AMAKURU

UKWEZI
CHENO

Ntakirutimana watwikishijwe aside yumva nta wundi atezeho ubutabera utari Perezida Kagame

Ntakirutimana watwikishijwe aside yumva nta wundi atezeho ubutabera utari Perezida Kagame
14-06-2016 | By Chief Editor | Yasomwe n'abantu 4232 | Ibitekerezo 13

Ntakirutimana Violette, umukobwa watwitswe n’umugore wari inshuti ye, avuga ko akomeje kubura ubutabera mu nzego zakamurengeye, akaba yumva uwo asigaje gutura ikibazo cye ari Perezida wa Repubulika kuko azi ko we abasha kumva akarengane k’abababaye.

Tariki 12 Mutarama uyu mwaka, nibwo umugore witwa Dusabimana Eugenie yatwitse umukobwa wari inshuti ye magara witwa Ntakirutimana Violette, akaba yaramutwitse akoresheje aside akangirika bikomeye.

Ntakirutimana Violette yahise ajyanwa kwa muganga, naho Dusabimana Eugenie we ahita atoroka. Tariki 21 Mutarama Dusabimana Eugenie yatawe muri yombi na Polisi arafungwa ariko nyuma Polisi itangaza ko yaje gutobora aho yari afungiye agatoroka, aho byavuzwe ko yari yatorokeye muri Uganda.

Akimara gutwikwa, Ntakirutimama Violette ni uku yari ameze

Nyuma gato yagarutse mu Rwanda, ageze mu gace ka Nyabugogo umwe mu bari bamuzi ahita atanga amakuru maze arongera atabwa muri yombi, afungirwa muri gereza ya Kigali izwi nka 1930, ariko kuwa Kabiri w’icyumweru gishize nabwo akaba yaratorotse mu buryo kugeza ubu budasobanutse. Sengabo Hillary, umuvugizi w’amagereza mu Rwanda, yabwiye Ukwezi.com ko ari byo uyu Dusabimana Eugenie yatorotse, bakaba bakeka ko yaba yaruriye.

Ntakirutimana Violette ariko akimara kumenya ko uwamuhemukiye yatorotse, yahise ajya kubaza kuri gereza nawe bamubwira ko Dusabimana Eugènie yuriye igipangu, ariko agasanga hari ababyihishe inyuma banga ko abona ubutabera akwiye bujyanye n’ubuhemu yakorewe, ndetse agakeka ko yaba yaratanze ruswa nk’uko yabigenje mbere.

Aha kuri iyi foto, ubanza wambaye wambaye umukara n’umweru niwe Eugenie naho Ntakirutima Violette ni uyu wambaye ipantalo y’ubururu. Iyi ni ifoto yabo ya kera

Violette ati: "Ntabwo bisobanutse, n’ubwa mbere afungiye mu Gatsata yabwiye uwo bari bafunganywe wari ugiye gutaha, ko nawe agiye gutaha kuko hari umupolisi wamuciye ibihumbi 200 ngo amurekure, kandi koko icyo gihe yaraye atashye. Hariya muri 1930 naho, ntabwo bisobanutse, sinumva uko yabacitse, hari abandi bafungiwe hariya banakatiwe ibihano bikomeye, kuki bo badatoroka? Mu Rwanda nkomeje kuhabura ubutabera, ubu sinzi uko nzagera kuri Perezida wacu mbona ari we wabasha kundenganura, niwe wumva akarengane k’abababaye."

Ntakirutimana Violette akomeza agaragaza ko iri toroka ririmo urujijo. Avuga ko hari umukobwa ukora akazi k’ubuzunguzayi mu gace ka Nyabugogo witwa Mutoni, wari wafatishije Dusabimana Eugenie ubwo yazaga i Kigali nyuma yo gutorokera muri Uganda, wagiye gusura undi muntu kuri gereza ya 1930 kuwa Gatanu, akabwirwa n’abanyururu ko kamubayeho, kuko umugore yafatishije yatorotse kandi akagenda avuze ko azamwica.

Aha Violette niho ahera yibaza uburyo yatorotse yabanje kubyigamba, kandi kuva kuwa Kabiri ubuyobozi bw’iyi gereza bukaba butari bwigeze butangaza ko yatorotse. Avuga ko yumva atabona undi yizeraho kubona ubutabera utari Perezida Paul Kagame.

