Nyakwigendera Mucyo yari umuyobozi mwiza utariremerezaga - Perezida Kagame

Chief Editor | 6-10-2016
Nyakwigendera Mucyo yari umuyobozi mwiza utariremerezaga - Perezida Kagame

Perezida wa Repubulika y’u Rwanda, Paul Kagame, yasobanuye uburyo nyakwigendera Senateri Jean de Dieu Mucyo witabye Imana mu ntangiriro z’iki cyumweru yari umuyobozi utiremereza, abandi bakaba bazamwigiraho gukora akazi neza nta kwiremereza.

Ibi Perezida Paul Kagame yabitangaje mu muhango wo kurahiza abayobozi bashya muri Guverinoma ku gicamunsi cyo kuri uyu wa Kane tariki 6 Ukwakira 2016, igikorwa cyabaye nyuma y’iminsi ibiri habayeho impinduka mu bagize Guverinoma n’indi myanya y’ubuyobozi itandukanye.

Ubwo yafataga ijambo, Perezida Kagame yagize ati: "Nifatanyije n’abagize Umutwe wa Sena kuri Senateri Jean de Dieu Mucyo duherutse gutakaza. Nyakwigendera Mucyo yari umuyobozi mwiza, utariremerezaga nka bamwe dukunze kubona... Tuzahora tumwigiraho gukora akazi neza tutiremereje".

Mucyo Jean De Dieu wari Umusenateri mu Nteko Ishinga Amategeko y’u Rwanda, yatabarutse kuwa Mbere tariki 3 Ukwakira 2016 azize urupfu rutunguranye. Yari muzima, yagiye ku kazi yitwaye mu modoka nta kibazo, ndetse abaherukanaga nawe bemeza ko nta kibazo yari afite. Mu masaha ya mugitondo ubwo yageraga ahakorera Sena y’u Rwanda, yatsikiye azamuka kuri esikariye (escaliers) ahita yikubita hasi, bahamukura bamujyana mu bitaro byitiriwe umwami Faycal ariko yahageze bihita byemezwa ko yashizemo umwuka.

Mucyo Jean de Dieu yavutse tariki 07/12/1961; avukira i Nyanza mu Majyepfo ariko ubundi Akomoka I Mbazi (Butare). Ni mwene Mucyowintore Thomas na Uzanyamaberuka Marciana, aba babyeyi ye bombi bitabye Imana akiri mu mashuri yisumbuye.

Mucyo Jean de Dieu yari yubatse, yashakanye na Uwimana Rose bakora ubukwe mu 1995 nyuma ya Jenoside. Yatabarutse afite abana bane, Umukobwa n’abahungu batatu. Umwana w’imfura yitwa Thierry Mucyo w’imyaka 20 y’amavuko, Clement Mucyo w’myaka 19, Kelly Mucyo w’imyaka 16 na Herve Mucyo w’imyaka 13.

KANDA HANO UREBE VIDEOS UTASANGA AHANDI