko na kimwe gihari kirubuza kurangizwa.

Ibyakurikiye ikiza ry’urubanza

Nyuma y’ikiza ry’urwo rubanza hari amakuru avuga ko SHEMA yaje kujya kuba hanze ndetse aza kwitaba Imana. BCR nayo yaje guhinduka I&M Bank. I&M Bank yatangiye kwishyuza Djumapili na Kambali. Umuhesha w’inkiko yavuze ko nta mitungo yashoboye kubona ya BADER ngo iherweho hishyurwa ibyategetswe n’Urukiko.

Icyemezo cya Perezida w’Urukiko gishyiraho umunsi wa cyamunara

Tariki ya 26/2/2015 Perezida w’Urukiko rw’Ubucuruzi rwa Nyarugenge yatanze icyemezo cyo kugurisha muri cyamunara ikibanza No 919 cya Djumapili John n’ikibanza No 817 cya Kambali Bigishiro na Bamurange Jeanne, iyo cyamunara ikaba yaragombaga kuba ku wa 02/04/2015.

Gutakamba kwa Djumapili mu Rugaga rw’Abahesha b’Inkiko no muri Minisiteri y’Ubutabera

Tariki ya 25/01/2016, Djumapili yandikiye Perezida w’Urugaga rw’Abahesha b’Inkiko agenera copy Ministiri w’Ubutabera asaba ko umuhesha w’inkiko MUNYETWALI Willy yahagarika cyamunara ashaka gukora ku nzu ye arangiza urubanza RCom AA 0014/08/CS ngo kuko harimo akarengane. Yasobanuraga ko BADER ifite imitungo bityo ko ari yo ikwiye guherwaho hishyurwa uwo mwenda, ndetse ko atari nawe wenyine ukwiye kwishyuzwa kandi urukiko rwarategetse ko afatanya na bagenzi be babiri kwishyura. Perezida w’Urugaga rw’Abahesha b’Inkiko avuga ko yamwakiriye akamwereka ko ibyo umuhesha w’inkiko arimo gukora bikurikije amategeko ku buryo nta karengane karimo.

Icyo Minisiteri y’Ubutabera yakoze

Minisiteri y’Ubutabera nayo yakiriye Djumapili imuhuza n’umuhesha w’inkiko wariho urangiza urwo rubanza, bemeranya ko Djumapili agiye kwereka uwo muhesha w’Inkiko imitungo ya BADER ikazaba ariyo iherwaho mu kwishyura. Umuhesha yemeye gusubika cyamunara ategereza ko Djumapili amwereka aho iyo mitungo ya BADER iherereye. Umuhesha w’inkiko asobanura ko iyo mitungo ntayo yeretswe bikaba ari byo byatumye asubukura gahunda ya cyamunara ku mitungo ya Djumapili. Bitewe n’ubwishingire bwari bwarakozwe, I&M Bank n’umuhesha w’inkiko wayo bakomeje kwishyuza uwo babonaga afite umutungo wavamo ubwishyu. Ibi byemewe n’Amategeko.

Ikirego cyatanzwe na Madamu wa Djumapili

Umuhesha w’inkiko asobanura ko uwashakanye na Djumapili yatanze ikirego mu Rukiko rw’Ubucuruzi atambamira cyamunara ku mutungo wa Djumapili ngo kuko bawusangiye kandi akaba atazi uburyo watanzweho ingwate. Ngo Urukiko rwanzuye ko ikiguzi kizava muri uwo mutungo, ½ ari cyo kigomba kwishyurwa I&M Bank ikindi kigahabwa uwo bashakanye.

Cyamunara ku mutungo wa Djumapili

Cyamunara ku mutungo wa Djumapili yasubitswe inshuro zirenga icumi, ku mpamvu zinyuranye zirimo no kubura umuguzi. Umuryango wa Djumapili, uvuga ko wakoresheje expertise (igenagaciro) y’inzu n’ikibanza byagurishijwe bigahabwa agaciro ka miliyoni 495. Umuhesha w’inkiko we expertise yari yarakoresheje yari hagati ya miliyoni 250 na 300. Nyuma y’inshuro nyinshi cyamunara isubikwa, tariki ya 01/5/2016 inzu ya Djumapili yaje kubona umuguzi igurwa miliyoni 200 na Madamu MUKAMUGANGA Marie. Umuhesha w’Inkiko avuga ko yagiye munsi y’agaciro ka expertise yari yarakoresheje ngo kuko yari yarabuze umuguzi utanga ayo mafaranga ibi byemewe n’amategeko. Uwo munsi cyamunara iba, Djumapili yari ahari ariko yanze gusinya ku nyandikomvugo ya cyamunara. Mu mafaranga yavuye muri cyamunara hishyuweho ideni rya I&M Bank, andi asigaye ashyirwa kuri account ya Supreme Court nk’uko itegeko ribiteganya. Djumapili yahabwa ayo mafaranga nyuma yo kwerekana ko ari we nyirayo.

