Ngo u Rwanda rutoza abasirikare bazatera u Burundi? Iyi kinamico irasekeje

Chief Editor | 2-06-2016
Ngo u Rwanda rutoza abasirikare bazatera u Burundi? Iyi kinamico irasekeje

Umwe mu bakunzi b’Ikinyamakuru Ukwezi.com witwa Gatera, yatwandikiye inyandiko igaragaza igitekerezo cye ndetse n’uko afata inkuru na raporo zishinja u Rwanda gutoza abasirikare bagamije gutera u Burundi bagahirika ubutegetsi bwa Perezida Pierre Nkurunziza. Ku bwe, asanga iyi ari ikinamico isekeje ndetse buri wese asesenguye akaba yabyibonera. Iyi nyandiko ye iragira iti:

Sindi umunyapolitiki ariko kandi nkurikiranira hafi ibijyanye n’imiyoborere y’ibihugu byo mu karere u Rwanda ruherereyemo. Iyo nsomye inkuru zivuga kuri raporo z’umuryango w’Abibumbye zishinja u Rwanda gutoza abarundi bifuza kujya gutera igihugu cyabo ngo bahirike Pierre Nkurunziza, mbona ari ikinamico isekeje kurusha izindi numvise mbere zose, ikinamico idafite icyo yigisha, usesengura ugasanga ibabaje kandi igamije guteranya abarundi n’abanyarwanda.

Munyumve neza, njyewe ndi umunyarwanda ariko sinakwemera gushyigikira amakosa y’igihugu cyanjye ndamutse mbona ahari, kuko nzi ko n’urubyiruko rwo hambere kuba rwarashyigikiye amakosa y’abayobozi bariho icyo gihe ari byo byatumye Jenoside iba. Ndamutse mbona ubuyobozi bw’u Rwanda burimo kwatsa umuriro, sinabishyigikira kuko naba nzi ko nanjye umuriro ushobora kuzanyotsa. Ibyo mvuga rero sinshingira mwuka mubi uri hagati y’ibihugu byombi, si ku marangamutima cyangwa ikindi, ahubwo icyo njyewe nshingiraho, ni ibimenyetso bigaragazwa muri raporo z’umuryango w’Abibumbye, bavuga ko ari byo twagenderaho twemeza ko u Rwanda rutoza abarwanyi bashaka kuzatera u Burundi. Munyemerere namwe mutekereze ku byo ngiye kubabwira, murasanga rwose harimo kwigiza nkana.

Ikimenyetso simusiga izi raporo zishingiraho, ni ukuba hari abarwanyi b’abarundi izo mpuguke z’Umuryango w’Abibumbye zivuga ko zasanze muri Repubulika Iharanira Demokarasi ya Kongo, bakitangira ubuhamya ko baherewe imyitozo mu Rwanda kandi ko batojwe n’abasirikare bakuru b’u Rwanda. Reka aha tuhatekerezeho kandi dushyire mu gaciro dufatanyije gusesengura nk’abantu bafite ubwenge, wenda n’iyo twaba tutazi ibya politiki.

Abo bantu babajijwe (n’ubwo ntakwemeza ko bahari) ni inshuti z’u Rwanda zatewe inkunga na Leta y’u Rwanda kandi zigiterwa inkunga ngo zizasohoze umugambi wazo? Niba ari ukuri se ubwo, baba ari ibicucu bingana iki kuburyo batangaza ibanga ry’uko hari urimo kubashyigikira? Baba se ari ibigoryi bitagira ubwenge ku kihe kigero, kuburyo bakwemera kuvuga aho imbaraga bazifashisha batera u Burundi zishingiye? Ubwose baba bumva bazakomeza kubona inkunga z’u Rwanda kandi bamena ibanga ry’akazi? Ubwo koko iyo si ikinamico?

Niba ku rundi ruhande tuvuge ko abo bantu atari inshuti z’u Rwanda kandi bakaba batarukunda, aho rwose sinza no kuhatinda, nyine uwo wanga umugerekaho icyamuhesha isura mbi cyose, ni nk’uko nta gihugu ku isi kitabura abatavuga rumwe n’ubutegetsi bwacyo, kandi utavuga rumwe n’ubutegetsi wese usanga abuvuga nabi, icyiza cyose bukora agashaka isura mbi abiganishamo, uwo urwanya ntibishoboka ko wamugaragaza neza, waba utsinzwe!

Ese ubundi ababajijwe, kuki bataba ari abanyarwanda basanzwe mu mashyamba ya Repubulika Iharanira Demokarasi ya Kongo? Kuki bataba ari interahamwe zo muri FDLR zirwanya ubutegetsi buriho muri Leta y’u Rwanda, kandi ko byumvikana icyavuga nabi u Rwanda cyose bagisamira hejuru? Izo mpuguke zakoze raporo zabanje gusaba ibihe byangombwa ngo zemere ko abo zabajije ari Abarundi koko? Ko hari n’abarundi bavugwaho gufatanya na FDLR kurwanya ubutegetsi bw’u Rwanda, ni iki cyatwemeza ko batabeshya ? Aha naho muhatekereze, murasanga abavugwa ko babajijwe ubwabo ari ikimenyetso ko izi raporo ari ikinamico zisekeje kandi zidashingiye ku bimenyetso bifatika.

Abanyarwanda n’abarundi turi abavandimwe, kandi ibibazo by’imiyoborere iri mu Burundi tutabyitondeye twazisanga tumeze nka kumwe Koreya ya Ruguru n’iy’epfo bitajya bicana uwaka, ugasanga tugendeye kuri izi raporo duhise twangana nk’abaturage kandi ibivugwa ari uguharabikana gushingiye ku nyungu za Politiki y’abari ku butegetsi mu Burundi.

Ikitonderwa: Iyi nyandiko yanjye, ni ibitekerezo byanjye nka Gatera ariko buri wese ashobora kugira igitekerezo ayitangaho, tukungurana ibitekerezo bigamije kubaka amahoro n’ubumwe bw’abanyarwanda n’abarundi.

KANDA HANO UREBE VIDEOS UTASANGA AHANDI