Mu guherekeza Depite Nyandwi Désiré, havuzwe byinshi byerekana ubutwari bwe - Amafoto

Chief Editor | 17-10-2016
Mu guherekeza Depite Nyandwi Désiré, havuzwe byinshi byerekana ubutwari bwe - Amafoto

Kuri uyu wa Mbere tariki 17 Ukwakira 2016, Abadepite, Abasenateri n’abandi banyacyubahiro batandukanye bitabiriye umuhango wo gusezera bwanyuma kuri Depite NYANDWI Joseph Désiré watabarutse mu cyumweru gishize, nyuma habaho igitambo cya Misa cyabereye muri Regina Pacis i Remera, mbere yo kujya kumushyingura mu cyubahiro i Rusororo.

Mu butumwa bw’abayobozi batandukanye, hasobanuye ubutwari, umurava no gukunda igihugu byarangaga nyakwigendera NYANDWI Joseph Désiré watabarutse kuwa Gatanu tariki 14 Ukwakira 2016 aguye mu bitaro byitiriwe umwami Faycal biri ku Kacyiru mu mujyi wa Kigali.

Mu butumwa bwa Nyakubahwa Perezida wa Repubulika, bwasomwe na Tugireyezu Venantie, Minisitiri mu biro bya Perezida wa Repubulika, yavuze ko, Igihugu n’Abanyarwanda, tubuze umuyobozi n’umukozi mwiza warangwaga n’ukuri no gukunda igihugu n’Abanyarwanda.

Umunyamabanga Mukuru w’Umuryango FPR Inkotanyi Ngarambe Francois, yavuze ko Depite Nyandwi asize umurage mwiza w’umugabo w’umukozi.

Depite Mukabalisa Donatille, Perezidante w’Inteko Ishinga Amategeko umutwe w’Abadepite, mu ijambo yavuze ubwo baherekezaga bwa nyuma Depite Nyandwi, yavuze ko irimo yose yakoraga yaranzwe n’ubushishozi, ubwitange, umurava, ubushake n’ubushobozi. Hon. Mukabalisa kandi yavuze ko urupfu rwa Hon. Depite NYANDWI Joseph Désiré rusize icyuho mu Mutwe w’Abadepite.

Yakomeje agira ati: "Hon Nyandwi yari afite umuco mwiza wo gusoma, agasesengura, agacukumbura, byaba imishinga y’amategeko agiye gutangaho ibitekerezo, byaba n’izindi nyandiko zifasha mu mirimo y’Inteko Ishinga Amategeko. Igihugu kibuze umuntu w’inaribonye, wakundaga Igihugu cye, agakunda umurimo unoze kandi agakunda Abanyarwanda yari ahagarariye. Yubahaga buri wese, akarangwa no gukunda ukuri. Uwo yabonaga ari mu nzira itaboneye, yamugiraga inama yo kwikosora, ukora ibyiza nawe akamushishikariza gukomeza muri iyo nzira. Depite Nyandwi Joseph Desire abamuzi bamubonaga nk’umubyeyi, nk’umujyanama bigatuma aba inshuti y’abantu benshi."

Umuhango wo kumusezera bwa nyuma wabereye mu Ngoro y’Inteko Ishinga Amategeko

Umuhango wo kumusabira wabereye muri Regina Pacis i Remera

Hon. Nyandwi Joseph Désiré yavutse tariki 4 Werurwe 1954, bivuga ko atabarutse afite imyaka 62 y’amavuko. Yari inzobere mu by’ubuhinzi, dore ko yari abifitemo impamyabumenyi ya Kaminuza ihanitse (Agronomic Engineer, Certificate in Technical Bases for Crop Protection)

Dore imwe mu mirimo y’ingenzi yakoze:

- Kuva tariki 29 Ukwakira 1994 kugeza tariki 07 Gashyantare 1999, yabaye Perefe w’icyahoze ari Perefegitura ya Gitarama.

- Kuva tariki 8 Gashyantare 1999 kugeza tariki 19 Werurwe 2000, yabaye Minisitiri w’Ubutegetsi bw’igihugu.

- Kuva tariki 11 Werurwe 2000 Kugeza tariki 15 Ugushyingo 2002, yabaye Minisitiri w’Ubutegetsi bw’igihugu n’imibereho myiza y’abaturage

- Kuva tariki 20 Ugushyingo 2002 kugeza tariki 22 Kanama 2003, yabaye umudepite mu Nteko Ishinga Amategeko y’u Rwanda mu gihe cyayo cy’inzibacyuho.

- Kuva tariki 10 Ukwakira 2003 kugeza ubu, yari Umudepite watowe ahagarariye ishyaka rya FPR Inkotanyi

JPEG - 190.4 kb

KANDA HANO UREBE VIDEOS UTASANGA AHANDI