Mu gusezera Hon. Mucyo J. de Dieu, havuzwe amagambo akomeye asobanura uwo yari we

Chief Editor | 7-10-2016
Mu gusezera Hon. Mucyo J. de Dieu, havuzwe amagambo akomeye asobanura uwo yari we

Kuri uyu wa Gatanu tariki 7 Ukwakira 2016, nibwo Senateri Jean De Dieu Mucyo yasezeweho bwa nyuma, ndetse ninabwo haba imihango yo kumushyingura. Iyi mihango yabimburiwe no kwakira umurambo ku bitaro byitiriwe umwami Faycal ku Kacyiru, bikurikirwa no kumusezera mu cyubahiro mu rugo iwe i Nyamirambo, hakurikiraho n’igikorwa cyo kumusezera mu cyumba cy’inama z’Inteko Rusange ya SENA, byabanjirije ibitambo cya Misa no gushyingura mu irimbi rya Rusororo. Mu kumusezera bwa nyuma muri Sena, abantu batandukanye bavuze amagambo akomeye agaragaza uburyo Jean de Dieu Mucyo yari umuntu udasanzwe.

Mu butumwa bwa Nyakubahwa Perezida wa Repubulika y’u Rwanda Paul Kagame, bwasomwe na Minisitiri mu biro bya Perezida, Madamu Venantie Tugireyezu, yavuze ko u Rwanda rubuze Umugabo, umuyobozi w’Ingirikamaro ukunda igihugu. Ibi Perezida yavuze, bije bisanga ibyo yavuze ubwo yarahizaga abayobozi bashya muri Guverinoma, aho yagize ati: "Nifatanyije n’abagize Umutwe wa Sena kuri Senateri Jean de Dieu Mucyo duherutse gutakaza. Nyakwigendera Mucyo yari umuyobozi mwiza, utariremerezaga nka bamwe dukunze kubona... Tuzahora tumwigiraho gukora akazi neza tutiremereje".

Mu bandi bavuze amagambo akomeye agaragaza ubutwari bwa nyakwigendera, Senateri Jean de Dieu Mucyo, harimo Umunyamabanga Mukuru w’Umuryango FPR Inkotanyi, Ngarambe Francois Xavier, mu ijambo rye akaba yagize ati: "Intwari ntizipfa, bityo Mucyo yaratabarutse"

Mu izina ry’abagize SENA bose, Perezida wa Sena Makuza Bernard we yagize ati: "SENA natwe turi umuryango wa Nyakwigendera Hon. MUCYO Jean de Dieu, tuzakomeza kubanira abo asize nk’uko na we yabikoreye benshi yakoranye cyangwa yabanye nabo. Ndetse n’abamuganaga atabazi ntibigeze bahezwa..."

Yasobanuye uburyo itabaruka rya Hon.MUCYO J.de Dieu ari igihombo gikomeye ku muryango we, kuri SENA no gihugu cyose, u Rwanda rukaba rubuze imfura, yubahirwaga KUGIRA IMPUHWE. Yavuze uburyo benshi ari abahamya b’ibakwe yatabaranye ngo yifatanye n’abandi mu rugamba rwo Kwibohora, ubwo nawe yari amaze gatabarwa, kandi abamumenye bya hafi bakaba bazi ubwitange bwe mu mirimo itandukanye, inama zuzuye ubushishozi n’ineza, n’uburyo yasabanaga n’abantu bose.

Nyakwigendera Senateri MUCYO yashimiwe uburyo yahoraga aterwa ISHEMA n’u Rwanda nk’igihugu cye, ndetse agaterwa ishema no kuba Umunyarwanda. Yashimiwe kandi kuba yararanzwe no kwiyoroshya, gufatanya n’abandi no kubatega amatwi, inama zubaka, Ubusabane n’Ubupfura, kugira impuhwe, guha imbaraga no gushyigikira abafite ibibazo n’abatishoboye, muri ibyo byose agaharanira ukuri no kwanga akarengane.

Perezida wa SENA, Bernard Makuza ati: "Uyu mwanya dusezera kuri Hon.MUCYO, ni umwanya wo kumushima, kandi dusaba Imana ngo ihoze umuryango asize. N’ubwo agiye tukimukeneye, adusigiye urugero rwiza; yujuje inshingano ze neza, atanga umusanzu ukwiye mu kivi yateruranye n’abandi"

Mucyo Jean De Dieu wari Umusenateri mu Nteko Ishinga Amategeko y’u Rwanda, yatabarutse kuwa Mbere tariki 3 Ukwakira 2016 azize urupfu rutunguranye. Yari muzima, yagiye ku kazi yitwaye mu modoka nta kibazo, ndetse abaherukanaga nawe bemeza ko nta kibazo yari afite. Mu masaha ya mugitondo ubwo yageraga ahakorera Sena y’u Rwanda, yatsikiye azamuka kuri esikariye (escaliers) ahita yikubita hasi, bahamukura bamujyana mu bitaro byitiriwe umwami Faycal ariko yahageze bihita byemezwa ko yashizemo umwuka.

Mucyo Jean de Dieu yavutse tariki 07/12/1961; avukira i Nyanza mu Majyepfo ariko ubundi Akomoka I Mbazi (Butare). Ni mwene Mucyowintore Thomas na Uzanyamaberuka Marciana, aba babyeyi ye bombi bitabye Imana akiri mu mashuri yisumbuye.

Abana ba Hon Jean de Dieu Mucyo, mu muhango wo gusezera bwa nyuma ku mubyeyi wabo

Mucyo Jean de Dieu yari yubatse, yashakanye na Uwimana Rose bakora ubukwe mu 1995 nyuma ya Jenoside. Yatabarutse afite abana bane, Umukobwa n’abahungu batatu. Umwana w’imfura yitwa Thierry Mucyo w’imyaka 20 y’amavuko, Clement Mucyo w’myaka 19, Kelly Mucyo w’imyaka 16 na Herve Mucyo w’imyaka 13.

ANDI MAFOTO Y’IMIHANGO YO GUHEREKEZA NO GUSHYINGURA MUCYO JEAN DE DIEU:

KANDA HANO UREBE VIDEOS UTASANGA AHANDI