Perezida Kagame yambitswe umudari n’umwami Mohammed VI banasangira Iftar - Amafoto

Chief Editor | 21-06-2016
Perezida Kagame yambitswe umudari n’umwami Mohammed VI banasangira Iftar - Amafoto

Kuri uyu Mbere tariki 20 Kamena 2016, Perezida wa Repubulika y’u Rwanda, Paul Kagame yagiriye uruzinduko mu gihugu cya Maroc rugomba kumara iminsi ibiri, mu masaha y’umugoroba akaba yakiriwe n’umwami w’iki gihugu, Mohammed VI, amwambika umudari w’ishimwe ndetse banasangira Iftar.

Mu masaha y’igicamunsi ubwo Perezida Paul Kagame yageraga mu mujyi wa Cassablanca ari kumwe na Minisitiri w’ububanyi n’amahanga, Louise Mushikiwabo basanganiwe ku kibuga cy’indege na Minisitiri w’Intebe wa Maroc, Abdel-Ilah Benkiran.

Perezida Kagame yakirwa n’umwami Mohammad VI w’ubwami bwa Maroc

Nyuma Perezida Kagame yakiriwe n’umwami Mohammed VI, amwambika umudari w’ishimwe kubera ibikorwa by’ubutwari n’imiyoborere myiza bikomeje kumuranga, uyu ukaba uri umudari w’ikirenga mu bwami bwa Maroc uzwi ku izina rya Grand Collar of Wissam Al-Mohammad. Hanyuma kuko iki gihugu kiganjemo abasengera mu idini ya Islam, mu masaha y’umugoroba bakaba basangiye Iftar, iri rikaba ari ifunguro rya nimugoroba ku basilamu mu gihe cy’igisibo cy’ukwezi kwa Ramadan barimo.

Perezida Kagame yambitswe umudari w’icyubahiro na Mohammed VI

Muri Maroc kimwe n’ahandi henshi muri Afurika, bafata Perezida Kagame nk’umugabo w’ubutwari budasanzwe, cyane ko uretse kuba yarabashije guhagarika Jenoside yakorewe abatutsi, anakora ibishoboka byose mu kurwanya ubuhake bw’abakoloni, ibintu n’umwami wa Maroc nawe ashaka gushyira imbere.

Perezida Kagame, umwami Mohammed VI n’abandi bayobozi basangira Iftar

Abaturage b’iki gihugu kandi, bashima imiyoborere ya Perezida Kagame yagize uruhare mu kurwanya ruswa no kwimakaza impinduramatwara mu bukungu, byatumye kuva yagera ku butegetsi haboneka impinduka bigatuma u Rwanda ruza mu bihugu bihagaze neza mu ruhando mpuzamahanga.

KANDA HANO UREBE VIDEOS UTASANGA AHANDI