Ni bande bazahatana na Perezida Kagame mu matora? Byashoboka se ko bamutsinda?

Chief Editor | 30-08-2016
Ni bande bazahatana na Perezida Kagame mu matora? Byashoboka se ko bamutsinda?

Mu gihe mu Rwanda habura amezi macye ngo habe amatora ya Perezida wa Repubulika y’u Rwanda azaba muri 2017, kugeza ubu Perezida Paul Kagame yamaze kwemerera abanyarwanda ko azongera akiyamamaza agahatana n’abandi bifuza kwiyamamaza kuri uyu mwanya, bivuga ko ubu umukandida umwe we azwi mu buryo bidashidikanywaho. Ese ninde witeguye guhatana na Perezida Kagame? Birashoboka se ko haboneka umutsinda?

Kugeza ubu, ntabwo Komisiyo y’Amatora iratangira kwakira ibyangombwa by’abifuza kwiyamamariza umwanya wa Perezida wa Repubulika mu matora azaba muri 2017, ariko hari abagiye bagaragaza ko biteguye kuziyamamaza bagahatana na Paul Kagame.

Mu bamaze kwerekana ko biteguye kuba bahatanira uyu mwanya w’umukuru w’igihugu, harimo Faustin Twagiramungu uherutse kwemeza ko ntacyamubuza kuzaza kwiyamamariza kuyobora u Rwanda n’ubwo hari abavuga ko ashaje.

Nk’uko Faustin Twagiramungu yabitangaje umwaka ushize, ubwo yabazwaga ku bijyanye no kuba yaba afite gahunda yo kuzaza kwiyamamaza ku mwanya wa Perezida wa Repubulika, yashimangiye ko yumva ntacyamubuza kandi ko n’ubwo yumva hari abavuga ngo arashaje, we yumva anatsinzwe yatsindwa kubera ibitekerezo bye ariko atatsindwa kubera imyaka ye.

Twagiramungu wigeze no kwiyamamariza uyu mwanya mu mwaka wa 2003 ariko agatsindwa yagize ati: “Natsindwa kubera ibitekerezo byanjye, ntabwo natsindwa kubera imyaka mfite. Ibindi rero by’abantu baba birirwa baririmba ko umuntu ashaje, niba nshaje ntabwo nshaje mu bwonko, ibitekerezo byanjye biracyari bya bindi.”

Undi werekanye ko we n’ishyaka rye biteguye kuyobora u Rwanda muri 2017, ni Dr Frank Habineza uyobora ishyaka riharanira Demokarasi n’ibidukikije (Democratic Green Party), ibi akaba yarabitangaje kuwa Gatatu tariki 13 Gicurasi 2015.

Icyo gihe Dr Frank Habineza yavuze ko niba Abanyarwanda bavuga ko nta wundi uhari wasimbura Perezida Kagame, we yumva ataribyo ndetse ko we n’ishyaka rye biteguye kuba bayobora igihugu, kandi ko babyiteguye kuburyo umwaka wa 2017 nugera ibi bazabyerekana.

Ese koko Twagiramungu, Dr Frank Habineza n’abandi bazifuza kwiyamamaza baza bizeye gutsinda Kagame cyangwa bizaba ari ukurangiza umuhango?

Mu matora Perezida Kagame yatsinze ku kigero cyo hejuru muri 2003, Twagiramungu yari mu bahatanaga na we, uyu icyo gihe akaba yarabashije kubona amajwi atageze kuri 4%. Nyuma yaje guhunga igihugu ndetse aza no kuvugwaho ko yaba akorana bya hafi n’imitwe irwanya ikanakora iterabwoba muri Leta y’u Rwanda, ibi bikaba byaratumye hari Abanyarwanda bamutakariza icyizere nyamara avuga ko yiteguye kugaruka agahatanira uyu mwanya.

Twagiramungu nawe wivugira ko ashaje ariko ubwonko bwe bukaba butarasaza, azaba afite akazi gakomeye ko kongera guhangana n’uwamutsinze muri 2003, ikirenze kuri ibyo uyu musaza w’imyaka isaga 71 akaba ashobora guhura n’imbogamizi y’amagambo yagiye avuga ari mu buhungiro, benshi bakamwamaganira kure.

Ku rundi ruhande, Ishyaka rya Dr Frank Habineza, niryo shyaka rukumbi mu yemerewe gukorera mu Rwanda, ryamaganye ko Perezida Kagame yakongera kwiyamamaza. Ibi bisobanura ko mu gihe amashyaka yose yemeye ko Perezida Kagame yakongera kwiyamamaza, ashobora no kumushyigikira mu matora azaba mu mwaka utaha wa 2017. Byaba ari akazi katoroshye kuri iri shyaka, naryo ubwaryo ryivugira ko ibyo Perezida Kagame yakoreye abaturage ari byiza ariko rikaba ryarumvaga hakwiye kujyaho undi Kagame agasimburwa.

Uretse aba babiri ariko, hari n’imibare ishimangira ko umuntu wese uzahatana na Perezida Kagame azaba arimo kurangiza umuhango kuko nta kindi azakura mu matora kitari ugutsindwa. Mu matora ya referandumu yabaye mu mpera z’umwaka ushize wa 2015, abanyarwanda bagombaga kwemeza cyangwa bakamagana ko Itegeko Nshinga rihinduka, kugirango bagaragaze amahitamo yabo ku bijyanye no kuba Perezida Kagame yakwemererwa kongera kwiyamamaza. Abagera kuri 98%3 batoye "YEGO", bishimangira ko baba baniteguye kumuhundagazaho amajwi mu gihe cy’amatora y’Umukuru w’Igihugu.

Hagendewe kuri iyi mibare, abandi baziyamamaza bashobora kuzagabana amajwi angana na 1.6% by’abanyarwanda bose kuko ari bo batoye "OYA" muri referandumu, bagaragaza ko batifuza ko Itegeko Nshinga ryahinduka ngo Kagame yemererwe kongera kwiyamamaza.

KANDA HANO UREBE VIDEOS UTASANGA AHANDI