Uyu ni Ntakirutimana Violette, iyi ikaba ari ifoto yafashwe mbere y’uko atwikwa

Twabibutsa ko uyu mukobwa watwitswe, yaje kumenya ko umugore wamutwitse yamuzizaga ko ari we waba yarabwiye umugabo we ko asigaye akora uburaya, kandi ngo atari we wamureze.

Violette ati: "Yari umugore afite umugabo basezeranye, umugabo we yabaga i Nyacyonga yaramusize yaramubwiye ngo afite akazi i Kigali, akajya akora uburaya maze nyuma umugabo aza kubimenya, abimenye barashwana bavugana nabi, uwo mugore we kubera ko twari inshuti yahise wenda yiyumvisha ko ari njye wabibwiye umugabo we. Uretse ko ntakintu yigeze ambaza cyangwa ngo agire icyo abimbwiraho, nyuma bamufunze nibwo yabisobanuye, yaravuze ngo namuteranyije n’umugabo we, kandi umugabo we bamubaza akavuga ko yabibwiwe n’abamotari n’abashoferi".

Uku niko Violette Ntakirutimana asigaye ameze, n’ubu akaba akomeje kwivuza n’ubwo yangiritse cyane mu isura


Tanga Igitekerezo
Ibitekerezo 13
eagle one Kuya 29-11-2016

hello ahubwo njyewe ndibaza uyu muntu ntakuntu iyi sura ye yabagwa akaba yasubirana umubiri mwiza ? aba specialiste bimpu mwatubwira .
ikindi gitekerezo yakorerwa ubuvugizi agatabarwa murakoze

Marley Kuya 15-06-2016

Niba abagore batangiye kujya burira ibipangu bya gereza bagacika ubwo abagabo bakoze jenoside bafungiye 1930 bo ntibagiye kujya bacika nabo? Mwitonde kabisa ndumva gereza zitakizewe kubika abanyabyaha!

miduriko Kuya 15-06-2016

Kugeza ubu abafite ikosa rikomeye ni abo bacungagereza kuko mu buryo bufatika nibo bamutorokesheje.

Mahoro Kuya 15-06-2016

Niwihangane muvandimwe. Uriya gutoroka, afite ababimufashamo. Ko abandi baraswa ngo bagiye gutoroka, uriya we baramutinya? Uwiteka niwe mucamanza utabera kandi arakuzi.

shyaka Kuya 15-06-2016

aragira ibikomere byumubiri nibyumutima koko? ubundi atuyehe ko tutarunva abayobozi baho bavuga? nukuvugango wasanga ari wamuturage wiyo hasi. ubwose tudakoze ubuvugizi muziko haruwazamusangayo?

jose Kuya 15-06-2016

ariko nkamwe banyamakuru mwakamushyikirije KAGAME ubundi akamutura agahinda ke nibwo yasubirana kumutima

byukusenge Kuya 15-06-2016

narenganurwe

peter Kuya 15-06-2016

izo hene ngo ni abacungagereza bazifunge kuko bigaragara ko zariye ruswa y,umwicanyi.Naho ubundi leta niyiteho uwo mwana kuko ntabwo ikennye,se ubundi usibye kagame ingirwabayobozi zindi ntacyo zakora?Muri ba ntampuhwe

Ntabwoba Rutikanga Emmy. Kuya 14-06-2016

Uwomwari ntarenganurwe kuk yararenganye cyane naho Kagame siwe wacyewura ibibazobyose ese iyoumwana akosheje murugo papa we adahari mama we namuhana sawa murakoze.

shemb Kuya 14-06-2016

niyihangane iyo urugamba rukomeye ruba rugiye kurangira

olive Kuya 14-06-2016

se winfubyi mugabo wabapfakazi nkuko wigaragaje 1994 ongera wigaragaze kuruyumwana wumukobwa

Ndayisaba Cyprien Kuya 14-06-2016

agize amahirwe akabona H.E kubwanjye nunva yamusaba kwivuza agasubirana naho ubutabera bwo nubwIMANA

THEOGENE Kuya 14-06-2016

Uwo mwari arenganurwe kbsa ndetse abo bose babyihishe i nyuma batabwe muriyombi kko ni ubunyamaswa ubwo kbsa mbega isura nziza bangije.!!! Bidakurikiranywe baba bapfobeje ikiremwa muntu

IGURIRE
IBARUWA ZA JORIJI
URUKUNDO
INKURU ZIKUNZWE
IBIRORI
Ibitekerezo
IZINDI NKURU WASOMA