Oda Gasinzigwa wahoze ari Minisitiri yatorewe kuba umudepite, asimbura Bazivamo

Chief Editor | 19-10-2016
Oda Gasinzigwa wahoze ari Minisitiri yatorewe kuba umudepite, asimbura Bazivamo

Oda Gasinzigwa wigeze kuba Minisitiri w’Uburinganire n’Iterambere ry’Umuryango, kuri uyu wa Gatatu tariki 19 Ukwakira 2016, yatorewe kuba Umudepite uhagarariye u Rwanda mu Nteko Ishinga Amategeko y’Umuryango wa Afurika y’Uburasirazuba (EALA), umwanya yasimbuyeho Bazivamo Christophe.

Aya matora Oda Gasinzigwa yari ahatanyemo na Callixte Kanamugire, yabashije kuyatsinda ku kigero cyo hejuru kuko yagize amajwi 71 kuri 75. Yasimbuye Bazivamo Christophe uherutse kugirwa Umunyamabanga Mukuru Wungirije w’Umuryango w’Afurika y’Iburasirazuba (EAC) ushinzwe Imari n’Ubutegetsi.

Oda Gasinzigwa yari Minisitiri w’Uburinganire n’Iterambere ry’umuryango, kugeza muri Werurwe uyu mwaka ubwo yasimbuzwaga Dr Diane Gashumba usigaye ubu ari Minisitiri w’Ubuzima.

Hon. Oda Gasinzigwa, yinjiye mu Nteko ahagarariye ishyaka rya FPR Inkotanyi, muri iyi nteko Bazivamo Christophe asimbuye akaba yari asigajemo umwaka umwe ngo manda y’imyaka 5 yari yaratorewe irangire.

KANDA HANO UREBE VIDEOS UTASANGA AHANDI