Perezida Paul Kagame na Joseph Kabila bagiye guhurira mu karere ka Rubavu

Chief Editor | 12-08-2016
Perezida Paul Kagame na Joseph Kabila bagiye guhurira mu karere ka Rubavu

Perezida wa Repubulika y’u Rwanda, Paul Kagame, kuri uyu wa Gatanu tariki 12 Kanama 2016 arahurira mu karere ka Rubavu na Perezida Joseph Kabila wa Repubulika Iharanira Demokarasi ya Kongo, bakaba baherukanaga mu mu ntangiriro z’iki cyumweru mu gihugu cya Tchad ariko baherukaga guhura ubwabo nk’abayobozi b’ibihugu byombi muri 2009.

Julien Paluku, Guverineri w’Intara ya Kivu y’Amajyaruguru muri Repubulika Iharanira Demokarasi ya Kongo ndetse akaba ari nawe ushinzwe ibikorwa bya Politiki muri iki gihugu, yanditse ku rubuga rwa Twitter ko Perezida Paul Kagame na Joseph Kabila bahurira ku Gisenyi mu karere ka Rubavu, nyuma y’imyaka 7 dore ko baherukanaga tariki 6 Kanama 2006 ubwo bahuriraga i Goma muri Repubulika Iharanira Demokarasi ya Kongo.

Mu bivugwa ko bishobora kuza kwibandwaho mu biganiro hagati ya Perezida Paul Kagame na mugenzi we Joseph Kabila, harimo ibibazo by’umutekano w’ibihugu byombi ahanini ku bijyanye n’imitwe ihungabanya umutekano muri Repubulika Iharanira Demokarasi ya Kongo irimo na FDLR ishinjwa gusiga ikoze amahano ya Jenoside yakorewe abatutsi mu Rwanda ndetse n’ibijyanye n’umutwe wa M23.

Hashize igihe kandi ku mipaka y’ibihugu byombi hagaragara abasirikare ba Repubulika Iharanira Demokarasi ya Kongo bagerageza kwinjira mu Rwanda mu buryo butemewe n’ibindi bitandukanye bijyanye n’umutekano n’ubufatanye bw’ibihugu byombi bikaba bishobora kuza mu biganiro aba bakuru b’ibihugu bagirana.

KANDA HANO UREBE VIDEOS UTASANGA AHANDI