Ibyakurikiye cyamunara

Tariki ya 05/06/2016 Djumapili yagiranye amasezerano n’uwatsindiye inzu ye muri cyamunara (MUKAMUGANGA) ko azaba yayimuhaye bitarenze iminsi ibiri (ni ukuvuga bitarenze 08/06/2016). Icyo gihe cyarenze Djumapili adatanze iyo nzu.

Djumapili yatanze ikirego mu Rukiko rw’Ikirenga cyerekeye irangizwa ry’urubanza, arega I&M Bank na Kambali, urubanza rwahawe No RCom 0018/16/CS rukaba ruzaburanishwa ku wa 20/09/2016.

Uwashakanye na Djumapili yongeye gutanga ikirego mu Rukiko rw’Ubucuruzi arega umuhesha w’inkiko avuga ko umutungo wabo wagurishijwe amafaranga make (200,000,000 Frw) mu gihe expertise bakoresheje yari yarawuhaye agaciro ka 495,000,000 Frw.

Mu gihe urwo rubanza rwari rutaraburanishwa, yatanze ikindi ikirego cyihutirwa asaba ko batakurwa mu nzu kugeza igihe urwo rubanza ruzaburanishirizwa mu mizi. Icyo kirego cyihutirwa cyaburanywe ku wa 28/6/2016 urubanza rusomwa ku wa 29/06/2016 ubusabe bwo kutabakura mu nzu ntibwemerwa.

Guhabwa inzu MUKAMUGANGA Marie yatsindiye

Nyuma y’ibyo byose ni bwo uwatsindiye inzu muri cyamunara yashatse umuhesha w’inkiko: MUTIGANDA Louis wo kumuhesha inzu ye. Tariki ya 31/5/2016 uwo muhesha w’inkiko yandikiye DPC/Gasabo asaba abapolisi bo kumufasha mu gikorwa cyo kuvana Djumapili mu nzu, arongera yandika indi baruwa tariki ya 15/6/2016 yibutsa DPC/Gasabo icyo kibazo ndetse ku wa 21/06/2016 uwo muhesha yandikiye IGP amusaba ko yahabwa ubufasha bw’abashinzwe umutekano no ku wa 28/7/2016 yongera kwandikira DPC/Gasabo.

Tariki ya 21/6/2016, MUKAMUGANGA wari waratsindiye inzu ya Djumapili muri cyamunara yagejeje ikibazo cye kuri Minisitiri w’Ubutabera avuga ko Umuhesha w’inkiko yanze kumuhesha inzu ye nk’uko babyemeranyijwe mu masezerano bagiranye. Nyuma yo gukurikirana ikibazo, MINIJUST yasanze uwo muhesha nta kosa afite ahubwo yaragize imbogamizi zo kubona ubufasha bw’abashinzwe umutekano.

Tariki ya 01/08/2016, uwo muhesha w’inkiko MUTIGANDA Louis yahawe ubufasha bw’abashinzwe umutekano, avana umuryango wa Djumapili mu nzu.

· Kugeza ubu turasanga ibyakozwe byarondowe haruguru byarubahirije amategeko.

· MUKAMUGANGA Marie afite inzu yaguze mu buryo bwemewe n’amategeko.

· Imanza, urwo Djumappili yareze I&M na Kambali, n’urwo uwashakanye na Djumapili yareze Umuhesha w’Inkiko ntiziraburanishwa. Djumapili akwiye gutegereza ibyemezo bizafatwa. Natwe n’uko.

UMUGEREKA:
Ikinyamakuru Ukwezi.com cyabajije Minisitiri w’Ubutabera ibijyanye no kuba cyamunara ubwayo, umuryango wa Djumapiri uvuga ko yabayemo uburiganya kandi igakorwa mu buryo budakurikije amategeko, kuko umunsi cyamunara ikorwa, uwatsinze atigeze yishyura ahubwo yagiranye amasezerano n’umuhesha w’inkiko avuga igihe azishyurira ndetse n’igihe yatanze cyo kwishyura nacyo nticyubahirizwe kuko cyarenzeho iminsi ibiri, ibyo byose tukaba twarabashije kubona kopi zibigaragaza.

Aha Minisitiri yasubije agira ati: "Ibyabaye mu nzego z’ubutabera nibyo twavuze uko tubibona. Ibyo bibazo ugaragaje ntacyo twabivugaho mu gihe hari imanza zishingiye ku irangizwa ry’urubanza. Amategeko adusaba kubyirinda. Niba famille Djumapili bumva hari akarengane byabateje ndumva bazakagaragariza Urukiko rukabifataho ibyemezo kimwe n’ibindi".

KANDA HANO UREBE VIDEOS UTASANGA AHANDI