Perezida Kagame yahawe igihembo nk’indashyikirwa mu kwimakaza uburinganire

Chief Editor | 9-07-2016
Perezida Kagame yahawe igihembo nk’indashyikirwa mu kwimakaza uburinganire

Ku mugoroba wo kuri uyu wa Gatandatu tariki 9 Nyakanga 2016, Perezida Paul Kagame n’umufasha we Jeannette Kagame bitabiriye umuhango wo gutanga ibihembo ku bateza imbere uburinganire kurusha abandi wabereye mu mujyi wa Kigali, uyu muhango Perezida Kagame akaba yawuherewemo n’igihembo.

Nk’uko byemejwe n’ibiro bya Perezida wa Repubulika binyuze ku rubuga rwa twitter, Ihuriro ry’imiryango iharanira iterambere ry’umugore muri Afrika yahaye Perezida Paul Kagame na Dr. Dlamini Zuma igihembo cyiswe "Gender Champion Award."

Igihembo cya "Gender Champion Award" gitangwa n’ihuriro ry’imiryango y’abagore muri Afrika ryitwa "African Women Movements", kigahabwa abateje imbere uburinganire n’ubwuzuzanye bw’abagabo n’abagore kurusha abandi.

Muri uyu muhango, Dr. Dlamini Zuma uyobora Umuryango Nyafurika (African Union) yashimye cyane Perezida Kagame ku bw’uruhare yagize mu iterambere ry’igihugu. Yagize ati: " "Uri urugero kuri twese mu guharanira iterambere ry’umugore. Turagushimira ko wumva ko hatabaho ubwigenge bw’abagabo hatabayeho n’ubw’abagore. Igihe Isi yose yari yatereranye u Rwanda, wowe wafashe iyambere ubohora igihugu, wabohoye u Rwanda kandi urugira urw’Abanyarwanda bose ntawe uhejwe."

Nyuma yo guhabwa iki gihembo, Perezida Paul Kagame yashimye cyane iri huriro ryakimugeneye, anashimangira impamvu agomba gushyigikira uburinganire. Yagize ati: " Iki gihembo kinteye imbaraga zo gukomeza urugamba rwo guteza imbere umugore mu Rwanda no muri Afurika. Kuri njye guteza imbere umugore ni nko guharanira uburenganzira bwose bw’ibanze bwa muntu. Kuvuga ko abagore baba inyuma y’abagabo sibyo. Bose bagendera hamwe, bagakorera hamwe, bagatera imbere."

Muri uyu muhango kandi, Perezida Kagame yaboneyeho guha ikaze abahagarariye ibihugu byabo baje mu Rwanda mu gihe hitegurwa inama mpuzamanga y’umuryango nyafurika izabera i Kigali guhera mu mpera z’uku kwezi.

KANDA HANO UREBE VIDEOS UTASANGA AHANDI