Padiri Laurent Ntimugura usoma misa yarakoze Jenoside ntavugwaho rumwe

Chief Editor | 10-10-2016
Padiri Laurent Ntimugura usoma misa yarakoze Jenoside ntavugwaho rumwe

Tom Ndahiro uvuga ko ari umushakashatsi kuri Jenoside yakorewe abatutsi

Padiri Laurent Ntimugura wo muri Diyosezi gatorika ya Cyangugu, akomeje kutavugwaho rumwe nyuma y’uko arangije igifungo cy’imyaka 20 azira icyaha cya Jenoside yakorewe abatutsi, none akaba asoma misa agatanga penetensiya nk’abandi bapadiri bose.

Umushakashatsi kuri Jenoside yakorewe abatutsi mu Rwanda, Tom Ndahiro, mu mpera z’iki cyumweru dusoje yashyize hanze intabaza nyinshi abinyujije ku rubuga rwa twitter, aho yagiye abaza abantu batandukanye barimo Minisitiri w’Ubutabera na Papa Francis, umushumba wa Kiliziya Gatorika ku isi, ukuntu uwahamwe n’icyaha cya Jenoside yakongera gusoma misa abantu bakajya bamusaba penetensiya bakamwicuzaho ibyaha.

Tom Ndahiro ati: "Akandi gahomamunwa muri Kiliziya Gatolika mu Rwanda. Uwishe abantu abaziza uko baremwe ngo bamwicuzeho ibyaha? Kiliziya Gatolika yirukana umupadiri wamennye ibanga rya penetensiya. Nicyo cyaha gikomeye kurusha gukora Jenoside?... Twemere amahano se? Amategeko ya Kiliziya navuge icyo padiri wahamwe na jenoside aba nyuma y’igihano..."

Tom Ndahiro avuga ko atumva ukuntu Padiri Laurent Ntimugura wahamwe n’icyaha cya Jenoside yakorewe abatutsi agakatirwa imyaka 20 y’igifungo, nyuma yo kukirangiza tariki 10 Nzeri 2016 yahise yakirwa na Musenyeri Damascene Bimenyimana, ubu bakaba babana muri Diyosezi kandi akaba ajya anasoma misa mu gihe ategereje ko bamwohereza aho ajya gukorera mu buryo buhoraho.

Twagerageje kuvugana na Musenyeri Philippe Rukamba, umuvugizi wa Kiliziya Gaturika mu Rwanda ntibyadukundira, gusa no kenshi Kiliziya Gaturika mu Rwanda yagiye ishimangira ko uko byagenda kose, uwahawe isakaramentu ry’ubusaseridoti aba arihawe by’iteka ryose, kuburyo n’uwahamwe n’ibyaha akomeza kuba Padiri wenda akagira inshingano runaka yamburwa ariko akaba adashobora gukurwa mu bapadiri.

KANDA HANO UREBE VIDEOS UTASANGA AHANDI